¹ Koi au ko Paula ai apositolo i Jisu Karisito me vaka a loma ni Kalou ina vuku ni bula sa yalataki tu vei Karisito Jisu. ² Kivei Timoci a qou gone ni toko: Me yaco a loloma a yalololoma a vakacegu mai vua a Kalou ko Tamada kei Karisito a weta Turaga. ³ Au sa vakavinavinatakina a Kalou ko koya kau sa qarava ena yalo jina me vaka a odra i valavala a qase i mada, ni sa tawa cegu ni nanumi iko ina qou masu ena siga kei na bogi. ⁴ Niu vakananuma a wai ni matamu, au sa vinakata vakalevu meu raici iko, meu vakasinaiti talega ina marau. ⁵ Au sa vakananumi ina vakabauta jina sara sa tu vei iko, ka tu i mada vei Loi a omu pu, vei Unaisi talega a jinamu, kau sa jinata ni sa tu talega vei iko. ⁶ O koya i ei au sa vakananumi iko kin, mo uqeta ai solisoli ni Kalou sa yaco vei iko ena veitabaki ni ligadra. ⁷ Na Kalou sa tawa solia vei keta a yalo ni rere, ia a yalo kaukauwa ga, kina yalololoma kei na yalomatua. ⁸ O koya mo qai kakua ni maduatakina ai tukutuku ni weta Turaga, se koi au a ona tamata sa vesu tu: ia mo vosota a veivakararawataki ina vuku ni tukutuku vinaka me vaka a kaukauwa ni Kalou. ⁹ Ni sa vakabulai keta ko Koya, ka sa kacivi keta meta yalosavasava, a sa sega ga ina weta cakacaka, ina vuku ni sa onai naki ga kei na loloma walega ka soli vei keta i mada, ina vuku i Karisito Jisu, sa qai vakatekivu i muri a vuravura. ¹⁰ Ni sa qai vakaraitakina mai ni sa rairai a weta i Vakabula ko Jisu Karisito, ko koya sa vakaojia a mate, ka vakavotuga a bula kei na tawa mate rawa i nai tukutuku vinaka. ¹¹ Ko koya au sa lesi kina meu vunau, meu i Apositolo talega kei a odra i vakavuvuli a veimatanitu tani. ¹² Ko koya talega au sa vosota kina a veika i ei, kau sa tawa madua kina: niu sa kilai koya kau sa vakarairai kina, ia kau sa kila jina sara, ni sa rawata ko Koya me maroroya a meca kau sa solia Vua ka yacova a siga koya. ¹³ Mo taura matua ai vakarau ni vosa jina ko a rogoca mai vei au, ina vakabauta kei na loloma sa tu vei Karisito Jisu. ¹⁴ A veika vinaka sa soli vei iko mo taura matua, ni sa vukei iko a Yalo Tabu sa tu vei keta. ¹⁵ A ka i ei ko sa kila ni sa biuji au ko ira taucoko a kai Esia; ¹⁶ Me yalololoma mada a Turaga ki vei i mataqali i Onnesiforo: ni sa vakacegui au vakalevu, ka sa tawa maduatakini au niu sa vesu tu. ¹⁷ Ia niu sa jiko mai Roma, sa vakayasavi au matua me boki au ka sa boki au. ¹⁸ Me solia mada vei koya a Turaga me boka a loloma mai vua a Turaga ena siga mai ei: ka mo kila ni sa qaravi au vakalevu, ko kila vakavinaka, mai Efeso