¹ Ko ira taucoko a tamata era sa jiko bobula, mera kilai ira a odra turaga mera vakarokorokotakini ira vakalevu, me kakua kina ni vakasaurarataki kina a yaca ni Kalou kei nai vakavuvuli. ² Ia ko ira a bobula sa qaravi ira a odra turaga era sa vakabauta, mera kakua ni beci ira ni ra sa veiwekani, ia mera qaravi ira vakalevu cake baleta a odra turaga sa vukei ena cakacaka sa vakabauta ka sa lomani. Vakatavulici ira mera vakarota jiko a veika i ei. ³ Kevaka e dua sa vakatavulitakina e dua ai vakavuvuli ka sega ni duavata kei a vosa vinaka ni weta Turaga ko Jisu Karisito, kei nai vakavuvuli sa vakalotu. ⁴ Sa viavialevu ko koya, ka sa sega bau a meca e kila, a sa dau vinakata a veiba kei a veibatakina a vosa walega, sa tubu kina a vuvu, e veivala, a vosavakacaca, a daunanuma ca. ⁵ A odra veiba tawa yaga a tamata lomaca, se tawa jiko kina a jina, era sa vakasama ni sa ka ni yau a lotu:mo lako tani mai vei ira sa vaka i ei. ⁶ Ia sai yau levu a lotu kei na lomavinaka. ⁷ Ni sa sega bau a meca eta kauta mai kina vuravura i ei, ka sa jina sara ni sa sega bau talega a meca eta na kauta tani rawa. ⁸ Ia kevaka sa tu vei keta a kakana kei nai sulu meta loma vinaka kina. ⁹ Ia ko ira era sa vinakata mera vutuniyau, era sa bale kina a veitemaki kei ai cori, kei na gagadre ca e levu ka lialia, ka dauvakacacani, oqori sa toburakini ira a tamata ena mate kei na rusa. ¹⁰ Ni sa vunimeca kecega a daulomana a silini, a ra sa dau kocova e so, a ra sa vakacalai kina ina vakabauta, a ra sa caka ira sara vaka ira ina yaluma vakalevu. ¹¹ Ia ko iko a tamata ni Kalou, mo vuka tani mai na veika i ei, mo muria a yalododonu, a lotu, a vakabauta, a loloma, a vosota, a yalomalua. ¹² Meta valu jiko ena valu vinaka ni vakabauta. Taura a bula tawamuduo koy ko sa kacivi kina, ko sa vakatusa talega kina a vakatutusa vinaka ina matadra a dauvakajinajina era sa lewe levu. ¹³ Au sa vakarota vei iko ina mata ni Kalou, o Koya sa vuni bula kecega, kei Karisito Jisu, o koya sa vakatusa a vakatutusa vinaka ena mata i Ponitio Pailato, ¹⁴ mo taura matua ai vakaro, mo kakua ni tauvi duka, mo tawa cala, ka malua mada me rairai mai a weta Turaga ko Jisu Karisito. ¹⁵ O koya ena vakatakilai Karisito mai ena kena gauna na Turaga levu duaduaga ka donumaka, a odra tui atui kei a odra Turaga a turaga. ¹⁶ O koya sa tu vei koya duaduaga a bula tawa mudu, sa jiko ina rarama sa tawa torovi rawa; sa sega bau a tamata sa raica, se raica rawa i me ona ga a vakarokoroko kei na kaukauwa ka sega ni mudu. Emeni. ¹⁷ Vakaroji ira a vutuniyau ina gauna i ei mera kakua ni dokadokai ira se vakararai i nai yau sa tawa tudei vua ga a Kalou bula, ko koya sa solia vakalevu vei keta a meca taucoko eta marau kina. ¹⁸ Vakaroji ira mera caka vinaka, mera vutuniyau ena cakacaka vinaka, mera lomasoli, mera dau veivuke. ¹⁹ Mera binia tu me odra a yavu ena yaga ina gauna i muri mai, mera taura kina a bula soli jina. ²⁰ I Timoci, mo taura matua a meca sa soli vei iko ka lesu tani mai na dautalanoa ca ka sega ni yaga, kei na i vakavuvuli tani sa vakatokai vakaidai me vuku. ²¹ Ni ra kaya eso ni ra sa vakajinata, a ra sa cola i na vakabauta. Me omu a loloma. Emeni.