¹ Ena vuku ni kai ei au sa vakarota kina, me vala mada i mada a masumasu, a kerekere, a veimasulaki, a vakavinavinaka ina vukudra a tamata taucoko. ² Ina vukudra a tui kei ira taucoko era turaga: meta jiko vinaka kina ka vakacegu meta ia ai valavala taucoko sa vakalotu ka kilikili. ³ Sa dodonu kai ei ka vinaka talega ina mata ni Kalou a weta i vakabauta. ⁴ Ko koya sa vinakata mera bula a tamata taucoko ka mai kila sara ai vakavuvuli jina. ⁵ Ni sa duabauga a Kalou, ka duabauga a dauveisorovaki ena maliwa ni Kalou kei ira a tamata, io, a tamata ko Jisu Karisito. ⁶ Ko koya sa soli Koya me kedra i voli a tamata taucoko, a ka me kai yani ina kena gauna. ⁷ Ia nai naki i ei kau a lesi kina meu dauvunautakina meui kena i apositolo talega, (au sa vosa jina, au tawa dai) meu odra i vakavuvuli a veimatanitu ina vakabauta kei na vakavuvuli jina. ⁸ O koya i ei au sa vinakata mera masu a tagane ena veiyasana taucoko, ka laveta cake a ligadra savasava ka sega kina a burisi kei na veiba. ⁹ Mera vakaisulu vaka talega kina ko ira a yalewa i nai sulu e rakorako ni ra sa loloma ka yalomatua, me kakua ni tali a drau ni uludra, me kakua ni vakoula, se mataniciva, se vakaisulu talei. ¹⁰ Ia sa kilikili ga kei ira a yalewa era kaya ni ra sa lotu ka dau volavola vinaka. ¹¹ Me jikolo a yalewa ka me vakavulici, ka vakamalumalumutakini koya vakalevu. ¹² Ia au sa sega ni laiva a yalewa me i vakavuvuli se viavialevu vei koya a tagane, ka me jikolo ga. ¹³ Ni a buli ki mada ko Atama ka qai muri ko Ivi. ¹⁴ Ka tawa temaki i mada ko Atama, a yalewa ga sa temaki, ka sa talaidredre kina. ¹⁵ Ia ena vakabulai ni sa vakasucu gone, kevaka era sa tudei ina vakabula, kei na loloma, kei na yalosavasava, kei na yalomatua.