¹ Koi au ko Paula ai apositolo i Jisu Karisito me vaka ai vakaro ni Kalou a weta i vakabula kei na weta Turaga ko Jisu Karisito a vuni weta nuinui. ² Vei Timoci, a luvequ jina ena vakabauta, me omu a loloma, a yalololoma, a vakacegu mai vua a Kalou ko Tamada, kei a weta Karisito Jisu. ³ Me vaka kau a vakamasuji iko niu a lako mai ki Masitonia mo jiko ga mai Efeso, mo rawa ni vakaroji ira kina eso mera kakua ni vakavulica ai vakavuvuli tani. ⁴ Mera kakua talega ni vakajinata ai tukutuku wale kei nai vola ni tuva kawa. Sa tubu kina a veiba ka sega ni vuki ira mera bula ina bula ni vakabauta a Kalou. ⁵ Ia a ka sa nakiji i nai vakaro a loloma mai na yalosavasava kei na lewa e loma vinaka kei na vakabauta e jina. ⁶ A ra sa cala kina eso ka vuki tani mai na veika vaka i ei ki na veivosaki vakalialia . ⁷ Era sa vinakata mera vuni-vunau, a ra sa tawa kila a meca e ra dau kaya se a meca era sa dou vakajinajina kina. ⁸ Ia eda sa kila ni sa vinaka a vunau ke vaka sa muria a tamata me vaka a kenai valavala. ⁹ Nita sa kila a meca i ei ni vunau e a sega ni vala me baleji ira a tamata yalododonu, vei ira ga era sa tawa muria ai vunau, ka dau talaidredre, kei ira era sa tawa lotu, era sa dau i valavalaca vei ira era sa tawa yalosavasava, a ra sa vakasisila ga: vei ira era sa labata a tamadra se jinadra, a ra sa dauveiraravui. ¹⁰ Vei ira era sa daudara, vei ira era dau veimoceri vakatagane, vei ira era sa dau driva tamata, vei ira era sa dau daidai, vei ira era sa daububului vakaidai kei na ka tani kecega sa tawa vaka ai vakavuvuli vinaka. ¹¹ Ai vakasala i ei ai tukutuku vinaka vakaijina i Koya a Kalou daumaka, kau sa lesi kina me'u vunautakina. ¹² Au sa vakavinavinatakini Karisito Jisu aweta Turaga o Koya sa vakaukauwatakini au, ni sa nanumi au niu sa loma jina a sa lesi au kina cakacaka vakaitalatala. ¹³ Koi au mada a dauvosavakacaca, kei na dau vakacaca, kei na dau vakasewesewani, ia au sa lomani niu a valata ena lialia kei na tawa vakabauta. ¹⁴ Ia ka uasivi cake sara a loloma ni weta Turaga, ka au a vakabauji Karisito Jisu kina, ka lomana. ¹⁵ Sa jina a vosa ka sa yaga me vakabauji vakalevu, ni sa lako mai ki vuravura ko Jisu Karisito me vakabulai ira a tamata i valavala ca: koi au, au sa masu cake vei ira. ¹⁶ Ia ena vuku ga ni ka i ei, kau a lomani kina, me vakaraitakina ko Jisu Karisito vei au ni sa uasivi cake a vosota vakalevu sara, meu i vakarau vei ira era sa vakabauji Koya e muri mera bula tawamudu. ¹⁷ I ei vei koya a tui tawa mudu, sa tawa mate rawa, sa tawa rairai, a Kalou vuku duaduaga me ia a vakarokoroko kei na vakadokodokai ka tawa mudu. Emeni. ¹⁸ Ai vakaro i ei au sa solia vei iko na luvequ, Timoci, me vaka a parofisai ka tukuni e liu vei iko, mo ia jiko kina a i valu vinaka. ¹⁹ Mo taura matua a vakabauta kei na lewa-e loma vinaka: oqori era sa biuta eso, a sa kasa kina a odra vakabauta ka mate. ²⁰ Sa vaka i ei ko Imeneo kei Alekisada, koi rau sa solia vei Setani me rau kila kina me rau kakua ni dauvosavakacaca.