¹ Ni devu na vikwa i kwe, qu qai daniya e kanikiya tale na agilosi e labale mai lomalagi, e levu na leya kaikai, e vakakaramataki niya o vuravura i na leya I ukuuku. ² E coco i na domo levu sara e kiya, e kwaya e vou lutu bale o papiloni na rara levu, e vou lutu e vou yaco me ledru I nono na rutu, me ledru qwara na yalo velavela taucoko eru dukaduka eru lai burati. ³ Eru lutu na vivanuwa taucoko eru somiya na waini ni oca ni leya dauteigwane, eru vidriva qai nidru na tui vuravura, aru vou vutuniyau ke na tamata dauvivoli ena vuku ni leya garogaro. ⁴ Aqu qai varogo e kanikiya tale na tata mai lomalagi, e kwaya," mutu ladei mai vuwa, o mutou na lequ tamata, me mutu kuwa ni cala qai niya, me kuwa ni tauviko mutou ke na leya mate bura. ⁵ Ni vou yacoviya o lomalagi na leya i varau bura, ni vo numiya lai varau bur ana Kalou. ⁶ Mutu ocajiya me kodaki leya ocajiko mutou, mutu vaveya vayaruwa vuwa me kodaki na leya i varau: ia na bilo eya vavuqaniya o kiya, vavuqa niya varuwa vuwa. ⁷ Me kodaki na leya dau dokaiya, kei na leya daugarogaro, soliya kodaki ke vuwa na yaluma qainiya na rarawa: ni kwaya e yelo o kiya; o yau na ranadi qu nokoto i kei, qu tasi yada, qu na tasi kilajiya na rarawa. ⁸ O kiya ikwe ena yaco vata ke vuwa na mate bura ena kiya na siga, na mate, qai niya na tagi, qainiya na dausiga; ia ena tavu ena buka-waqa, ni vou kaikai na Kalou ena ocajiya. ⁹ Ia o rau na tui I vuravura kei vuravura, eru dau vidriva qainiya, eru daugarosa qainiya, eru na tagicaki niya, eru na yasovaki niya, niru na daniya na i kulukulu ni leya yagi. ¹⁰ Aru na vou tu vayawa niru matakuciya na leya yaluma ni kwaya; Isa ! Isa na rara levu o papiloni, na rara kaikai igi, ena kiya ga kiya ga na yauwa, e yaco ke na lemu lai ocaji. ¹¹ O rau talega na dauvivoli I vuravura eru na tagi eru na yasovaki niya ni vou jikai na tamata me voliya tale na ledru i yau: ¹² Nai yau ni vivoli na koula, na siliva, na vatu talei, na matani-civa, qai niya na laineni matai - yalovi qai niya na kwa lokaloka, na silika, nai sulu kulakula qai niya na kai garu oka taucoko, qai niya na bilo tabuwa qai niya na bilo kai dredrei, na parasa , na aironi, qai niya na vatu vivolavolai. ¹³ Qai niya na sinamoni, na macou, na kwa garu oka va waiwai, na drega me lete, na waini, na madrai droka oka, na witi, na bulumakau, na sipi, na ose, na qiqi ni tamata, qai nidru na bobula, qai niya na yalo ni tamata. ¹⁴ Ia na vuwata e okajiya mu yaloga e vou, lavele, ona tasi daniya tale. ¹⁵ Na tamata eru dauvoliya na vi-kwa ikwe, eru vavutuniya taki mai vuwa, eru na tu vayawa niru matakuciya na leya yaluma, eru na tagi ka yaso. ¹⁶ Eru kwaya: Isa ! Isa, na rara levu l igi! e dua vaisulu i na laineni mataiyalai, qai niya nai sulu lokaloka, qai niya nai sulu kulakula, qai vaiukuuku i na koula, qai niya na vatu dredrei, qai niya na Mata-ni-civa! ¹⁷ A vou vaqeyavutaki na kwa taucoko ikwe i na kiya ga na yauwa o rau taucoko nai taukei ni waqa, qai nidru na lewe ni waqa o rau taucoko na dausoko meru vovoli, eru no vayawa. ^{18 20} Eru vou daniya na kulukulu ni keya yagi, eru kula eru kwaya, na rara levu cava eru na bara tautauvata qai niya na rara levu i kwe? ¹⁹ Aru kaburaki niya eru uiu na kavu ni qwele, eru kwaya Isa ! Isa! na rara levu igi! eru vavutuniyau taki ke o rau nai taukei ni waqa eru soko tu e yaloga ni wasawasaena vuku ni leya kwa vaturaga! e vo vaqeyavutaki ena kiya ga na yauwa.