¹ O au O paula qei nia o Timoci, o maru na lea i talatala o Karisito Jisu, vua dru na vo lotu mai Filipai, qai nidru na no qanea o Jisu Karisito qai nidru nai talatala qai nidru na tuirara. ² Me lemutou na loloma na vacegu mai vua na ledu turaga o Jisu Karisito. ³ A qu vaokaoka vua na lequ Kalou na gauna taucoko qu dau numiko mutou ke, ⁴ na visiga taucoko, na lequ masu taucoko, qu masulaki ni ko mutou i na marau ⁵ ni mutu volomavata tu i nai tukutuku oka mai nai tekitekivu qai yacovia mai na siga nikua. ⁶ Io na kwa ikwe qu vo vadjinadjina sara, o kia tekivu nia na cakacaka oka mutu yalo me yacovia mai na siga i Jisu Karisito. ⁷ E dodonu mequ numiko mutou ni mutu vo notu lequ vakasama. Ni mutu vo rewajia voko au na loloma voko mutou taucoko balejia ni mutu vo vesu tu ni mutu tokonia vadjinadjinataki nia na i tukutuku oka. ⁸ Ni vo kilajia na Kalou, ni qu vo lomaniko mutou taucoko sara lea loloma o Jisu Karisito. ⁹ Io na kwa ikwe qu kerevia: me tubu cake valevu na lemutu loloma na vuku qeinia na lewa oka taucoko, ¹⁰ Me mutu okajia sara na kwa e oka sara, mutu yalo djina me kua ni cala me yaco mai la siga na Karisito, ¹¹ A qu vo masu ni mutu na tawania na vua ni yalododonu e a lamai vo Jisu Karisito na vaokaoka qai nia na masu vua na Kalou. ¹² A qu okajia me mutu kilajia, o wekaqu na kwa e dereiko au ni vo tubu cake na i tukutuku oka na kwa balejiko au. ¹³ Na kea i varautaki, na lequ vesu e vuku o Karisito vuadru taucoko na sojia la were tui qai nidru ka vo. ¹⁴ A ru vo levu o rau o datou a ru no vata qea na Turaga a ru vagugu mai niqu vo vesu tu, o keya a ru tasi mataku ke meru kwa na tata ni Kalou. ¹⁵ E djina ga e yavalu e ru vunautaki nia na Karisito e ru yavalu eru yalo bura, e ru viqaji eru yavalu muni e ru yalo oka. ¹⁶ A ru dau vunautaki nia o Karisito, a ru dau vileji e jikai e ru yalo djina, a ru nakijia me vaikuritaki na lequ vesu. ¹⁷ E ru yavalu i na loloma a ru vo kilajia a qu vo lesi mequ to takinia na i tukutuku ni Kalou. ¹⁸ Qai cava? e jikai ni oka se jikai ni djina, ru giri e vo vunautaki na Karisito, Io, o Au qu na reki takinia no ga, ¹⁹ A qu vo kilajia e yaco na kwa mequ cola ke e vuku na lemutu masu qei nia na solisoli ni yalo i Jisu Karisito. ²⁰ E kodaki na kwa qu wacia a nuitakinia mequ kua ni madua ke, e kia na kwa mequ boleia sara, me kodaki i mata me kodaki ni kua, me valevu o Karisito na lea cola se la mate. ²¹ O keya na Karisito a qu cola ke na kwa oka kodaki qu vo mate. ²² Ke kodaki e vo yaco na lequ cakacaka. na cola va yago ikwe A qu tasi kilajia na cava mequ djigitaki niya? ²³ Ni qu vo vakasamataki niya varua na kwa e rua. Qu okajia mequ la yaji me maru no vata o Karisito, o keya e oka sara, ²⁴ e yaga sara vuwako mutou mequ nokoto ga va yago. ²⁵ Ni qu vo va djinajia, qu na nokoto no ga mequ na no vata qai ni ko mutou taucoko, me tubu cake ke na marau ni vabaujia, ²⁶ me tubu na lemutu marautaki nia o Jisu karisito na gauna qu na lesu tale mai ke vuako mutou. ²⁷ Mutu vavea ga na kwa e dodonu kodaki me tukutku oka i Jisu Karisito, me qu varojiko mutou, me qu layaji se mequ nokoto no ga ikei ni mutu vo tudei ena yalovata gumatuwa na lomavata me tubu na vabaujia ni tukutuku oka. ²⁸ Mutu kuwa ni vamatakucia na tamata na kemutu meca. E na kia na kwa iqoi na i varaitaki vuadru ni ru na rusa, ia vuwakomutou na cola ni mai vua na Kalou. ²⁹ A vo soli vuwako mutou me balejia o Karisito e jikai boto me mutu vabaujia, me mutu vosojia talega na vikwa bura me balejia, ³⁰ ni vou lemutou na vivala mutu daniya vuwako yau, mutu vou varogo ni vo yaco vuwako yau ni kuwa.