27
1
Nyâyc đoomz njâu stayb-munh cloon munh côx taih sangv gwoangh tayx Zâu Yê-su.”
2
Nănh stiz songđ stayb Nănh ênz ninyh jaoz phunz Phi-latv quanz lub (tôngz zânx).” Yu-đa tayc (Congz-dlayc 1:18-19)
3
Woax zanyf, Yu-đa phătc Zâu Yê-su zuc tingc stoif, nănh seenz numđ munz stymz nzongf, songđ nzâyz woa stamx săpc lepz nyanh ninyh toiv phunz stayb-munh cloon munh côx.”
4
Nănh coong, “Yaz seenz longđ stoif gôh, wâyc zuc yaz maic max naih stoif nyăngz Munh bây Nănh zuc tingc stoif, nănh stiz tauz, dluyh pyenz mâyh, nâyx đomc dlayc, naih nhleenz tâuv queenđ tauv buz?”
5
Yu-đa quanyf woa stamx săpc lepz nyanh ănz woa gâyf paix pyau, songđ tyuv seetb cungh ngwoaic ninyh đyux clangz tayc.”
6
Stayb-munh lumc zoz nâyx đomc nyanh nzâyz taih yâuc lanh bux lanh coong, “Nâyx đomc six maif mengc nyăngz nyanh, blaz samđ, max tuz zaub cloon pungx hođ nyanh ănz nây gâyf paix pyau njaf đev.”
7
Nănh stiz songđ nzâyz nâyx đomc nyanh taih nongc maif ah tauh ta nib stangc nyăngz munh ah cuyb nib tâyc, nongc ayx pitc stingx munh nyăngz stâu jêmh.”
8
Wâyc năngđ nâyx, munh songđ hipđ woax tungđ jêmh hipđ ayx naih samđ nyăngz nib tâyc. Songđ hipđ taih tauv nâyx zanyf.”
9
Nâyx đomc dlayc seetb taih toix nzuf tâuc munh Yê-lê-mi coong nyăngz woac, Nănh stiz zoz stamx săpc lepz nyanh taih nongc tingc Nănh, âyz Y-sa-la-ên munh stunx zax taih, Nănh nyăngz zax hav tuz nâyx nec.”
10
Nongc maif ta nib stangc nyăngz munh ah tungđ nib tâyc, âyz Zâu bux yaz nyăngz woac ayx.” Phi-latv stămđ Yê-su (Makv 15:2-5; Lu-ca 23:3-5; Giăng 18:33-38)
11
Zâu Yê-su stâuđ yămz Phi-latv quanz cah đangc, Phi-latv quanz naic Nănh coong, “Mâyh zâyf ayx Yiu-thai munh nyăngz Hungh max? Zâu Yê-su tauz, zâyf lec, songđ năngđ mâyh coong nâyx gôh.”
12
Stayb-munh cloon munh côx cooux Nănh woax zanyf, Nănh max tauz.”
13
Phi-latv naic Nănh coong, “Nănh stiz cooux Mâyh nâyx đomc woac Mâyh max numđ mah?”
14
Nănh max tauz zâux ax tiny stăngv, Phi-latv seenz nyâyh ganc nzongf.” Phi-latv songđ jaoz Yê-su phunz munh tayx (Makv 15:6-15; Lu-ca 23:13-25; Giăng 18:39-19:16)
15
Muif nyăngv tauv quaix pyeenv mengc stêtz, Hungh pâuz naih gâyf pungx ah lanh yămz nzauh munh, âyz songx munh jođ oix nongc pungx laiv lanh.
16
Woax zanyf naih tauh stoif-munh bux hipđ ayx Ba-ra-ba. Hănđ six laiv lanh lauf pâyz nănh.”
17
Woax zanyf songx munh nzomf woa, Phi-latv naic, “Nyâuh oix nongc yaz pungx toix laiv tauh? Ba-ra-ba, mah six Yê-su munh hipđ ayx Njâuv Zâu woa Tauh?”
18
Wâyc zuc Phi-latv pâyz tuz songx munh hănđ Zâu Yê-su nzăngđ zoz nzâyz ninyh jaoz phunz nănh.”
19
Phi-latv quanz stâyv woa stămđ stoif tync woax zanyf, Phi-latv nyăngz au pungx woac taih bux nănh coong, “Max cuyb tongf tauv tauh pengh stymz nyăngz munh bex! Songđ wâyc yaz cumh bâuz naih bâyx njingc nzongf wâyc pooux tauv nâyx tauh ya munh yaz seenz numđ stauh nzongf.”
20
Stayb-munh cloon munh côx hox songx munh pungx Ba-ra-ba, bix tayx Zâu Yê-su.”
21
Phi-latv naic, nây iz lanh munh, nyâuh oix nongc yaz pungx laiv lanh? Nănh stiz tauz, pungx Ba-ra-ba.
22
Phi-latv năngx naic, ha nyâuh oix nongc yaz ayx laix ănz munh hipđ ayx Njâuv Zâu Yê-su woax Tauh? Nănh stiz tauz, zoz Nănh tingz jămz ănz săpc đăngc zax!”
23
Phi-latv năngx naic, ha Nănh ayx longđ toix laiv hungđ stoif yeh? Songx munh zâyf hamv năngx lub têx tymb, êu zoz Nănh ninyh tingz ănz săpc đăngc zax.”
24
Phi-latv quanz ănx mungv nănh aox max hingh songx munh, nănh songđ buôngh woangb songx munh lunc nzuf, nănh songđ zoz tungh buônh womz taih toongx songx munh cah đangc đaox puf yâuc coong, “Nâyx tauh munh zuc tayc six quaix tauv yaz đev, yeetx stong stoif six dluyh nyâuh cănh zuc đamz toongz năngx nzuf đev!”
25
Songx munh tinyh đoih songc ah zâux woac hamv coong, “Nâyx tauh munh nyăngz samđ, six dluyh buz cănh cloon buz nyăngz sây stunz đamz toongz nzuf.”
26
Phi-latv songđ pungx Ba-ra-ba, phunz nănh stiz, nănh songđ nongc pya bopc Zâu Yê-su tuz nzof nzăngđ jaoz phunz pengz nzâyz ninyh tingz ănz săpc đăngc zax.” Pengz jeetx pib Yê-su (Makv 15:16-20; Giăng 19:2-3)
27
Phi-latv nyăngz pengz ênz Zâu Yê-su nzac Hungh tync ninyh, nzof woax đomc pengz songđ taih wâyh Nănh.”
28
Nănh stiz zay Zâu Yê-su nyăngz gwuyz quav ayx quengx, songđ zoz ah byeenđ gwuyz đao stib pâyb ănz nănh.”
29
Yâuc nongc nzym saz ah nomz mouc đongx ănz Nănh nyăngz pyây, năngx zoz ah stynz lauđ tic queng tăpx ănz Nănh nyăngz byaoh puf phunz Nănh nzauf, songđ quâyc nzac Nănh nyăngz cah đangc ninyh yâuc coong, “Buz paix Yiu-thai munh nyăngz Hungh bex!”
30
Nănh stiz nzuv nzanh ănz nănh, yâuc nongc lauđ tic quengg bopc Nănh nyăngz pyây.”
31
Jeetx pib Nănh pac, songđ zay zoz gwuyz đao stib ayx queng, nzăngđ cănh zuz Nănh nyăngz gwuyz quav ănz nănh, nzof nzăngđ nzâyz Nănh ninyh tingz ănz săpc đăngc zax.” Yê-su zuc tingz ănz săpc đăngb zax (Makv 15:21-32; Lu-ca 23:26-43; Giăng 19:17-27)
32
Nănh stiz ênz Zâu Yê-su seetb ninyh gâyh woax stengv woax zanyf pongh ah lanh Sai-lin munh bux hipđ ayx Si-môn, Pengz songđ yac nănh đamz Zâu Yê-su nyăngz săpc đăngc zax ninyh.”
33
Ninyh tauv woax nomz tync bux hipđ ayx Gô-gô-tha, âyz six hipđ ayx pyây mo tync.”
34
Ninyh tauv woa, nănh stiz zoz tungh cuđ tyu stuib lou zanb ymz phunz Nănh hopb, Six Zâu Yê-su đopx stâyv mungv Nănh yâuc max hopb.”
35
Nănh stiz tingz Nănh ănz woa săpc đăngc zax tuz nzof, nzăngđ zoz Nănh nyăngz gwuyz taih ta jaox tinyh phunz.”
36
Nzof nănh stiz songđ stâyv woa leđ Nănh.”
37
Nzof Nănh woa pyây cah zâyc woax lepz bangz yâuc ja đăngc ănz woa coong, “Nâyx tauh six (Yiu-thai munh nyăngz Hungh Yê-su).
38
Woax zanyf nănh stiz năngx tingz cloon iz lanh stac munh ănz Zâu Yê-su nyăngz iz lepz cah synh, ah lanh yămz byaoh phanx, ah lanh yămz staix phanx.”
39
Quaix jau nyăngz munh muif lanh pib nănh bănx pyây yâuc coong,
40
“Mâyh coong mâyh hayh zeb tuz gâyf paix pyau quaiz, six pôz noib cah đangz Mâyh năngx hayh zâyv tuz săngh staox taih naz! Bix cănh Njâuv Mâyh mangc gôh stac, mâyh năngđ seenz zâyf Zâu Tênb-Hungh nyăngz Toonz bix nzac lâyc săpc đăngc zax taih mangc geh.”
41
Stayb-munh cloon nzaox gâyf stênx stengb, cloon munh côx tinyh đoih pib Nănh coong,
42
“Nănh hayh Njâuv tuz munh, six max cănh hayh Njâuv tuz Nănh! Mâyh năngđ seenz zâyf ayx Y-sa-la-ên munh nyăngz Hungh bix nâyx zanyf đanyz nzac lâyc săpc đăngc zax taih phunz buz mangc, buz nzăngđ zeen Mâyh.”
43
Nănh Coouv Tênb-Hungh, Nănh yâuc cănh zanyb Nănh ayx Tênb-Hungh nyăngz Sây, ha pănh zu mangc jađ, Zâu Tênb-Hungh seenz taih Njâuv Nănh mah max taih.”
44
Njynh cloon tingz yămz Nănh woa cah synh woax đomc stac munh lauf tinyh đoih pib Nănh tinyh năngđ.” Yê-su tayc nzof (Makv 15:33-41; Lu-ca 23:44-49; Giăng 28-30)
45
Tăng joz săngx huđ, tauv đuh săngx huđ, njynh lomc săngh nomz stâyz phangz nzămc mengh nzuf.”
46
Tauv cox pôz săngx huđ cayx nzămc, Zâu Yê-su hamv coong, “Ê-li, Ê-li, La-makv-ta-ni, âyz gâyf six coong yaz nyăngz Tênb-Hungh lex! Yaz nyăngz Tênb-Hungh lex! Săngh laix Mâyh bix quanyf yaz?”
47
Naih ah đomc munh stâuđ woa numđ nănh hamv songđ lanh bux lanh coong, “Mungv geh! Nănh êu Ê-li.”
48
Nănh stiz woax đomc munh naih ah lanh coonx tyuv ninyh zoz cah đâyv maoh yomf ănz tungh cuđ tyu stuib, zoz lauđ tic queng tipb yăngf clôc phunz Zâu Yê-su hopb.”
49
Yămz woa naih ah phanx coong, “Gâyv zengx, “Pănh zu mangc jađ Ê-li seenz taih Njâuv Nănh max taih.”
50
Zâu Yê-su zâyf hamv ah stingb năngx lub têx tymb, nzăngđ siv seetc.”
51
Woax zanyf, woa gâyf paix pyau woax lepz pongz jengh buyx tăng cah byaif ayx săngh iz phanx nzac mungh toongx ninyh tăng cah zâyc tauv cah đi nib, nzof nib yâuc đănz tongf tuz njauz pyây bengb nzuf.”
52
Stâu jengh yâuc toc bengb, Tênb-Hungh nyăngz đăngb zengh pec stingx tayc blătc lauh năngx săngh phunb stengb taih nyoongz quef stâuđ woa zu.”
53
Tauv Zâu Yê-su săngh phunb stengb taih woax zanyf, nănh stiz songđ tuz seetb ninyh gâyh woa stâu tync, nzac đăngb zengh nyăngz tync ninyh, yâuc hynđ yangh seetb taih phunz munh đungx phătc nănh stiz.”
54
Pengz pyây cloon nănh nyăngz pengz yămz woa zu mangc Zâu Yê-su phătc gungh nib đănz tongf, nănh stiz cumh nzav, songđ coong lâyc tauh ya seenz zâyf Zâu Tênb-Hungh nyăngz Sây gôh.”
55
Tăng Ga-li-lê stengv taih lêpc Zâu Yê-su bokc dlic Nănh woax đomc munh nzif naih munh đungx stâuđ woa gâyh max côz max stătx zu mangc Nănh.”
56
Woax đomc munh nzif naih cloon yămz Ma-đô-len muôngf woax đomc munh nzif, six Ma-li-ya, cloon Gia-cơ, cloon Yô-sepv nyăngz nzif Ma-li-ya. Năngx cloon Sê-bê-đi iz lanh toonz nyăngz nzif.” Nănh stiz plopx (mokb) Yê-su (Makv 15:42-47; Lu-ca 23:50-56; Giăng 19:38-42)
57
Tauv cayx nzămc, naih ah lanh Puv quâyx nyăngz munh gunx taih, nănh nyăngz bux hipđ ayx Yô-sepv, nănh six yămz A-li-ma-ti stâyz phangz. Nănh lauf săngh Zâu Yê-su nyăngz stâyb-sây.
58
Nănh ninyh jođ Phi-latv zoz Zâu Yê-su nyăngz stynb stayđ, Phi-latv songđ goib nzeetx jaoz Zâu Yê-su nyăngz stynb stayđ phunz nănh.”
59
Yô-sepv songđ nongc săngb đôc buyx pêuz Zâu Yê-su nyăngz stynb stayđ.”
60
Nzâyz ninyh zaub ănz nănh nyăngz săngb stâu ngamh. Zaub tuz nănh pluiz ah nomz njauz pyây lauf pongz woa stâu jengh, nzof nzăngđ muf pyau.”
61
Yămz Ma-đơ-len, woax tauh Ma-li-ya, năngx cloon pitc tauh Ma-li-ya stâyv woa wynb mynb quaix stâu woax phanx muf mangc.” Pengz zu stâu
62
Nyâyc noib six tauv bênc quaix pyeenv mengc stêtz nyăngz noib, stayb-munh cloon Pha-li-si munh ninyh pongh Phi-latv.”
63
Nănh stiz coong, “Tah lex! Buz săngx tauv lôx noib jaf munh woax tauh ya munh, Nănh max zengx tayc woax zanyf nănh coong, “Yaz tayc blătc pôz noib quaix đangz yaz năngx săngh phunb stengb taih.”
64
Buz jođ mâyh êu pengz ninyh zu woa stâu caux pôz năngx gongx, năngđ max zu năngx gongx têx, nănh nyăngz stâyb-sây buz ninyh nymc zoz Nănh nyăngz stynb stayđ nzâyz ninyh nzof zâyf jaf lănv coong Nănh săngh phunb stengb taih nzof gôh naz, tauv woax zanyf zâyf năngx huđ têx cah đangc woax hâyđ tymb đev.”
65
Phi-latv tauz coong, “nyâuh naih pengz bix cănh êu ninyh zu năngx gongx geh!”
66
Nănh stiz songđ ninyh tăpb yeenx ănz woa stâu jengh, songđ êu pengz poc woa zu.” Yê-su săngh phunb stengb taih (Makv 16:1-10; Lu-ca 24:1-12; Giăng 20:1-10)