25 ¹ Woax zanyf, Tênb-toongh Côkz six năngđ săpc lanh munh sab zengx, nzauf toongz seetb ninyh stipx săngb langh.” ² Woax đomc munh sab naih pyaz lanh oongx, pyaz lanh lemđ. ³ Woax đomc oongx nzâyz toongz ninyh yâuc max pâyz nzâyz cloon yâuh buôngh.” ⁴ Woax đomc lemđ. Nzâyz toongz ninyh yâuc nzâyz cloon yâuh ninyh buôngh.” ⁵ Zu lauh max phătc săngb langh taih tauv, nănh stiz tinyh đoih ngoc mâyc njoomh mâyc nyuiv nzuf, songđ taux woa mâyc njoomh đanyh nzuf.” ⁶ Tauv đămx munf quaix, naih stingb hamv coong săngb langh taih tauv nzof! Seetb taih stipx gôh.” ⁷ Woax đomc munh sab đyub taih zany nănh stiz nyăngz toongz.” ⁸ Woax đomc oongx coong ănz woax đomc lemđ, jođ nyâuh tanb tikx cay yâuh phunz buz jađ! Buz nyăngz toongz yâuh gaib cayx tayc gôh.” ⁹ Woax đomc lemđ tauz coong, “Maiv phunz tuz đêh, cumh nzav max naih yâuh caux phunz cloon nyâuh nongc, nyâuh bix cănh ninyh woa maic yâuh tync maif.” ¹⁰ Woax zanyf nănh stiz nzăngđ seetb ninyh maif yâuh, tăng coonz bênc bênc woax đomc munh sab, songđ tuz cloon săngb langh nzac hynh nhlync năngv, nzof jengh yâuc quanz nzuf.” ¹¹ Quaix đangz woax đomc munh sab ninyh zoz yâuh phunb đangz lauf tauv êu coong, “Zâu lex! Coib jengh phunz buz đôih.” ¹² Six nănh stiz tauz coong, “Yaz coong seenz bux nyâuh, Yaz max pâyz tuz nyâuh đomc munh sab six toix mănv.” ¹³ Năngđ naz, nyâuh six zuc canyz nyâuđ zu, songđ wâyc nyâuh max pâyz tuz toix laiv noib laiv săngx huđ yaz taih tauv.” Pôz lanh pâuz nyăngz woac pây (Lu-ca 19:11-27) ¹⁴ Tênb-toongh Côkz six năngđ ah lanh munh seetb jau ninyh côz-côz ha, nănh êu nănh nyăngz pâuz taih jaoz nănh nyăngz jax toongx phunz nănh stiz cun.” ¹⁵ Pyau Zâu jaoz phunz ah lanh pyaz panc, ah lanh iz, ah lanh ah. âyz nănh stiz nyăngz caz năngh. Nzof nănh songđ seetb jau ninyh.” ¹⁶ Tuz stipx pyaz panc woax lanh lênh dlih seetb ninyh ayx stanyb âyx, tuz gâyc pyaz panc.” ¹⁷ Tuz stipx iz panc woax lanh lauf seetb ninyh ayx tuz gâyc iz panc.” ¹⁸ Tuz stipx ah panc woax lanh ya, nănh zoz stab mynb buyx pêuz, wêtz cotb plopx Zâu nyăngz nyanh.” ¹⁹ Blătc quaix đangz lauh, Zâu lauf tym mangc pâuz buz nyăngz zaix tanz.” ²⁰ Tuz pyaz panc woax lanh, nănh yâuc năngx nzâyz cloon woa pyaz panc nyanh gâyc taih pâu phunz nănh nyăngz Zâu yâuc coong, “Zâu lex! Mâyh phunz yaz woa pyaz panc, yaz năngx ninyh ayx tuz gâyc pyaz panc pâu.” ²¹ Nănh nyăngz Zâu tanv coong, “Gongx gôh! Mâyh seenz nyâuđ zanyx yâuc (zangh) nyăngz pâuz, tikx cay tix ănz stêu dlayc, mâyh seenz hayh ayx tuz gongx nâyx, Zâu tanv nănh coong mâyh seenz nyâuđ zanyx nyăngz pâuz, yaz oix phunz mâyh cun dlayc năngx lub têx, nzac taih cloon yaz hônb-hiđ gôh.” ²² Tuz stipx iz panc woax tauh pâuz nzac taih bux coong, “Zâu lex! Nhlex! Mâyh phunz yaz woa iz panc stynh, yaz nzâyz ninyh ayx tuz gâyc iz panc.” ²³ Nănh nyăngz Zâu tanv nănh coong, “Gongx gôh! Mâyh seenz nyâuđ zanyx yâuc zangh nyăngz pâuz. Tikx cay tix ănz stêu dlayc, mâyh seenz hayh ayx tuz gongx nâyx, yaz oix phunz mâyh cun năngx đungx têx, nzac taih cloon yaz yămz nây hônb-hiđ gôh.” ²⁴ Tuz stipx ah panc woax tauh lauf nzac taih coong, “Zâu lex! Yaz pâyz tuz mâyh max sămv mănv, mâyh max nzuf jab songx mâyh yâuc tuz Quănf, max zâuđ ănz nhlimb yâuc tuz sâub.” ²⁵ Yaz numđ cumh nzav songđ wêtz cotb plopx (mokb) Mâyh nyăngz nyanh, nhlex! Nây six mâyh nyăngz nyanh.” ²⁶ Nănh nyăngz Zâu coong, “Mâyh lâyc tauh ya nyâuđ huđ yâuc lâyc nzongf nyăngz pâuz! Mâyh pâyz tuz yaz max nzuf jab songx yâuc tuz quănf, max zâuđ ănz nhlimb yâuc tuz sâub.” ²⁷ Năngđ naz gâyf hođ mâyh zuc nzâyz yaz nâyx đomc nyanh ninyh ănz woa nyanh coh, yaz nzăngđ tuz nyanh coonz, yâuc tuz cloon nyanh gâyc.” ²⁸ Zoz nănh woax đomc nyanh nzâyz ninyh pâu phunz woax lanh naih săpc panc.” ²⁹ Songđ wâyc laiv lanh naih six tuz pâu năngx đungx têx, ayx tuz nănh naih nongc yăngc, woax lanh max naih, nănh hănđ naih ah tix yâuc zuc zoz ninyh nzuf.” ³⁰ Zoz lâyc tauh max tongh yangc nyăngz pâuz, nzâyz ninyh quanyf ănz woa cungh ngwoaic njih nzămc jêmh, phunz nănh yămz woa pungx stingb haoh.” Muif stingx munh zuc bamh munh nyăngz toonz tingc stoif ³¹ Tauv yaz bamh munh nyăngz Toonz hynđ seetb taih woax zanyf, six naih cloon yeetx stong Stynz-munh lêpc Nănh nzac taih, Nănh yâuc ayx Hungh stâyv Nănh gwăngz-eng nyăngz tync cah njaf.” ³² Muif stingx đâuf munh six căpx dlonf taih yămz Nănh nyăngz cah đangc, Nănh songđ phunz gâyh ayx iz đomc, cayx năngđ zu yungh nyăngz munh phunz gâyh nănh nyăngz yungh cloon pa-jiz yungh nâyx.” ³³ Nănh six phunz pa-jiz yungh yămz byaoh phanx, yungh yămz staix phanx.” ³⁴ Tauv woax zanyf Hungh nzăngđ bux yămz byaoh phanx woax đomc coong, “Tuz yaz nyăngz Pha sađ pôz phunz nyăngz munh lex! Nzac taih stipx Tênb-toongh Côkz gôh, nâyx nomz Côkz six tăng cah lof zaoc gungh nib bênc săngh nâyx nomz Côkz njâuh phunz nyâuh.” ³⁵ Songđ wâyc yaz nyâuđ sab nyâuh yâuc phunz nănngv yaz nhlync, yaz nyâuđ gatb nyâuh yâuc phunz womz yaz hopb, yaz săngh munh njingc munh clăngv jau nyâuh yâuc stipx yaz nzac pyau.” ³⁶ Yaz max naih gwuyz quav zuz, nyâuh yâuc phunz yaz zuz, yaz săngh gumc nyâuh yâuc ninyh têx yaz, yaz zuc yămz nzauh nyâuh lauf ninyh tex yaz.” ³⁷ Woax đomc pengh stymz nyăngz munh tauz coong, “Zâu lex! Buz naih laiv zanyf phătc Mâyh nyâuđ sab bix phunz năngv Mâyh nhlync? Laiv zanyf phătc Mâyh nyâuđ gatb yâuc phunz womz Mâyh hopb?” ³⁸ Laiv zanyf phătc Mâyh săngh munh njingc yâuc stipx Mâyh nzac pyau? Laiv zanyf phătc mâyh max naih gwuyz quav zuz yâuc phunz Mâyh zuz?” ³⁹ Laiv zanyf phătc mâyh săngh gumc mah six phătc mâyh zuc yămz nzauh buz bix ninyh tex Mâyh yeh?” ⁴⁰ Hungh tauz coong, “Yaz coong bux nyâuh, tinyh phanv nyâuh ayx phunz yaz nyăngz yâuf pez jeenz quaix woax tauh six năngđ ayx phunz yaz gôh.” ⁴¹ Nzof nănh bux yămz staix phanx woax đomc munh coong, “Nyâuh đomc zuc zaux nyăngz munh lex! Tyuv gâyh yaz zef gôh, ninyh nzac bênc săngh phunz manđ hungh cloon nănh nyăngz pâuz yămz stâyv quâyx max hayh tayc nyăngz tâuf coiđ.” ⁴² Songđ wâyc yaz nyâuđ sab nyâuh yâuc max phunz năngv yaz nhlync, yaz nyâuđ gatb nyâuh yâuc max phunz womz yaz hopb.” ⁴³ Yaz săngh munh njingc clăngv jau nyâuh yâuc max stipx yaz nzac pyau, yaz max naih gwuyz quav zuz nyâuh yâuc max phunz yaz zuz, yaz săngh gumc mah six zuc yămz nzauh nyâuh yâuc max ninyh tex yaz.” ⁴⁴ Nănh stiz tauz coong, “Zâu lex! Toix laiv zanyf buz phătc mâyh nyâuđ sab buz bix max phunz Mâyh nhlync? Phătc nyâuđ gatb, mah six phătc mâyh săngh munh njingc, mah six phătc Mâyh max naih zuz, mah six săngh gumc, mah six phătc mâyh zuc yămz nzauh buz bix max ninyh tex Mâyh yeh?” ⁴⁵ Nănh tauz coong, “Yaz coong seenz bux nyâuh, nyâuh max stăngc tuz nâyx đomc ah lanh jeenz quaix yaz nyăngz yâuf pez, six nyâuh lauf max stăngc ayx tuz lungđ phunz yaz đêh.” ⁴⁶ Woax đomc max pengh stymz six zuc ninyh yămz nănh stiz stâyv quâyx zuc tingc stoif nyăngz tync, six laiv đomc pengh stymz nyăngz munh songđ tuz stipx stâyv quâyx nyăngz mengc.” Munh ta zux ix tayx Yê-su (Makv 14:1-2; Lu-ca 22:1-2; Giăng 11:45-53)