¹ Zâu Yê-su nzaox nâyx đomc woac bux songx munh songf, Nănh songđ ninyh Ca-bê-na-um Muôngf.” ² Yămz woa naih ah lanh pengz pyây, Naih ah lanh nănh nyăngz Pâuz, Nănh seenz stăngz nzongf, Yâuc săngh gumc cayx tayc gôh.” ³ Nănh numđ munh lănv Zâu Yê-su ayx nyăngz dlayc, Nănh songđ êu tauh Yiu-Tai munh côx ninyh Stăngc jođ nănh taih Stăngc zany gumc phunz nănh nyăngz Pengz.” ⁴ Ninyh tauv woa pongh Zâu Yê-su, woax đomc munh côx seetb jab jođ nănh coong, “Nâyx tauh pengz pyây seenz payh tuz mâyh Stăngc Nănh.” ⁵ Nănh seenz Stăngz pănh Yiu-tai Munh nzongf, Nănh zâyv ah nomz Huyđ-toongh taih phunz pănh nef.” ⁶ Zâu Yê-su songđ lêpc nănh stiz ninyh, Nănh stiz ninyh gâyh nănh nyăngz nyau max côz, nâyx tauh pengz pyây paiđ nănh nyăngz toic ninyh bux Zâu Yê-su coong, “max nongc wâyb Zâu năngđ nâyx đêh, wâyc zuc Yaz max payh tuz stipx mâyh nzac yaz nyăngz pyau. ⁷ Wâyc nâyx yaz yâuc max payh tuz ninyh pongh mâyh, Jođ tah cungb coong seetb ah zâux woac cungv, Yaz nyăngz pâuz six tuz gumc gongx. ⁸ Yaz yâuc yămz pitc tauh pengz pyây nyăngz puf đi, nzof yaz lauf năngx Naih đungx tauh pengz yămz nyănggz puf đi.Yaz êu nâyx tauh ninyh, Nănh songđ ninyh, Yaz êu woax tauh taih nănh lauf taih, Yaz êu nănh stiz ayx laiv hungđ, Yaz êu ayx woa hungđ nănh stiz lauf ayx.” ⁹ Zâu Yê-su numđ nănh coong Nâyx, seenz numđ nyâyh ganc nzongf, Songđ wynb lauf coong bux lêpc Nănh ninyh woax đomc munh, Yaz coong bux nyâuh, Yaz max zengx phătc quaix laiv tauh zeen tuz gongx năngđ nâyx tauh đêh, njynh I-sa-la-ên munh ah tauh lauf max naih.” ¹⁰ Pengz pyây paiđ ninyh pongh Zâu Yê-su woax đomc munh phunb đangz lauf tauv pyau, songđ phătc woax tauh pâuz nyăngz gumc gongx nzuf nzof gôh.” ¹¹ Quaix đangz max lauh, Zâu Yê-su cloon nănh nyăngz stâyb-sây buz, Năngx cloon Munh đungx ninyh tauv nomz stengv, Bux hipđ ayx Na-in. ¹² Ninyh tauv Singh jengh, Nănh phătc ah peob Munh zengz ah tauh Munh bôf qua nyăngz sây tayc seetb ninyh, yâuc năngx naih Munh đungx stăngc zengz woax tauh munh bôf qua nyăngz sây tayc nyăngz pên, nănh cungb ah lanh đokc toonz. ¹³ Zâu mangc phătc woax tauh munh bôf qua, Nănh seenz numđ hâuđ lênh nzongf, songđ coong bux tah bôf coong, "Côx lex năngx gâyf haoh gôh.” ¹⁴ Coong nzuf, Zâu Yê-su ninyh laoz woa pên congz êu coong, “Nauf jeenz lex, Yaz êu mâyh nyoongz quef zef gôh. ¹⁵ Woax tauh munh tayc songđ săngh phunb stengb nyoongz quef stâyv woa coong woac, Zâu Yê-su songđ jaoz nâyx tauh nauf jeenz phunz tah bôf.” ¹⁶ Songx munh cumh nzav nzongf, Songđ tanv Tênb-Hungh coong, “Naih ah tauh lub nzongf nyăngz tâuc woac munh hynđ seetb taih yămz pănh mungh tongx congv. Yâuc coong, “Tênb-Hungh taih stăngc nănh nyăngz pec Stingx gôh.” ¹⁷ Nâyx đomc dlayc lănv pong Yu-đa Stâyz-phangz, Nzêux iz pôz nganc.” ¹⁸ Giăng nyăngz stâyb-sây buz lănv nâyx đomc dlayc phunz Giăng Mungv, Nănh songđ êuz nănh nyăngz iz lanh stâyb-sây taih. ¹⁹ Yâuc paiđ nănh stiz ninyh naic Zâu, Mâyh zâyf buz seenz zuc zu taih woax tauh max? mah six buz năngx zuc zu pitc tauh tymb? ²⁰ Nâyx đomc iz lanh munh ninyh pongh Zâu Sê-su Nănh stiz naic coong, “Giăng stăngc munh ayx quaix wơmz nyăngz Gâyf woax tauh paiđ buz taih naic mâyh, Mâyh six zâyf buz zu oix taih woa tauh, Mah six buz năngx zuc zu pitc tauh tymb?” ²¹ Woax zanyf toix zuc Zâu Yê-su jynh đangh zany gumc phunz Munh, Yâuc luiđ manđ seetb đungx lanh Munh, Yâuc zany munh mâyc buđ yâuc hayh mangc tuz phătc gwăngz. ²² Zâu Yê-su tauz Giăng paiđ ninyh nyăngz Munh, “nyâuh muf lănv nyâuh phătc nzuf, numđ nzuf nyăngz jau bux Giăng coong, “Munh mâyc buđ yâuc hayh mangc phătc jau, staux quac nyăngz munh yâuc hayh yăngh jau, Munh bah noomh đungz yâuc hayh mungv tuz numđ woac, Săngh maoh pongz gumc woax đomc lauf tuz zany gongx nzuf, munh tayc năngx tuz săngh phunb stengb taih. Munh zâuđ yâuc tuz numđ Cuđ-jeenx.” ²³ Pou phunz toix laiv tauh max nzêmh yaz nyăngz munh naih oonz loc.” ²⁴ Giăng paiđ ninyh woa iz lanh Munh phunb đangz muf blătc nzof, Zâu Yê-su nzăngđ lănv Giăng nyăngz jau phunz songx munh Mungv, Nănh lănv coong, “nyâuh cayx ninyh woa stâyz-phangz blănf mangc toix laiv lungđ? max zâyf cayx ninyh mangc zâyz lauđ tic queng zuc nzaox sâyđ tongf mah? ²⁵ Nyâuh năngx mangc toix lungđ tymb? Ninyh mangc tauh munh baox zuz Nhlêuf gwuyz mah? Max, Zuz Nhlêuf gwuyz woax tauh munh baox six yămz woa Hungh tync lêđ đêh!” ²⁶ Nyâuh seetb ninyh mangc toix lungđ? oix mangc tauh tâuc woac munh Mah? zâyf lec, Six nyâuh oix phătc woax tauh tâuc woac munh Giăng Nănh ayx năngx lub têx ah tauh tâuc woac munh đev. ²⁷ Wâyc zuc Canyx-Stâub naih woac ja lănv tauv Giăng coong, “Yaz six paiđ yaz nyăngz tâuc woac munh ninyh đangc, Bênc jau phunz sây.” ( Pây Mangc Ma-La-Zi 3:1-) ²⁸ Yaz coong seenz bux nyâuh, Stengb stâyv taih yămz nây Bamh canz nyăngz Munh, Giăng ayx năngx lub quaix muif lanh, Six yămz Tênb-Côkz ayx năngx jeenz quaix woax tauh, Nănh tuz ayx năngx lub têx Giăng.” ²⁹ Songx munh cloon Stăngc Lô-ma nzêuh Hungh Sâub-sôiv nyăngz munh Coouv Giăng ayx quaix womz nyăngz Gâyf woax đomc munh, Numđ lănv Zâu Yê-su nyăngz dlayc, Nănh stiz coong, “Tênb-Hungh seenz pengh Stymz gôh.” ³⁰ Six Pha-li-si Munh cloon nzaox Gâyf Stênx stengb nzêmh Tênb-Hungh nyăngz gâyf, wâyc zuc nănh stiz njăpf taih nyăngz zux ix max canx phunz Giăng stăngc nănh stiz ayx quaix womz nyăngz gâyf. ³¹ Blătc woa Zâu Yê-su năngx coong, “Yaz cayx nongc toix lungđ pây nâyx yeenv Stâyv munh? Nănh stiz pây năngđ toix lungđ? ³² Nănh stiz six pây năngđ nâyx yeenh stâyv munh sây, Stâyv woa caiz tauh, Nâyx peob êu woax peob coong, “Buz pyom blungh blex nyâuh yâuc max tyuh longc, Buz ayx plopx munh tayc nyăngz nzungz nyâuh yâuc max haoh.” ³³ Giăng ayx quaix womz woax tauh taih, Nănh njif max Nhlync nzu, max hopb tyu, nyâuh yâuc đeh coong, “Nănh blaz manđ. ³⁴ Yaz bamh munh nyăngz toonz taih Nhlync yâuc hopb, munh yâuc yônx coong, “Mangc geh! lâyc tauh ya Munh mauh Nhlync hopb bynz, yâuc cloon Sâub-sôiv Munh, cloon Stoif-munh ayx toic.” ³⁵ Six toix laiv tauh stipx Tênb-Hungh nyăngz Tongb-manyh munh yâuc pâyz tuz Tongb-manyh Six tăng Tênb-Hungh taih. ³⁶ Naih ah tauh Pha-li-si Munh êu Zâu Yê-su ninyh cloon nănh Nhlync năngv, Zâu Yê-su ninyh tauv nănh nyăngz pyau songđ stâyv* woa Nhlync năngv.” ³⁷ Woax nomz stengv naih ah tauh manyh tauh huđ nyăngz munh nzif, numđ lănv coong Zâu Yê-su yămz Pha-li-si Munh nyăngz pyau Nhlync năngv, nănh songđ zoz nomz pou tungh pengh ănz pong yâuh đangz nzâyz taih.” ³⁸ Ninyh stâuđ Zâu Yê-su nyăngz cah đangz, Yămz nănh nyăngz staux synh haoh bây mâyb womz nekx zuc Zâu nyăngz staux đoonz, songđ cănh nongc nănh nyăngz pyây đongz stotb tuz gaib, yâuc zoz yâuh đangz taox ănz Zâu Yê-su nyăngz staux.” ³⁹ Êu Zâu Yê-su taih nhlync năngv woax đomc Pha-li-si munh phătc năngđ nâyx, Songđ yămz nyâuđ nyâyh, Six coong Zâu Yê-su năngđ zâyf ayx tauh tâuc woac munh, nănh hopđ zuc pâyz lâyc tauh munh nzif six toix laiv tauh, Nănh six pênx toix lungđ munh, Nănh hopđ zuc pâyz lâyc tauh munh nzif taox yâuh đangz ănz nănh staux lâyc tauh six manyh yangh huđ nyăngz Munh.” ⁴⁰ Zâu Yê-su coong bux woax tauh Pha-li-si munh Si-môn coong, “Si-môn lex! Yaz naih ah zâux woac oix lănv bux mâyh, Si-môn tauz, “Stênx stengb lex! phanv coong geh! ⁴¹ Zâu Yê-su coong, “Naih iz lanh munh, Sămv ah lanh munh nyăngz zaix, naih ah lanh sămv ngâuf pez nomz tongh stynh, ah lanh sămv ngâuf săpc nomz. ⁴² Iz lanh njynh max naih lungđ clao zaix, Zaix Zâu songđ quanyf phunz nănh stiz iz lanh, Nây iz lanh toix laiv tauh stăngz zaix Zâu năngx đungx têx? ⁴³ Si-môn tauz, Sămv đungx woax tauh, Stăngz zaix Zâu năngx đungx têx, Zâu Yê-su tauz, “mâyh coong toix gôh. ⁴⁴ Zâu Yê-su wynb mangc woax tauh munh nzif năngx coong bux Si-môn, “Mâyh phătc lâyc tauh nunh nzif sta? Yaz nzac mâyh nyăngz pyau, Mâyh max phunz womz Yaz đaox staux, Six lâyc tauh munh nzif six năngx nongc nănh nyăngz mâyc womz đaox yaz nyăngz staux, yâuc cănh nongc nănh nyăngz pyây đongz stotb tuz gaib. ⁴⁵ Mâyh stipx yaz nzac mâyh nyăngz pyau, Mâyh max tomz yaz, Six lâyc tauh munh nzif tomz yaz nyăngz staux đev. ⁴⁶ Nzof mâyh yâuc max njămh yâuh đangz ănz yaz nyăngz pyây, Six lâyc tauh munh nzif njămh yâuh đangz ănz yaz nyăngz staux. ⁴⁷ Năngđ naz yaz bux mâyh, Nănh nyăngz stoif tăng laiv đungx yâuc tuz quanyf nzuf, Six wâyc zuc nănh stăngz yaz năngx đungx têx, Six toix laiv tauh stăngz yaz stoc, Six tuz suanyf Stoif stoc. ⁴⁸ Zâu Yê-su coong bux woax tauh munh nzif, Mâyh nyăngz stoif tuz quanyf nzuf nzof gôh, ⁴⁹ Songc hynh Nhlync năngv nyăngz munh lanh naic lanh, lâyc tauh munh six mănv bix hayh quanyf munh Stoif nâyv? ⁵⁰ Zâu Yê-su bux woax munh nzif, wâyc mâyh zeen yaz, Mâyh songđ tuz Njâuv, Mâyh pengh oonz muf gôh.”