¹ Mangc jađ! nzangc pha tăng laiv stăngz pănh! Nănh songđ phunz pănh tuz naih ah nomz bux hipđ ayx Tênb-Hungh nyăngz toonz sab, wâyc stâyv sangc munh max pâyz pănh, six wâyc stiz max pâyz Njâuv Zâu. ² Yaz stăngz nyăngz yâuf pez lex! Nâyx zanyf, pănh pênx Tênb-Hungh nyăngz toonz sab, đangz phanx pănh six năngđ laix nănh yâuc max zengx phunz pănh pâyz tuz yox, six pănh pâyz tauv Njâuv Zâu hynđ nzac taih woax zanyf, pănh songđ tuz năngđ nănh, nănh songđ phunz pănh phătc nănh seenz năngđ woa nâyx. ³ Njâuv Zâu six dlăngc đăngb zengh, laiv lanh naih njih mungc tync yămz nănh, six zuc leđ stynb năngx đăngb năngđ nănh. ⁴ Laiv lanh pamf stoif, six pamf Tênb-Hungh nyăngz Đoouc lif gâyf, wâyc zuc stoif six pamf Đoouc lif gâyf. ⁵ Nyâuh yâuc pâyz tuz Njâuv Zâu taih wâyc đaox pănh nyăngz stoif, nănh six max naih stoif nyăngz munh. ⁶ Laiv lanh cloon Njâuv Zâu songc mengc săngh, nănh six max hayh ninyh pamf stoif pâu, laiv lanh ninyh pamf stoif, woax tauh six max pâyz tuz Njâu Zâu six mănv. ⁷ Stăngz nyăngz munh sây lex! Năngx gâyf mungv laiv lanh jaf nyâuh ninyh longđ jau, Njâuv Zâu six ayx pengh stymz nyăngz munh. laiv lanh oix năngđ nănh six zuc ayx pengh stymz ⁸ Laiv lanh ninyh pamf stoif, six manđ nyăngz munh, wâyc zuc manđ Hungh tăng coonz pamf stoif tauv nâyx zanyf, wâyc năngđ nâyx Tênb-Hungh songđ phunz nănh nyăngz toonz nzac taih mêtc manđ Hungh ayx nyăngz cumh pâuz. ⁹ Laiv lanh ayx Tênb-Hungh nyăngz sây, songđ max njynh leox ninyh pamf stoif, wâyc zuc Tênb-Hungh nyăngz nhlimb yămz nănh nyâuđ, Tênb-Hungh ayx stiz nyăngz pha, stiz songđ max ninyh pamf stoif. ¹⁰ Pănh songđ hayh saz tuz laiv lanh ayx Tênb-Hungh sây, laiv lanh ayx manđ sây, laiv lanh max ayx stymz pengh, yâuc max stăngz nănh nyăngz yâuf pez, woax tauh six max zâyf ayx Tênb-Hungh nyăngz sây. ¹¹ Nyâuh tăng coonz numđ munh lănv quaix nâyx đomc woac six năngđ nâyx, lanh zuc stăngz lanh. ¹² Năngx gâyf ayx năngđ Ca-in nâyx, Ca-in six ayx huđ tayx nănh nyăngz yâuf, wâyc săngh laix Ca-in bix ayx nâyx? Wâyc nănh nyăngz yâuf ayx gongx, six nănh ayx huđ. ¹³ Yâuf pez lex! Six coong bamh canz munh hănđ nyâuh yâuf pez, nyâuh năngx gâyf nyâyh ganc. ¹⁴ Tinyh đoih pâyz tuz pănh naih tinyh stăngz, nzăngđ tuz gâyh đutb zuc tayc nyăngz jau, pănh songđ tuz tauv săngh mengc. mănv năngđ max naih tinyh stăngz six năngx yămz zuc tayc cah njaf. ¹⁵ Laiv lanh hănđ yâuf pez, woax tauh six tayx munh. Nyâuh yâuc pâyz tuz laiv lanh tayx munh, six max naih stâyv quâyx nyăngz mengc yămz woax lanh munh. ¹⁶ Pănh pâyz tuz seenz naih stăngz munh nyăngz nyâuđ six lungđ, Zâu Yê-su stăngz pănh, nănh songđ sez tuz nănh nyăngz mengc wâyc pănh. ¹⁷ Jangx pây ah lanh munh, max yêmv stayx nongc, yâuc mangc max phătc nănh nyăngz yâuf pez zâuđ, nănh yâuc tanyđ tuz max stăngc munh zâuđ, nănh ayx laix hayh coong, "nănh stăngz Tênb-Hungh ngeh? ¹⁸ Yaz stăngz nyăngz sây lex! Max zâyf cungb nongc nzeetx coong yaz stăngz munh, seenz zuc ayx cumh pâuz nzăngđ zâyf seenz stăngz munh. ¹⁹ Pănh pâyz tuz pănh songc seenz gâyf six năngđ laix, pănh songđ hayh tuz pungx stymz nănh nyăngz cah đangc. ²⁰ Six coong pănh nyăngz nyâuđ cănh tingc pănh naih stoif, pănh songđ cănh pâyz tuz Tênb-Hungh six năngx lub têx, nănh yâuc pâyz tuz nzuf pănh nyăngz stymz nyâuđ ayx muif hungđ. ²¹ Stăngz nyăngz pyeoz lex, six coong pănh nyâuđ năngđ max tingc pănh naih stoif, pănh songđ hayh tuz pungx stymz yămz Tênb-Hungh nyăngz cah đangc. ²² Pănh cayx jođ laiv hungđ, songđ tuz woax hungđ, wâyc zuc pănh âyz nănh nyăngz lanyf ayx, yâuc ayx tuz hopđ nănh stymz nyâuđ. ²³ Nây six Tênb-Hungh nyăngz lanyf, six pănh zeen nănh toonz, Njâuv Zâu Yê-su, lanh stăngz lanh, năngđ nănh nzônh phunz pănh nâyx. ²⁴ Laiv lanh ayx âyz Tênb-Hungh nyăngz lanyf, woax tauh songđ tuz Tênb-Hungh yămz nănh cah njaf. Wâyc zuc pănh tinyh đoih coouv Tênb-Hungh sađ singx lingh phunz pănh.