3 ¹ Nyâuh yămz Ga-la-ti nyăngz munh oongx lex! laiv lanh ayx papz jaf nyâuh yâuf pez nyâyh longđ? Yaz coong manyf Njâuv Zâu Yê-su tayc yămz săpc đăngc zax nyăngz jau phunz nyâuh năngđ cănh tuz mâyc phătc nâyx. ² Yaz oix nongc nyâuh yâuf pez bux yaz ah hungđ, nyâuh tuz stipx Singx-lingh six wâyc âyz đoouc-lif gâyf ayx mah six? max zâyf đêh! Nyâuh tuz stipx Singx-lingh six nyâuh tuz numđ Cub jeenx lêc. ³ Nyâuh yâuf pez seenz oongx nzongf! Quef coonz nyâuh coouv Njâuv Zâu nyăngz Singx-lingh ayx cumh pâuz, six nâyx zanyf nyâuh nongc bamh munh nyăngz zux ix ayx tuz săngh laiv hungđ max? ⁴ Nyâuh songđ tăng laiv tanyđ zâuđ nanc đungx six max săngh nongc zâyf max? âyz yaz nyâyh six max woangb đêh! ⁵ Tênb-Hungh Sađ Singx-lingh phunz nyâuh yâuf pez đungx yâuc yămz nyâuh yâuf pez mungh tongx ayx jix caox njingc nyăngz dlayc, six wâyc nyâuh yâuf pez âyz Đoouc-lif ayx mah six nyâuh numđ cuđ jeenx bix zeen? ⁶ Nyâyh mangc geh! Apv-ra-ham zeen Tênb-Hungh, Zâu songđ stunx Apv-ra-ham cloon nănh hopđ nyâuđ. ⁷ Nyâuh yâuf pez six zuc pâyz tuz naih seenz stymz woax đomc munh six seenz zâyf Apv-ra-ham nyăngz sây stunz. ⁸ Canyx-Stâub bux phunz pănh pâyz quaix đangc, Tênb-Hungh oix phunz max zâyf Yiu-thai munh tuz zeen nănh, yâuc tuz cloon nănh hopđ nyâuđ, Canyx-Stâub nyăngz cuđ jeenx songđ bux phunz Apv-ra-ham pâyz quaix đangc, “Gungh Đi munh six mungc mâyh songđ tuz Tênb-Hungh sađ Pôz phunz. ⁹ Six coong laiv lanh zeen Tênb-Hungh năngđ Apv-ra-ham, Tênb-Hungh songđ sađ pôz phunz woax đomc zeen Zâu Yê-su nyăngz munh ¹⁰ Tinyh phanv coouv đoouc lif Gâyf nyăngz munh songđ zuc zaux, wâyc zuc Canyx-Stâub coong, “Laiv lanh max âyz nzuf Đoouc-lif Gâyf ayx woax tauh songđ zuc zaux.” ¹¹ Năngđ nâyx phătc tuz manyf pec âyz Zâu Tênb-Hungh mangc, max naih laiv lanh coouv đoouc lif Gâyf bix tuz cloon Zâu Tênb-Hungh hopđ nyâuđ, Wâyc zuc Canyx-Stâub ja coong, “Laiv lanh pengh stymz mungc seenz stymz six tuz mengc săngh. ¹² Six Đoouc-lif Gâyf max pangc seenz stymz ayx coonz. Wâyc zuc Canyx-stâub coong, “laiv lanh âyz Đoouc-lif Gâyf woax tauh songđ tuz săngh. ¹³ Đouoc-lif gâyf phunz pănh zuc zaux, six Njâuv Zâu zuc zaux tayv pănh gâyh đutb zuc zaux nyăngz đoouc lif Gâyf. Wâyc zuc Canyx-Stâub ja coong, “jiđ tuz zuc zaux laiv lanh đyux woa njăngx zax. ¹⁴ Njâuv Zâu Yê-su ayx năngđ nâyx wâyc phunz max zâyf Yiu-thai munh yâuc tuz Zâu Tênb-Hungh sađ pôz phunz nănh stiz, năngđ Zâu sađ pôz phunz Apv-ra-ham nâyx, năngđ nâyx wâyc phunz munh zeen Njâuv Zâu songđ tuz stipx Tênb-Hungh nyunc sađ phunz nyăngz Singx-lingh. Tênb-Hungh nyunc nyăngz woac cloon đoouc lif gâyf ¹⁵ Songx yâuf pez lex! pănh zuc nyâyh âyz Tongb hungb bamh munh nyăngz dlayc. Six coong năngđ naih iz pôz lanh njăpc săngh nyunc woac. laiv lanh yâuc max hayh pâu max hayh quanyf. ¹⁶ Tênb-Hungh nyunc woac phunz Apv-ra-ham cloon nănh nyăngz sây-stunz, “Coong sây stunz woax zâux woac six max zâyf coong tauv munh đungx sây stunz, nănh nuz tauv woax tauh sây stunz six Njâuv Zâu. ¹⁷ Yaz oix coong nyăngz âyz Gâyf six năngđ nâyx, Tênb-Hungh njăpc săngh nyunc woac yâuc âyz nyunc woac ayx. Quaix đangz stâyx pez stamx săpc nyăngv. Tênb-Hungh njăpc Đooub-lif Gâyf taih, Six Đoouc-lif Gâyf max hayh phunz woax đomc nyunc woac tuih mah six max săngh nongc. ¹⁸ Six coong Coouv Đoouc-lif Gâyf nzăngđ tuz stipx Tênb-Hungh sađ phunz nyăngz jax dlaih têx, songđ max zâuđ coouv nyunc woac, Six wâyc zuc Zâu Tênb-Hungh âyz nănh nyunc nyăngz woac sađ pôz phunz Apv-ra-ham đungx nzof gôh. ¹⁹ Ha njăpc đoouc lif Gâyf nyăngz âyz Gâyf six lungđ? đoouc lif Gâyf six njăpc taih wâyc nongc phunz pamf Stoif nyăngz munh. Zu tuz stipx Tênb-Hungh nyunc woac phunz woax tauh Apv-ra-ham nyăngz sây stunz taih tauv. six Stynz-munh jaoz phunz Mô-sê săngh ah lanh mungh tongx munh njăpc Đoouc-lif Gâyf taih phunz songx munh. ²⁰ Ayx mungh tongx munh max zâyf cungb stăngc ah phanx cungv, Six ah tauh Zâu Tênb-Hungh. Đoouc-lif gâyf nyăngz âyz gâyf ²¹ Năngđ ha, đoouc-lif Gâyf cloon Tênb-Hungh nyunc nyăngz woac naih tinyh nzengz max? max naih! Six coong đoouc-lif Gâyf phunz munh naih mengc săngh, munh songđ hayh Coouv đoouc-lif Gâyf tuz cloon Tênb-Hungh hopđ nyâuđ. ²² Six Canyx-Stâub phunz njynh nây Gungh đi munh tuz phătc munh zuc Stoif stayb, phunz laiv lanh naih seenz stymz zeen coouv Njâuv Zâu songđ tuz stipx Zâu nyunc phunz nyăngz phănc. ²³ Pănh tinyh đoih zuc đoouc-lif Gâyf stayb cangđ pănh năngđ Stoif-munh nâyx, zu tauv Njâuv Zâu nyăngz seenz stymz hynđ yangh seetb taih. ²⁴ Coong njingc ninyh, đoouc-lif Gâyf six săngh ah tauh quanz yeenv pănh ninyh tauv Njâuv Zâu. pănh songđ tuz cloon Tênb-Hungh hopđ nyâuđ yămz nănh nyăngz cah đangc. ²⁵ Nâyx zanyf, seenz stymz taih tauv, pănh songđ max zuc đoouc-lif Gâyf cun pănh. ²⁶ Nyâuh yâuf pez wâyc zeen Njâuv Zâu nyăngz seenz stymz songđ tuz ayx Tênb-Hungh nyăngz namh-nyâuf. ²⁷ Nyâuh yâuf pez ayx quaix womz nyăngz Gâyf songđ tuz cloon Njâuv Zâu songc mengc Săngh, songđ zoongz zuz nănh nyăngz stynb. ²⁸ Wâyc năngđ nâyx Yiu-thai munh mah six Hi-lapc munh yâuc max jez munh nzif mah six munh pha. Ayx nâuh mah six pungx goib, songđ tinyh đoih tuz tinyh năngđ. ²⁹ Six coong nyâuh yâuf pez tuz pênx Njâuv Zâu nyăngz munh, nyâuh songđ săngh Apv-ra-ham nyăngz Sây stunz, songđ tuz stipx Tênb-Hungh nyunc phunz Apv-ra-ham nyăngz Pôz.