2 ¹ Blătc quaix đangz săpc stâyx nyăngv, yaz cloon Ba-ra-ba, ninyh Ye-lu-sa-lem stengv, buz yâuc năngx ênz cloon Titv ninyh. ² Yaz ninyh Ye-lu-sa-lem six wâyc Zâu Tênb-Hungh bux phunz yaz pâyz plongx yangh nyăngz dlayc, yămz woa yaz zoz cuđ jeenx lanyc lănv phunz max zâyf Yiu-thai munh mungv. Yaz năngđ nâyx ayx wâyc zuc cungb woangb yaz ayx nyăngz cumh pâuz zâuđ hayh tuih.* ³ Titv yâuc cloon yaz ninyh. Max cun nănh hănđ max zâyf Yiu-thai munh, six nănh lauf max zâuđ zuc yac ayx quaix catz nyăngz gâyf. ⁴ Năngx naih ah đomc zeen za gâyf nyăngz yâuf pez, nâyx đomc munh pinyx nzac taih zanb buz setx mangc jađ, Yaz ayx Njâuv Zâu Yê-su pungx goib nyăngz munh six năngđ laix, nănh stiz songđ oix zoz buz nzâyz ninyh ayx nâuh. ⁵ Six buz songđ max nyangc nănh stiz ax tiny stăngv, wâyc buz oix leđ seenz Gâyf phunz nyâuh yâuf pez. ⁶ Năngx phătc naih đomc munh năngđ ayx lub nyăngz munh. nănh stiz hănđ six ayx laiv hungđ munh yâuc max queenđ tauv yaz. Wâyc zuc yămz Zâu Tênb-Hungh nyăngz cah đangc muif lanh munh songđ tinyh năngđ nzuf Zâu yâuc max mangc laiv lanh nyăngz mynb. ⁷ Woax đomc ayx quanz nyăngz munh songđ saz tuz yaz stipx cumh pâuz lănv cub jeenx phunz max zâyf Yiu-thai munh mungv. Năngđ nănh êu Phê-rơ ninyh lănv cub jeenx phunz Yiu-thai munh mungv nâyx. ⁸ Tênb-Hungh jaoz cumh pâuz phunz Phê-e-rơ Stăngc lănv cuđ jeenx phunz Yiu-thai munh. năngđ nănh phunz yaz stăngc lănv phunz max zâyf Yiu-thai munh nâyx. ⁹ Phê-rơ, Gia-cơ, Cloon Giăng naih manyh yangh ayx byây.**songđ saz tuz Zâu Tênb-Hungh sađ Pôz phunz buz ayx nâyx đomc cumh pâuz, Nănh stiz songđ cloon Ba-na-ba, ayx njih houđ ninyh songc congz ayx nâyx đomc cumh pâuz, Ba-na-ba cloon yaz ninyh nzônh phunz max zâyf Yiu-thai munh, Nănh stiz six ninyh nzônh phunz Yiu-thai munh ayx quaix catz nyăngz gâyf woax đomc munh. ¹⁰ Nănh stiz cungb oix nongc yaz săngx tauv munh zâuđ. six nâyx đomc cumh pâuz yaz lauf naih stymz ayx. Phao-lô toongx songx coong Phê-rơ ayx longđ ¹¹ Phê-rơ ninyh tauv An-ti-ôtv woax zanyf, Yaz toix mynb yônx nănh, wâyc nănh ayx longđ. ¹² Gia-cơ êu taih nyăngz munh taih max zengx tauv A-ti-ôtv, Phê-rơ muif dlih cloon max zâyf Yiu-thai munh songc nhlync hopb, six woax đomc munh taih tauv, Phê-rơ songđ pyenv goib, wâyc zuc nănh cumh nzav ayx quaix catz woax đomc Yiu-thai munh. ¹³ Yămz woa woax đomc Yiu-thai munh lêpc Phê-rơ cloon zeen Zâu nyăngz munh ayx za nzuf, njynh cloon Ba-na-ba nănh stiz tinyh đoih ayx za nzuf âyz nănh stiz. ¹⁴ Yaz phătc nănh ninyh max jămc seenz gâyf nyăngz cuđ jeenx, yaz songđ toongx songx munh mađ Phê-rơ coong, “Mâyh six ayx Yiu-thai munh. ha săngh laix mâyh yâuc yămz max năngđ Yiu-thai munh nâyx yeh? năngđ nâyx mâyh ayx laix hayh yac tuz max zâyf Yiu-thai munh săngh âyz Yiu-thai munh nyăngz gâyf? ¹⁵ Yaz tăng stengb stâyv taih bêc ayx Yiu-thai munh nzof gôh, Yaz max zâyf naih Stoif woax đomc max zâyf Yiu-thai munh đêh. ¹⁶ Yaz pâyz tuz bamh munh max lêpc Đoouc lif Gâyf nzăngđ tuz cloon Tênb-Hungh hopđ nyâuđ, Six wâyc zeen coouv naih tync mungc yămz Njâuv Zâu Yê-su. Wâyc max naih laiv lanh lêpc Đooub-lif gâyf bix hayh tuz cloon Tênb-Hungh hopđ nyâuđ. ¹⁷ Six coong pănh six Yiu-thai munh oix coouv Njâuv Zâu tuz cloon Tênb-Hungh hopđ nyâuđ, bix lauf năngx ayx Stoif-munh têx, Njâuv Zâu six ayx nâuh phunz Stoif mah? max zâyf đêh! ¹⁸ Six coong yaz năngđ năngx nzaox yaz tou lunc nyăngz Gâyf têx, yaz six săngh pamf Stoif nyăngz munh. ¹⁹ Coong tauv Đoouc-lif Gâyf têx yaz longđ tayc gôh, yaz coouv Njâuv Zâu tuz gâyh đutb đoouc lif gâyf, tăng nây yaz songđ săngh wâyc phunz Tênb-Hungh. ²⁰ Yaz cloon Njâuv Zâu songc tingz săpc đăngc zax tayc nâyx zanyf săngh woax tauh six max zâyf yaz săngh, nâyx zanyf yaz nyăngz stynb A tuz săngh six wâyc Njâuv Zâu săngh yămz yaz cah njaf, Yaz mungc Tênb-Hungh nyăngz toonz nzăngđ tuz Săngh, six Stăngz yaz bix nyunc sez mengc tayc wâyc Njâuv yaz woax Tauh. ²¹ Coong nâyx max zâyf yaz nzêmh Tênb-Hungh nyăngz Pôz, Six coong munh lêpc Gâyf njanh bix hayh tuz cloon Zâu Tênb-Hungh hopđ nyâuđ têx, Njâuv Zâu tayc six ayx six huđ. Đoouc-lif gâyf cloon seenz stymz