¹ Năngx naih tauh munh bux hipđ ayx A-na-nia, Cloon nyăngz au, Sapc-phi-la, maic ah tix niđ tâyc.” ² A-na-nia, Nănh tanb zoz nâyx đomc nib nyăngz nyanh seetb taih zaub, Njâuh nănh cănh nongc, Nănh nyăngz au lauf pâyz, Nănh stiz năngx nzâyz woax đomc nyanh ninyh phunz cumh pâuz Munh.” ³ Phê-e-rơ naic, “A-na-nia lex! Mâyh ayx lungđ bix bây Sanx-tanx cun mâyh, phunz mâyh naih nyâuđ coong jaf Singx-lingh songđ tanb nâyx đomc maic nib nyăngz nyanh nongc?” ⁴ Max zengx maic six săngh mâyh nyăngz, Maic taih nyăngz nyanf six dluyh mâyh cănh nongc max zâyf Mah? Toix lungđ phunz mâyh naih nyâuđ ayx năngđ nâyx? Mâyh max zâyf coong jaf munh đêh! Six mâyh jaf Tênb-Hungh.” ⁵ A-na-nia numđ nâyx đomc woac, Nănh songđ lênh dlih glinyf nzac ninyh siv seetc tayc woa. Toix laiv tauh numđ nâyx đomc dlayc, Seenz numđ cumh nzav nzongf. ⁶ Yămz woa woax đomc munh gunx, Zoz buyx sênh A-na-nia nyăngz stynb stayđ nzâyz ninyh plopx. ⁷ Nzez cox pôz săngx huđ quaix đangz, Nănh nyăngz au nzac taih Tauv, Nănh lôx max zengx pâyz nâyx đomc dlayc seetb taih.” ⁸ Phê-e-rơ naic nănh, “Bux yaz geh! nyâuh maic nib tuz buc nâyf nyanh yaz? Nănh tauz coong hiv! Tuz buc nâyf gôh.” ⁹ Phê-e-rơ Songđ coong bux Nănh, “nyâuh iz pux tayb bix songc nyâuđ Stâyv Zâu nyăngz Singx-lingh naz? Mangc geh! ninyh plopx mâyh langh woax đomc munh lauf tauv lâyc jengh cah đangc nzof gôh yec! Nănh stiz năngx zuc zengz cloon mâyh nzâyz ninyh tymb.” ¹⁰ Sa-phi-la toongx sangf glinyf nzac Phê-e-rơ nyăngz staux synh ninyh tayc woa, woax đomc tanyb nênh phătc nănh tayc woa, Songđ taih zengz nănh nzâyz ninyh plopx ănz nănh langh woa cah synh payh hangh woa.” ¹¹ Songx Huyđ-toongh munh numđ nâyx đomc dlayc, Seenz numđ cumh nzav nzongf.” ¹² Cumh-pâuz munh ayx đungx hungđ Jix-houc jix-caox njingc nyăngz dlayc, zeen Zâu munh, Laiv zanyf lauf căpx dlonf yămz Sa-lô-môn Hungh nyăngz mem glomx njiuh.” ¹³ Cungh ngwoaic munh max naih mănv nzađ cloon nănh stiz căpx dlonf, wâyc zuc songx munh tinyh đoih bongc nănh stiz. ¹⁴ Zeen Zâu nyăngz Munh njynh toonz cloon Sab cun nzac Pâu cun đungx staox.” ¹⁵ Munh nzâyz gumc Munh seetb woa jau synh Ninyh, Phunz nănh stiz phâyx woa siu, Phâyx woa Sic zu, Phê-e-rơ buz quaix jau woax zanyf, Hayh tuz nănh stiz nyăngz bah cloiz glomx zuc nănh stiz.” ¹⁶ Yămz stătx Yê-lu-sa-lem Stengv woax đomc Munh, tinyh ênz nzâyz woax đomc Gumc Munh, zuc manđ wâyb nyăngz munh ninyh, Yeetx stong tuz zany gongx nzuf.” ¹⁷ Stayb Munh pyây cloon nănh nyăngz toic, Cloon Sa-đu-si woax jau Munh, hănđ woax đomc cumh pâuz munh nzongf.” ¹⁸ Nănh stiz songđ nyopz zoz woax đomc cumh pâuz Munh sukc ănz nzac nzauh ninyh clangđ ănz woa. ¹⁹ Six naih ah munf, Naih ah tauh Zâu nyăngz Stynz-Munh taih coib nzauh jengh ênz Nănh stiz seetb ninyh nzuf.” ²⁰ Bux Nănh stiz coong, “nyâuh ninyh stâuđ woa layf paix pyau, Zoz nâyx đomc săngh mengc nyăngz jau lănv bux songx munh gôh.” ²¹ Gungh Gwăngz plungđ têx, Nănh stiz songđ âyz nâyx đomc woac nzac layf paix toongh ninyh nzaox munh. Stayb munh pyây cloon ayx lub nyăngz Yiu-thai Munh cloon nănh stiz nyăngz toic, Cloon munh côx, Taih căpx dlonf yămz woa (stămđ stoif quanz,) Paiđ pengz ninyh woa nzauh nzâyz cumh Pâuz munh taih woa naz.” ²² Six woax đomc pengz ninyh tauv woa nzauh lov cumh pâuz munh max phătc naih, Nănh stiz songx phunb đangz lauf lănv bux woax đomc ayx lub nyăngz Yiu-thai Munh. ²³ Buz ninyh tauv woa nzauh phătc jengh ja woa Gongv-Gongx, “Nzof pengz lauf zu woa jengh cah đangc, “Six buz coib jengh nzac ninyh lov max phătc naih lanh tiny stăngv Munh.” ²⁴ Jămđ layf paix nyau nyăngz pengz pyây, Cloon Stayb munh pyây, nyâyh max plongx nâyx đomc dlayc, đauh mif đangz phanx six oix seetb taih năngđ nâyx gôh. ²⁵ Woax zanyf naih ah lanh Munh taih lănv coong, “Mungv geh! nyâuh zoz clangđ ănz nzauh woax đomc munh nâyx zanyf nănh stiz yămz woa layf paix pyau nzaox Munh nzec.” ²⁶ Pengz pyây, Cloon woax đomc pengz songđ ninyh zoz woax đomc cumh pâuz Munh nzâyz taih, Six Nănh stiz max nzađ ayx puf nic. Pengz cumh nzav woangb songx Munh hayh zoz njauz ôx nănh Stiz.” ²⁷ Pengz nzâyz nănh stiz taih stâuđ woa Cun dlayc Munh Cah đangc, Stayb Munh pyây songđ zah naih nănh Stiz.” ²⁸ Nănh stiz coong, “Buz câmx max phunz nyâuh nongc nâyx nomz bux nzaox Munh naz nzof! Mangc geh! nyâuh nzaox nyăngz gâyf lunc pong Yê-lu-sa-lem Stengc nzof wec! Njynh woax tauh munh tayc nyăngz dlayc, nyâuh zâyf năngx oix hoiđ phunz buz đamz toongz nef.” ²⁹ Phê-e-rơ cloon woax đomc cumh pâuz Munh tauz Coong, “Buz six zuc mungv Tênb-Hungh, Six max zâyf mungv nyâuh nzauf quyênh nyăngz bamh munh nef.” ³⁰ Nyâuh zoz Yê-su tingz đyux ănz woa săpc đăngc zax tayx nănh Tayc, Six pănh nyăngz claof jex nyăngz Tênb-Hungh, Năngx ayx phunz nănh săngh Phunb stengb Taih.” ³¹ Tênb-Hungh pâuh nănh staox njăngb, Stâyv nănh nyăngz byaoh phanx. phunz nănh ayx Njâuv Zâu, Phunz Yiu-thai munh naih congv coi nyâuđ tuz quanyf Stoif.” ³² Buz wâyc nâyx đomc dlayc ayx zanyx Manyf, coong Tênb-Hungh oix sađ Singx-lingh phunz mungv nănh nyăngz woac woax đomc Munh, buz ayx zanyx manyf lănv nâyx đomc dlayc six seenz nyăngz.” ³³ ayx lub nyăngz Yiu-thai munh numđ nâyx đomc woac, Nănh stiz seenz siv nhleenx nzongf.” Ayx laix hayh tayx tuz nâyx đomc cumh pâuz Munh?” ³⁴ Six naih ah lanh Pha-li-si Munh bux hipđ ayx Ga-ma-lên. Nănh ayx nzaox gâyf nyăngz Stênx-Stengb, Songx munh yâuc pâuh Nănh, Nănh nyoongz quef Stâuđ woa toah anx êu munh ênz cumh pâuz Munh seetb cungh ngwoaib ninyh ah zanyf têx.” ³⁵ Nănh songđ coong, “I-sa-la-ên Munh nyăngz Yâuf pez lex! nyâuh ayx lungđ phunz nâyx đomc Munh, six zuc năngđ cayb Buôngh đev! ³⁶ Lôx noib naih ah lanh Munh, Bux hipđ ayx Thêu-đa, Nănh cănh zanyb Nănh ayx lub, Gâyh max côz Stâyx pez lanh Munh lêpc Nănh, Six quaix đangz Nănh zuc tayx tayc blătc, Lêpc Nănh woax đomc munh đanv lunc nzuf, ayx max seetb laiv hungđ.” ³⁷ Blătc woa quaix đangz staox munh huv, Yămz Ga-li-lê Naih ah lanh Munh, bux hipđ ayx Yu-đatc, hox Munh đungx lêpc Nănh, Six tauv nănh zuc tayx tayc, lêpc Nănh woax đomc Munh, Lauf năngđ woa nâyx tyuv đanv lunc nzuf.” ³⁸ Năngđ nâyx yaz quynb nyâuh yâuf pez, “Nâyx zanyf seetb taih nyăngz dlayc, nyâuh max tuz ayx laix ănz nâyx đomc Munh, nyâuh six zuc pungx Nănh stiz seetb ninyh năngx gongx.”Six coong Nănh stiz ayx nyăngz dlayc, Năngđ zâyf tăng bamh Munh ayx taih nyăngz quyênh, Six cănh Stutc paic nzuf.” ³⁹ Six coong năngđ zâyf Tăng Tênb-Hungh phunz Taih, Pănh max hayh ayx tuz hingh nănh stiz đêh. ayx ha max njingc pănh cloon Tênb-Hungh panx zax!” Woax đomc ayx lub nyăngz Yiu-thai Munh songđ đôngh ix mungv Ga-ma-lên Sangv gwoangh nyăngz woac.” ⁴⁰ Nănh stiz êu ênz woax đomc cumh Pâuz munh nzac lauf, Nongc pya bopc đonf, Yâuc câmx max phunz nănh stiz nongc Zâu Yê-su nyăngz bux coong nzaox toix laiv lungđ, Zăpx songf songđ pungx nănh stiz seetb ninyh. ⁴¹ Cumh pâuz munh seetb woa Huyđ toongh ninyh, Nănh stiz seenz numđ nyađ Nzongf, wâyc Zâu Yê-su nyăngz bux zuc tanyc nyayz.” ⁴² Nănh stiz muif noib yămz layf paix pyau mah six songx Munh nyăngz pyau, lănv cuđ jeenx max Sec Yâuc nzaox Munh coong, “Yê-su six ayx Njâuv Zâu.”