¹ Pyaz noib cah đangz, Stayb munh pyây, A-na-nia, cloon lanyv đaof munh côx, Năngx cloon tauh luâtc-sư bux hipđ ayx Tetc-tu-lu, Ninyh tauv Sê-sa-rê, Tôngz-đôkv woa cooux Phao-lô.” ² Phao-lô tuz ênz seetb woa Stămđ Stoif tync taih, Tetc-tu-lu, Songđ quef coonz cooux Phao-lô, “Nănh stiz cooux coong, “Tôngz-đôkv Phi-litv lex! Wâyc phunz mâyh ayx zươngz, Pănh nyăngz côkz songđ tuz taiv banyh oonz loc lauh nzongf, “Côkz sangc yâuc tuz sađ puv quâyx, Đeoz-neoz. Naih toix lungđ max pênx nyăngz dlayc, Mâyh yâuc zany tuz gongx staox. ³ Buz yămz nâyx nomz tync tuz sađ toix laiv lungđ, Seenz clo ănz numđ nyađ mâyh.” ⁴ Six buz max oix sêmc mâyh săngh huđ congv lauh, jođ mâyh nongc noic mungv buz coong tix zâux woac.” ⁵ Six buz phătc nâyx tauh ya munh cungb puv maoh jaf Yiu-thai munh yămz nzêux nây Gungh đi lunc nzuf, Nzof nănh yâuc ayx ah tauh Na-sa-letv woax jau munh nyăngz pyây. ⁶ Nănh ayx wâyx buz nyăngz layf paix toongh nzof buz nzăngđ topz zoz nănh nzâyz taih âyz buz nyăngz gâyf stămđ Stoif. ⁷ Six woax tauh pengz pyây Si-sêtv, Taih jangx nyeenh Mănh, Zab zoz nănh seetb gâyh buz nyăngz puf đi. ⁸ Jođ mâyh phanv zah naic nănh songđ pâyz tuz buz cooux nănh nâyx đomc woac, Seenz mah six za.” ⁹ Yiu-thai munh tinyh đoih đôngh ix nâyx đomc dlayc six seenz nyăngz.” ¹⁰ Six Tôngz đôkv phunz Phao-lô tuz ix jiênx lănv, Nănh songđ coong, “Tôngz đôkv Phi-litv lex! Yaz pâyz tuz mâyh ayx pob dlayc munh yămz nâyx nomz Stâyz-Phangz đungx nyăngv, Six nâyx noib yaz seenz numđ nyađ tuz naih congv taih yămz mâyh nyăngz cah đangc lănv yaz nyăngz dlayc phunz mâyh mungv.” ¹¹ Mâyh cănh hayh zah naic tuz pâyz, Yaz ninyh Yê-lu-sa-lem Stengv canyx paix Zâu nzăngđ nzez săpc nyâyc noib nây.” ¹² Six cooux yaz nâyx đomc Munh max zengx tuz phătc yaz cloon munh tinyh nzengz yămz woa layf paix toongh, Mah six stengv cah njaf, Lou songx munh lunc nef.” ¹³ Nănh stiz nâyx noib cooux yaz nâyx đomc dlayc nyăngz munh max lov tuz laiv hungđ ayx zanyx manyf nef.” ¹⁴ Six yaz jođ nhlimc nâyx hungđ phunz nyâuh, “Yaz Canyx pănh claof jex nyăngz Tênb-Hungh, Yaz six ah tauh lêpc đaof Yê-su nyăngz Munh, Yiu-thai Munh coong, “Yê-su nyăngz Đaof six za Đaof, Yaz zeen nyăngz gâyf six Mô-sê ja nyăngz Đoouc-lif gâyf, Cloon tâuc woac munh ja nyăngz stâub.” ¹⁵ Yaz naih ah cuyb njih mungc tync yămz woa Zâu Tênb-Hungh, Cayx năngđ nănh stiz nâyx, “Yaz zeen coong max cez munh gongx mah six munh huđ, Tayc blătc six năngx zuc săngh phunb stengb taih.” ¹⁶ Wâyc năngđ nâyx, Yaz songđ zuc muif noib yămz Zâu Tênb-Hungh nyăngz cah đangc, Yâuc yămz songx munh nyăngz cah đangc ayx hopđ nyăngz dlayc.” ¹⁷ Yaz ninyh gâyh Yê-u-sa-lem Stengv đungx nyăngv nzof six yaz Năngx nzâyz nyanh phunb đangz lauf stăngc cloon yaz songc Stingx nyăngz Munh, yâuc cloon pungx hođ nyăngz tax’ hungđ.” ¹⁸ Nănh stiz phătc yaz yămz woa layf paix toongh nzăngđ stav wâyx Songf woax zanyf, Yâuc max lou lunc toix lungđ, Yâuc max naih toix tauh cloon yaz căpx dlonf yămz laiv tix.” ¹⁹ Naih batz lanh Yiu-thai Munh yămz vungh thêuz-av, Six coong nănh stiz năngđ phătc yaz ayx sai toix lungđ dlayc, Nănh stiz six cănh taih nây cooux yaz.” ²⁰ Mah six mâyh phanv naic yămz nây nâyx đomc Yiu-thai Munh mangc jađ, yaz Stâuđ yămz Yê-lu-sa-lem Stengv Yiu-thai Munh nyăngz Huyđ-toongh yaz ayx sai toix lungđ max.” ²¹ Nâyx noib yaz zuc tingc stoif, Six cungb yônx naih ah hungđ, Yaz stâuđ yămz nănh stiz nyăngz cah đangc hamv coong, “Nâyx noib nyâuh tingc yaz nyăngz Stoif Six wâyc yaz zeen Munh tayc bix năngx săngh taih nyăngz gâyf! ²² Phi-litv lauf pâyz tauv Zâu Yê-su nyăngz đaof, Songđ tingc sec, Năngx bux coong, “Zu Viên jiz huy Li-sia taih tauv nây, Yaz nzăngđ pob mâyh nyăngz dlayc.” ²³ Phi-litv bux quanz lauf cưv clangc Phao-lô, Six phunz nănh dluyh Stymz ninyh lauf, phunz nănh nyăngz băngh yauc nzâyz tax’ hungđ nănh sămv zuc nongc nyăngz tax hungđ nzâyz taih phunz Nănh.” ²⁴ Quaix đangz batz lauh, Phi-litv cloon Nănh nyăngz au, Đu-si-ri, Nănh nyăngz au six Yiu-thai Munh, Nănh êu Phi-litv ênz Phao-lô taih toongx nănh stiz cah đangc, Lănv tauv zeen Zâu Yê-su seenz Stymz nyăngz Jau.” ²⁵ Phao-lô lănv tauv ayx hopđ nyăngz jau, Yâuc lănv tauv Tênb-Hungh tingc bamh canz nyăngz stêtb mâyv noib, Phi-litv Cumh nzav, Nănh coong dluyh lêđ caux nzof gôh tah, Laiv zanyf naih congv yaz mănc zâyf êu mâyh taih tymb.” ²⁶ Phi-litv lauf mungc Phao-lô đăpx nyanh, Nănh songđ njynh leox êu Phao-lô cloon nănh lănv woac.” ²⁷ Iz nyăngv quaix đangz, Bôn-si-phêtv-tu, Wănc Phi-litv ayx Tôngz-đôkv, six Phi-litv oix nongc Yiu-thai Munh numđ nyađ nănh, Nănh songđ njynh luz clangđ Phao-lô ănz woa nzauh.”