¹ Phao-lô tingc mâyc mangc ayx lub nyăngz Yiu-thai Munh yâuc lănv coong, “Yâuf-pez lex! âyz Zâu Tênb-Hungh mangc phătc yaz Săngh yămz nây yangh stâyv, Six ayx gongx dlayc tuz tauv nâyx noib.” ² Stayb munh pyây, A-na-nia, “Numđ nănh coong naz, Songđ êu stâuđ woa cah synh nyăngz Munh beb Phao-lô nyăngz nzeetx.” ³ Phao-lô coong, “Mâyh six năngđ tungc goongc caox huib pec nyăngz Munh lex! Tênb-Hungh lauf oix beđ mâyh, “Mâyh stâyv nây nongc Mô-sê nyăngz Gâyf Stămđ Yaz, “Yâuc êu munh bopc Yaz, Mâyh ayx năngđ nâyx lauf pamf gâyf.” ⁴ Naih batz lanh stâuđ woa cah synh nyăngz munh mađ coong, “Tah mâyh max tuz phepb coong peo Tênb-Hungh nyăngz stayb munh pyây.” ⁵ Phao-lô tauz coong, “Yâuf-pez lex! Yaz max pâyz mâyh six ayx stayb munh nec, Canyx-Stâub ja coong, “Munh max tuz coong peo pec stingx nyăngz ayx quanz munh nef. ⁶ Phao-lô phătc yămz woa Huyđ-toongh nyăngz munh, Naih ah po six Sa-đu-si nyăngz Munh, Naih ah phanx six Pha-li-si nyăngz Munh, “Phao-lô songđ bux nănh stiz coong, “Yaz nyăngz Pha lauf Pha-li-si Munh, Nâyx noib yaz zuc stămđ yămz nây six wâyc yaz zeen Pha-li-si Munh tayc blătc năngx săngh taih nyăngz gâyf.” ⁷ Phao-lô coong ayx ha, “Pha-li-si Munh, Cloon Sa-đu-si Munh songđ tinyh nzengz phunz đanv ayx iz peob.” ⁸ Wâyc zuc Sa-đu-si Munh max zeen coong naih Stynz-munh, Yâuc max zeen coong munh tayc bix năngx săngh phunb stengb taih, Yâuc max zeen coong naih manđ. Six Pha-li-si Munh zeen coong naih nâyx đomc pôz hungđ.” ⁹ Songx munh songđ tinyh nzengz, “Naih ah tauh Pha-li-si munh nyoongz quef stâuđ woa coong, “Nănh six ayx ah tauh nzaox gâyf nyăngz Stênx-stengb, pănh max phătc nâyx tauh ya munh longđ toix laiv lungđ Stoif đêh, Max pâyz six Naih tix tauh Stynz-munh mah six manđ taih cloon nănh coong woac lêđ sta? ¹⁰ Cun tinyh nzengz lauh. Pênx săngh tinyh jâu, Pengz pyây cumh nzav woangb Yiu-thai munh hayh zeb Phao-lô, Pengz pyây songđ êu pengz ninyh songx Munh woa mungh tongx congv, Topz zoz Phao-lô nzâyz muf ănz woa đônh..” ¹¹ Quaix cah đangz munf, Zâu hynđ seetb taih bux Phao-lô coong, “Phanv pungx Stymz, “Mâyh yămz nây Yê-lu-sa-lem Stengv, Stăngc yaz ayx zanyx-manyf phunz songx Munh nzof six, Mâyh năngx zuc yămz Lô-ma Stengv ayx zanyx manyf tymb.” ¹² Cah đangz noib, “Naih ah đomc Yiu-thai Munh pinyx sangv Gwoangh ta zux ix njif max Nhlync, Max hopb laiv tuz tauv tayx tuz Phao-lô tayc.” ¹³ Naih cox Stâyx săpc đungx lanh nâyx, Ta nâyx đomc njih phâyz.” ¹⁴ Nănh stiz ninyh lănv bux stayb munh pyây cloon lanyv đaof munh côx coong, “Buz nyunc njif max Nhlync max hopb laiv hungđ zu tuz tauv tayx tuz Phao-lô tayc quanyf.” ¹⁵ Nyâuh zuc Năngđ nâyx ayx, êu câuh Viên jiz huy nzâyz Phao-lô taih nây, Năngđ yađ nyâuh oix zah naic nănh nâyx, Buz six zu woa bah đămx jau tayx Nănh năngx tayc, ayx tuz nănh taih max zengx tauv Nây.” ¹⁶ Six Phao-lô nyăngz Stunz, Nymc mungv numđ nâyx đomc zux ix, Nănh coonx tyuv ninyh tauv woa đônh lănv bux phunz Phao-pô pâyz.” ¹⁷ Phao-Lô songđ êu tauh pengz taih bux nănh, Jođ mâyh ênz nâyx tauh nauf jeenz ninyh pengz pyây woa, Nâyx tauh nauf naih ah zâux woac oix coong bux Nănh.” ¹⁸ Nâyx tauh quanz, Songđ jinđ Phao-lô nâyx tauh stunz ninyh tauv Viên-jiz huy woa bux coong, “Stoif-munh Phao-lô, êu câuh yaz ênz nâyx tauh nauf jeenz taih phunz sêpx, Nâyx tauh naih woac lanyc oix lănv bux sêpx.” ¹⁹ Viên jiz huy nzauf nâyx tauh nauf jeenz nyăngz puf jinđ seetb ninyh lanyc songđ naic nănh coong, “Mâyh naih toix laiv hungđ oix lănv bux yaz?” ²⁰ Woax tauh nauf tauz coong, “ayx lub woax đomc Yiu-thai Munh hangc săngx đomz êu câuh mâyh ênz yaz nyăngz wây Phao-lô ninyh nănh stiz cun dlayc tync năngđ yađ nâyx oix pâyz tix hungđ bix zah naic nănh tymb nâyx.” ²¹ Six jođ mâyh max tuz zeen nănh stiz, “Wâyc zuc naih stâyx săpc đungx lanh munh, bênc Săngh zux ix zu bah đămx jau oix tayx Phao-lô quanyf. Nănh stiz nyunc njif max nhlync max hopb laiv hungđ tuz tauv tayx Phao-lô Tayc, Nâyx zanyf stiz cungb zu mâyh đôngh ix.” ²² Pengz pyây Viên jiz-huy songđ êu nâyx tauh nauf lauf yâuc zăpx nănh coong, “Mâyh max tuz phunz toix laiv tauh pâyz mâyh bux yaz nâyx đomc dlayc bef.” ²³ Pengz pyây Viên jiz huy songđ êu iz tauh pengz taih bux nănh stiz coong, “Yaz Sămv zuc ah peob munh ninyh Sê-sê-rê Stengv, six zuc bênc iz pez lanh pengz, jeetb săpc lanh zâyh maf, iz pez lanh nzâyz wic, Nâyx munf đuh săngh huđ bix seetb jau Ninyh.” ²⁴ Yâuc zuc bênc maf phunz Phao-lô Zâyh ninyh jau leđ phunz nănh pengh oonz ninyh tauv tôngz đôkv Phi-litv woa.” ²⁵ Pengz pyây ja ah zây jeenx, jeenx ja năngđ nâyx coong, “ ²⁶ Seenz Stăngz nyăngz quanz tôngz đôkv Phi-litv lex! Yaz Lau-đê-si-sia, Ja jeenx zuyz phunz mâyh, “Yaz săngx tauv mâyh.” ²⁷ Yiu-thai munh cayx ta tayx nănh, Six yaz numđ coong nănh six Lô-ma Munh, Yaz songđ cloon yaz nyăngz pengz coonx tyuv ninyh zab zoz Njâuv Nănh.” ²⁸ Yaz yâuc oix pâyz tuz wâyc săngh laix, Yiu-thai Munh bix cooux Nănh, Yaz songđ ênz nănh ninyh tauv yaz nyăngz cun dlayc tync Huyđ-toongh.” ²⁹ Six yaz songđ pâyz tuz Yiu-thai munh cooux Nănh, “Six wâyc nănh nzengz nănh stiz nyăngz gâyf, âyz Nănh stiz cooux nyăngz dlayc, Six max jic tuz ănz nzauh mah six tayx nănh tayc đêh.” ³⁰ Yaz songđ pâyz tuz naih ah đomc Yiu-thai oix tayx Nănh, Six yaz songđ oix lênh dlih stungx nănh ninyh tauv mâyh woa, “Yaz yâuc bux woax đomc Yiu-thai Munh, “Toix laiv tauh naih lungđ dlayc oix cooux nănh bix ninyh tauv mâyh woa lănv.” ³¹ Woax munf pengz songđ âyz quanz lanyf ayx, Stungx Phao-lô ninyh An-ti-ba-zi Stengv.” ³² Tauz cah đangz noib, woax đomc zâyh maf pengz stungx Phao-lô ninyh tauv Sê-sa-rê, Six năngx naih woax đomc yăngh staux nyăngz pengz phunb đangz lauf Yê-lu-sa-lem Stengv nyăngz đônh.” ³³ Ninyh tauv Sê-sa-rê, jaoz stâub phunz tôngz-đôkv songf, “Pengz songđ jaoz Phao-lô phunz nănh stiz.” ³⁴ Tôngz-đôkv toc Stâub songf songđ naic Phao-lô coong, “Mâyh yămz laiv nomz Stengv nyăngz Munh? Pâyz tuz Phao-lô Yămz Si-li-si Stâyz-phangz, ³⁵ “Nănh bux coong, “zu cooux mâyh woax đomc munh taih tauv nây, Yaz mănc mungv mâyh nyăngz coonz tay, Tôngz-đôkv songđ seetb lanyf êu jămđ Phao-lô yămz Hê-lôtv Hungh nyăngz Hungh tync.”