¹ Songx yâuf pez lex! Lănv tauv pănh nyăngz Njâuv Zâu Yê-su năngx taih, yâuc Coong tauv nănh taih sâub dlonf pănh tuz muf pongh cloon nănh yămz. ² Max nongc nyâuđ woangb nyâuđ stauh, wâyc zuc naih phanx Munh lănv Coong, Zâu nyăngz noib taih tauv blătc nzof gôh, Tâuf woac Munh coong mah six Munh lănv coong mah six yaz ja jeenx coong, ³ “Năngx gâyf bây laiv lanh nongc laiv hungđ zux ix jaf nyâuh yâuf pez, wâyc zuc Zâu nyăngz noib max zengx tauv six naih nâyx đomc dlayc seetb taih đangc, quanyf Zâu Tênb-Hungh nyăngz gâyf nyăngz Munh six zuc hynđ yangh seetb taih, six zuc mêtc ănz pongz tuz woax tauh. ⁴ Nănh oix nzengz ayx lub yâuc cănh zanyb nănh hipđ ayx dlănh, six Munh canyx paix woax tauh Munh, naih stoif woax lanh munh nănh năngx nzađ nzac Tênb-Hungh nyăngz layf paix pyau njaf ninyh stâyv woa, nănh cănh tanv nănh Coong, “yaz six Zâu Tênb-Hungh. ⁵ Nyâuh yâuf pez max săngx tauv yaz năngx cloon nyâuh yămz woax zanyf, yaz zoz nâyx đomc dlayc taih lănv bux nyâuh yâuf pez nzof mah! nyâuh nyâuđ cob nzof? ⁶ Nyâuh yâuf pez songđ pâyz tuz naih laiv hungđ tăng max phunz pamf stoif woax tauh hynđ seetb taih, tauv săngx huđ nănh nzăngđ tuz hynđ yangh seetb taih. ⁷ Nâyx zanyf pamf đoouc lif gâyf woax tauh oix pinyx ayx nyăngz cumh pâuz, six tăng nâyx hungđ cumh pâuz woax tauh nănh songđ oix nzez tuz ninyh tauv woax tauh zuc nzâyz seetb ninyh. ⁸ Woax zanyf pamf đoouc lif gâyf woax tauh hynđ yangh seetb taih, songđ zuc Zâu Yê-su nongc nănh nzeetx nyăngz siv tayx nănh, Zâu nongc nănh hynđ nzac taih nyăngz Gwăngz-eng mêtc woax tauh. ⁹ Pamf Stoif woax tauh taih woax zanyf, nănh nongc Sax-tanx nyăngz quyênh ayx jix-caox njingc nyăngz dlayc cloon jix houđ nyăngz dlayc jaf Munh. ¹⁰ Nănh yâuc nongc muif hungđ cuyx quaiz nyăngz okx zux ix jaf zuc Mêtc nyăngz Munh, nănh stiz zuc mêtc six wâyc zuc nănh stiz max oix nyâyh tauv seenz gâyf, nănh stiz songđ zuc Mêtc, nănh stiz năngđ nyâyh tauv stăngz munh nyăngz seenz gâyf songđ tuz Njâuv. ¹¹ Wâyc năngđ nâyx Zâu Tênb-Hungh songđ phunz jaf Munh woax đomc Munh ninyh lêpc za gâyf. ¹² Năngđ ha nănh stiz max zeen seenz gâyf oix ayx huđ nyăngz Munh, nănh stiz songđ zuc tingc Stoif. ¹³ Zâu Stăngz nyăngz yâuf pez lex! Yaz six zuc muif dlih wâyc nyâuh hâuđ Zâu Tênb-Hungh, wâyc zuc tăng Coonz Zâu Tênb-Hungh sên Nyâuh yâuf pez taih wâyc phunz nyâuh stipx Njâuv Pôz, six wâyc nyâuh coouv Singx-Lingh phunz nyâuh pênx Zâu nyăngz Đăngb zengh Munh, six wâyc nyâuh yâuf pez naih stymz zeen seenz gâyf. ¹⁴ Zâu Tênb-Hungh nongc yaz nzônh nyăngz cuđ jeenx phunz nyâuh yâuf pez tuz Njâuv, phunz nyâuh yâuf pez naih phănc songc cloon pănh Gwăngz-eng nyăngz Njâuv Zâu Yê-su. ¹⁵ Yâuf pez lex! six zuc zeen wăn buz nzaox nyăngz gâyf mah six ja jeenx bux nyăngz woac ¹⁶ Jođ pănh nyăngz Nzangc Pha Tênb-Hungh, cloon Njâuv Zâu Yê-su. Sađ Pôz stâyv quâyx oonz nyâuh yâuf pez nyăngz nyâuđ. Pâu phunz nyâuh naih jab ayx gongx dlayc, yâuc naih njih mungc tync. ¹⁷ Zâu Tênb-Hungh Stăngz pănh songđ sađ pôz phunz pănh naih gongx nyăngz njih mungc tync stâyv quâyx stâyv đaic.