9 ¹ Yaz max sămv zuc ja jeenx coong tauv căpx nyanh stăngc Zâu nyăngz pec stingx. ² Wâyc zuc yaz pâyz tuz nyâuh yâuf pez cănh oix naih nyâuđ stăngc, yaz songđ tanv nyâuh yâuf pez phunz Ma-si-đoan munh mungv. Yaz lănv bux nănh stiz coong, “Miênh-nam-Hi-lapc Stengv nyăngz munh pah nyăngv bênc săngh pungx hođ nzof gôh, nyâuh ayx năngđ nâyx songđ Canyz tongf tauv songx munh oix cloon ayx. ³ Six yaz êu nâyx đomc yâuf pez ninyh nyâuh woa đangc wâyc zuc max oix phunz yaz tanv nyâuh woax đomc woac tuih, yaz oix nongc nyâuh yâuf pez âyz yaz coong nyăngz woac bênc săngh quaix đangc. ⁴ Max cun yaz mah six tăng Ma-si-đoan nyăngz munh ninyh tauv nyâuh woa phătc nyâuh yâuf pez max zengx bênc lungđ têx, max zâyf cungb nyâuh cănh zuc platb mynb mâyc, njynh cloon buz lauf platb mynb mâyc, wâyc zuc buz pungx stymz nyâuđ phunz nyâuh yâuf pez. ⁵ Yaz nyâyh taih hopđ zuc êu nâyx đomc yâuf pez ninyh đangc yaz, bênc dloih nyâuh pungx hođ nyăngz sâuđ nyâyc, zu yaz ninyh tauv nyăngz săngx huđ songđ naih dloih, bây munh cungb sangđ phunz, max zâyf yac. Songx đungx sâub tuz đungx Songx stoc sâub tuz stoc ⁶ Six zuc săngx nâyx đomc gâyf, laiv tauh songx stoc sâub tuz stoc, laiv lanh songx đungx sâub tuz đungx. ⁷ Muif lanh munh six zuc goib âyx phunz, max zâyf yac, wâyc zuc Tênb-Hungh stăngz munh six goib âyx phunz woax đomc munh. ⁸ Nănh hayh sađ muif hungđ Pôz đungx phunz nyâuh yâuf pez, nyâuh songđ muif dlih naih caux nongc ayx gongx dlayc. ⁹ Năngđ Canyx-Stâub ja coong nâyx, “Nănh ayx nyâuđ quăng stăngc munh zâuđ, “Nănh ayx gongx nyăngz jau stâyv quâyx yămz.”* ¹⁰ Zâu Tênb-Hungh Sađ muif hungđ nhlimb phunz ayx zunb nyăngz munh naih caux songx, Sađ năngv phunz munh naih caux nhlync. Yâuc phunz nyâuh yâuf pez muif hungđ yêmv nongc nyăngz nhlync hopb naih dloih. Yâuc phunz nhlimb bêux lub taih, nyâuh yâuf pez ayx gongx nyăngz dlayc six năngđ munh ayx zunb jengz nâyx. ¹¹ Nănh six ayx phunz nyâuh yâuf pez puv quâyx naih zuy njiênf, yâuc ayx tuz nyâuđ quăng. Năngđ ha munh đungx songđ phunz pungx hođ nyăngz sâuđ nyâyc phunz yaz nzâyz ninyh phunz munh đungx hâuđ Zâu Tênb-Hungh. ¹² Wâyc zuc nyâuh yâuf pez max zâyf cungb stăngc zeen Zâu nyăngz munh sămv nongc nyăngz laiv hungđ, six năngx phunz munh đungx hâuđ Tênb-Hungh. ¹³ Nây six nyâuh yâuf pez nongc seenz stymz stăngc munh, munh đungx songđ oix tanv Tênb-Hungh. Wâyc zuc nyâuh yâuf pez ayx nyâuđ quăng stăngc nănh stiz yâuc stăngc cloon songx munh, songđ phunz munh wâyc nyâuh yâuf pez nyunc lêpc gongx Njâuv Zâu nyăngz cuđ jeenx. ¹⁴ Nănh stiz zu mungc nyâuh yâuf pez đoouc coouv Zâu nyăngz săngx huđ, nănh stiz seenz săngx nyâuh yâuf pez nzongf, Wâyc zuc Tênb-Hungh oix Sađ lub nzongf nyăngz Pôz jaoz phunz nyâuh yâuf pez ô stayx. ¹⁵ Pănh six zuc hâuđ Zâu Tênb-Hungh wâyc zuc Nănh sađ phunz nyăngz Pôz nyâuh max naih woac tym tuz nzuf. Munh nzêmh Phao-lô