10 ¹ Yaz Phao-Lô, nongc Njâuv Zâu nyăngz dlênc nyâuđ jođ nyâuh yâuf pez, naih munh lănv coong yaz cloon nyâuh yâuf pez yămz nyăngz săngx huđ, yâuc dlênc nyâuđ cloon nyâuh tinyh zuc, six yaz max cloon nyâuh yămz, nyâuh yâuc pungx stymz. ² Nănh stiz lănv coong yaz cungb yămz âyz bamh munh nyăngz âyx, six buz coong bux nyâuh yâuf pez đangc, tauv yaz ninyh tauv nyâuh yâuf pez woa, yâuc max nongc phunz yaz pungx stymz lănv phunz nănh stiz nzêmh yaz woax đomc munh. ³ Buz songđ zâyf yămz nây bamh canz, six buz max nongc bamh munh nyăngz zux ix bopc zax. ⁴ Buz max zâyf nongc bamh canz tungh zangc bopc zax, six buz nongc Tênb-Hungh yongb nzongf nyăngz tungh zangc mêtc nzuf yônz-zaz wăn nzongf nyăngz tync, six bopc paic munh nzengz muif hungđ za Gâyf woax đomc munh. ⁵ Buz bopc lunc zanyb ayx lub tăng max phunz munh pâyz Zâu Tênb-Hungh nyăngz gâyf woax đomc. Yămz nyâuđ nyâyh seetb taih nyăngz zux ix buz tuz hingh wâyc phunz Zâu Njâuv Zâu nyăngz gâyf cun. ⁶ Buz bênc nyâuđ zu nyâuh yâuf pez ayx âyz buz nyăngz woac woax đomc munh. Laiv lanh max âyz buz songđ tingc woax lanh nyăngz Stoif. ⁷ Nyâuh cungb mangc pâyh sangc cungv, yămz nyâuh yâuf pez woa naih laiv lanh nyâyh coong nănh six ayx Njâuv Zâu nyăngz munh năngđ laix, buz lauf săngh Njâuv Zâu nyăngz munh năngđ nănh nâyx. ⁸ Zâu Sađ quênh phunz yaz, Yaz songđ nzeetx blangc ah tix, Zâu sađ nyăngz quênh six wâyc nongc zâyv nyâuh yâuf pez, max zâyf nongc mêtc nyâuh yaz songđ max numđ nyayz. ⁹ Yaz max oix nongc nyâuh yâuf pez nyâyh coong yaz ja nâyx zây jeenx nongc hukb nyâuh yâuf pez. ¹⁰ Naih đomc munh lănv coong, “Phao-lô ja nyăngz jeenx Niđ nzongf, six toix mynb Nănh seenz lanz nzongf, Coong woac yâuc max naih laiv hungđ stuyh muc.” ¹¹ Coong nâyx hungđ woac nyăngz munh six zuc pâyz tuz coong, “Yaz max cloon nyâuh yămz nyăngz săngx huđ, Yaz ja jeenx coong laiv hungđ, yaz ninyh tauv nyâuh woa, songđ ayx woax hungđ gôh. ¹² Buz max nzađ zoz buz pây cloon woax đomc zanyb lub nyăngz munh ayx ah peob, yâuc max nzâyz buz ninyh pây nănh stiz, nănh stiz cănh pây stiz munh oongx. nănh stiz zoz stynb stayđ nongc ayx tungh gaob. ¹³ Six buz max nzeetx blangc pitc hungđ cumh pâuz, buz cungb nzeetx blangc Zâu jaoz phunz buz nyăngz cumh pâuz. Njynh cloon buz yămz nyâuh yâuf pez mungh tongx ayx nyăngz cumh pâuz. ¹⁴ Buz max zengx ninyh tauv nyâuh yâuf pez woa, buz max nzađ nzeetx blangc quaix đangc, wâyc zuc buz bêc nzâyz Njâuv Zâu nyăngz cuđ jeenx ninyh lănv phunz nyâuh yâuf pez mungv quaix nzof gôh. ¹⁵ Buz cungb nzeetx blangc cănh tanv buz ayx nyăngz cumh pâuz, max zâyf nzeetx blangc pitc tauh ayx nyăngz cumh pâuz. Six wâyc zuc buz naih tync mungc, six mungc nyâuh yâuf pez naih seenz stymz ayx cumh pâuz yongb pâu quăng staox. ¹⁶ Six buz oix lănv cuđ jeenx phunz pitc đoif stâyz phangz nyăngz yâuf pez jeenb mungv, buz max zâyf oix nzeetx blangc lănv pitc tauh munh ayx nyăngz cumh pâuz. ¹⁷ Six coong laiv lanh năngđ oix nzeetx blangc, bix nzeetx blangc zanyb Zâu ayx nyăngz cumh pâuz. ¹⁸ Max zâyf woax đomc cănh tanv nănh six munh gongx bix nzăngđ tuz stipx pôz đêh, cungb tuz Zâu tanv woax đomc munh nzăngđ tuz stipx lêc đêh. Phao-lô coong za nyăngz cumh pâuz munh