1 ¹ Yaz Phao-lô tuz Tênb-Hungh âyz nănh nyăngz oix êu yaz taih ayx Njâuv Zâu Yê-su nyăngz cumh pâuz munh, cloon pănh nyăngz yâuf pez Sôtv-then.” ² Nâyx zây jeenx zuyz phunz yămz Cô-lin-tô Stengv Zâu nyăngz Huyđ-đăngb munh. Yâuc cloon Njâuv Zâu Yê-su songc mengc săngh woax đomc Đăngb-zengh nyăngz munh, Yâuc tuz Tênb-Hungh êu taih ayx nănh nyăngz Đăngb-zengh Yâuf pez, Phunz cloon muif hungđ pec stingx yămz nzêux muif đoif, six coouv Njâuv Zâu Yê-su nyăngz bux woax đomc, Zâu six ayx nănh stiz nyăngz Zâu, Yâuc ayx pănh nyăngz Hungh.” ³ Jođ pănh nyăngz Nzangc pha Zâu Tênb-Hungh cloon pănh nyăngz Njâuv Zâu Yê-su Sađ pôz sađ pengh oonz phunz nyâuh yâuf pez ô stayx.” Phao-lô hâuđ Tênb-Hungh ⁴ Yaz muif dlih wâyc nyâuh hâuđ Tênb-Hungh, wâyc zuc nănh nongc Njâuv-Zâu Yê-su sađ pôz phunz nyâuh yâuf pez ô-stayx. ⁵ Wâyc zuc nyâuh yâuf pez cloon Njâuv Zâu Yê-su songc mengc săngh, nyâuh songđ puv quâyx muif hungđ naih dloih nzuf, tăng nyâuh coong nyăngz woac, cloon nyâuh naih nyăngz yeetx stong bănh sangz.” ⁶ Wâyc zuc buz stăngc Njâuv Zâu ayx zanyx manyf woax đomc woac, Njăpc tuz wăn yămz nyâuh yâuf pez nyăngz nyâuđ.” ⁷ Wâyc nâyx, nyâuh yâuf pez zu Njâuv Zâu Tênb-Hungh Yê-su năngx hynđ yangh seetb taih woax zanyf, Pănh max sămv laiv hungđ sâuđ nyâyc.” ⁸ Nănh six oix stăngc phunz nyâuh yâuf pez zeen tuz wăn tauv (môtc zapz), tauv Zâu taih woax noib nyâuh yâuf pez songđ dlăngc max naih wâyx.” ⁹ Tênb-Hungh six coouv tuz Wăn, Nănh êu nyâuh yâuf pez taih cloon Nănh nyăngz toonz songc phănc, Six njâuv Zâu Yê-su, pănh nyăngz Zâu.” Huyđ đăngb phunz đanv ¹⁰ Songx yâuf-pez lex, yaz tym Njâuv Zâu Yê-su nyăngz bux jođ nyâuh yâuf pez six zuc songc ah zâux woac, Max tuz phunz đanv ayx sax peob, six zuc hopđ stymz dlongh âyx. ¹¹ Yâuf pez lex! Cơ-lô nyăngz pyau munh lănv bux yaz coong, “Yămz nyâuh yâuf pez woa naih tinyh nzengz nyăngz dlayc.” ¹² Yaz songđ coong, “Mănv cănh naih mănv nyăngz woac coong “Naih lanh coong, “Yaz lêpc Phao-lô, “Naih ah phanx coong, “Yaz lêpc A-bô-lô, “Naih pitc tauh coong, “Yaz pêpc Phê-rơ, Năngx naih phanx coong, “Yaz lêpc Njâuv Zâu.” ¹³ Njâuv-Zâu zuc zeb ayx sax đomc mah? Phao-lô zuc tingz woa săpc đăngc zax tayv nyâuh Yâuf pez mah? nyâuh yâuf pez tym Phao-lô nyăngz bux ayx quaix womz nyăngz gâyf mah? ¹⁴ Yaz hâuđ Tênb-Hungh, Blătc nzuf Ri-butv, Cloon Gai-utv, Yaz max stăngc laiv lanh ayx quaix womz nyăngz gâyf." ¹⁵ Max naih laiv lanh hayh coong, “Buz tingz Phao-lô nyăngz bux ayx quaix womz nyăngz gâyf phunz laiv lanh yâuf pez.” ¹⁶ Yaz songđ tuz stăngc Tê-pha-na nyăngz pyau munh ayx quaix womz nyăngz gâyf, Yaz max săngx tuz stăngc pitc lanh.” ¹⁷ Njâuv Zâu max zâyf êu yaz ninyh stăngc munh ayx quaix womz nyăngz gâyf, Six nănh êu yaz ninyh lănv cuđ jeenx, Max zâyf nongc bamh munh nyăngz Tongb-manyh lănv Njâuv Zâu nyăngz săpc đăngc zax, bix max naih stuyh muc.” Njâuv Zâu six Tênb-Hungh nyăngz tongb manyh ¹⁸ Six woax đomc zuc mêtc nyăngz munh mangc nzaox săpc đăngc zax nyăngz Gâyf six pênx gâyf vutx, Six pây cloon pănh tuz Njâuv nyăngz munh six săngh Tênb-Hungh nyăngz quênh lanyf.’ ¹⁹ Năngđ Canyx-stâub ja coong, “Yaz mêtc munh noongh nyăngz Tongb manyh, “Yaz yâuc oix quanyf munh noongh nyăngz zux ix tuih nzuf.” ²⁰ Tongb-manyh munh cloon hođ đăngc nyăngz munh lex? Yâuc nzeetx blangc nyăngz munh lex? Tênb-Hungh max zâyf oix pyênv nâyx yeenh stâyv nyăngz Tongb manyh munh oongx nzongf mah?” ²¹ Bamh canz munh max hayh pâyz tuz Tênb-Hungh nyăngz Tongb manyh, wâyc năngđ nâyx nănh songđ nongc munh stunx oongx nyăngz woac, Njâuv zeen Nănh woax đomc munh.” ²² Yiu-thai munh naic jix-caox njingc mangc, Hi-lapc munh yâuc lov Tongb manyh.” ²³ Buz lănv Njâuv Zâu zuc tingz săpc đăngc zax nyăngz âyf, Yiu-thai munh yâuc nzêmh nyăngc năngđ njămc yămz mâyc, Max zâyf Yiu-thai munh nănh stiz yâuc stunx pênx munh vutx nyăngz woac.” ²⁴ Six wâyc Tênb-Hungh êu taih nyăngz munh, max jez Yiu-thai munh mah six Hi-lapc munh Njâuv-Zâu six săngh Tênb-Hungh nyăngz Tongb-manyh cloon nănh stiz nyăngz quênh.” ²⁵ Wâyc zuc Tênb-Hungh oongx nzongf nyăngz dlayc, Songđ năngx lemđ têx, bamh-munh nyăngz Tongb manyh, Tênb-Hungh đoonh nzongf nyăngz tync, songđ năngx yongb têx, bamh munh nyăngz jab.” ²⁶ Songx yâuf pez lex! nyâyh mangc jađ geh! Tênb-Hungh êu nyâuh yâuf pez taih woax zanyf, Tongb manyh munh yâuc max naih đungx, Naih quênh cloon nzangc tăng nyăngz munh yâuc max naih đungx.” ²⁷ Six Tênb-Hungh nongc bamh munh stunx oongx nyăngz dlayc ayx phunz Tongb manyh munh zuc nyayz, nongc bamh munh stunx lanz nzongf nyăngz dlayc ayx phunz bamh munh stunx yongb nzongf nyăngz dlayc zuc phatb puf.” ²⁸ Nănh nongc bamh munh stunx hav pênx yaf tăng max săngh nongc bamh munh mangc stam nyăngz dlayc, nănh six mêtc nzuf bamh munh nongc seen nyăngz dlayc.” ²⁹ Tênb-Hungh ayx năngđ nâyx max naih laiv lanh yămz Nănh nyăngz cah đangc năngx nzađ nzeetx blangc.” ³⁰ Wâyc coouv woangz nănh, Pănh yâuf pez tuz yămz Njâuv Zâu Yê-su nyăngz cah njaf, Tênb-Hungh nongc Njâuv Zâu ayx pănh nyăngz Tongb-manyh, Tênb-Hungh nongc Njâuv-Zâu phunz pănh cloon nănh hopđ nyâuđ, pênx Nănh nyăngz Đăngb-zengh munh, Suc pănh phunb đangz lauf gâyh đutb Stoif.” ³¹ Năngđ Canyx-stâub ja Coong, “Laiv lanh oix zanyb ayx lub, “Six zanyb Zâu ayx nyăngz cumh pâuz.” Phao-lô lănv tauv Njâuv Zâu zuc tingz yămz săpc đăngc zax nyăngz dlayc