2 ¹ Songx yâuf pez lex! Tauv yaz ninyh tayđ nyâuh yâuf pez, yaz max zâyf nongc cuyb mungv nyăngz woac, mah six bamh munh Tongb manyh nyăngz woac, Lănv Tênb-Hungh pinyx vâyv nyăngz jau.” ² Tauv yaz cloon nyâuh yâuf pez yămz woax zanyf, yaz tingc nyâuđ cungb oix lănv Njâuv Zâu Yê-su zuc tingz yămz săpc đăngc zax nyăngz dlayc, Pitc hungđ yaz max coong, “ ³ Wâyc zuc yaz ninyh tauv nyâuh yâuf pez woa, yaz numđ cumh nzav tuz stynb synx nzuf.” ⁴ Yaz lănv nyăngz woac cloon coong nyăngz Gâyf, max zâyf nongc bamh munh nyăngz Tongb manyh woac blangc, Six nongc Singx lingh phunz yaz nyăngz quênh.” ⁵ Năngđ naz phunz pănh yâuf pez tăpx pănh zeen nyăngz seenz stymz yămz Zâu Tênb-Hungh nyăngz quênh, max zâyf pangc yămz bamh munh woax đomc Tongb manyh.” Tênb-Hungh nyăngz tongb manyh ⁶ Yaz lănv Tongb manyh nyăngz gâyf phunz pâyz Gâyf nyăngz munh mungv, Max zâyf âyz nâyx yeenh stâyv bamh canz naih lanyf naih quênh nyăngz Tongb-manyh, Nâyx hungđ bamh munh nyăngz Tongb manyh six hayh paic nzuf.” ⁷ Yaz lănv nyăngz Tongb manyh, Six max zengx plongx yangh nyăngz Tongb manyh, Tênb-Hungh pinyx vâyv nyăngz Tongb manyh, Max zengx zâyx nâyx nomz bamh canz woax zanyf, Tênb-Hungh nongc nâyx hungđ Tongb manyh phunz pănh tuz gwăngz-eng.” ⁸ Cun nâyx yeenh stâyv bamh canz nyăngz munh max naih laiv lanh pâyz tuz nâyx hungđ Tongb manyh, Six coong nănh stiz năngđ pâyz têx, Nănh stiz six max zoz Gwăngz-eng nyăngz Zâu tingz ănz săpc đăngc zax.” ⁹ Năngđ Canyx-stâub ja lănv coong nâyx, “Mâyc max zengx tuz phătc quaix, “Bah noomh max zengx tuz numđ quaix, “Max zengx naih laiv lanh nyâyh tuz tauv nâyx đomc dlayc, “Tênb-Hungh bêc bênc săngh phunz stăngz nănh woax đomc munh nzof.” ¹⁰ Six max zengx plongx yangh nyăngz dlayc, Tênb-Hungh nongc Singx lingh phunz pănh pâyz, wâyc zuc Singx lingh six hayh zah tâuz tuz pâyz tauv Tênb-Hungh đôz nzongf nyăngz zux ix yâuc hayh zah tuz seetb. (Ê-sai 64:4-) ¹¹ Mănv cănh naih mănv nyăngz stymz nyâuđ nyâyh nyăngz dlayc, lauf năngđ naz, cungb Tênb-Hungh nyăngz Singx lingh nzăngđ hayh pâyz tuz Tênb-Hungh nyâuđ nyâyh.” ¹² Pănh max zâyf stipx bamh canz nyăngz stingz dlănh, Six pănh stipx tăng Tênb-Hungh phunz taih nyăngz Singx lingh, wâyc phunz pănh pâyz tuz muif hungđ.” ¹³ Nâyx đomc dlayc yaz max zâyf nongc bamh munh nyăngz Tongb manyh nzaox nyăngz woac lănv, “Six yaz nongc Singx lingh nzaox nyăngz gâyf lănv phunz naih Singx lingh nyăngz munh mungv.” ¹⁴ Laiv lanh max naih singx lingh, Six max hayh tuz stipx Tênb-Hungh phunz Singx lingh nyăngz sâuđ nyâyc, nâyx đomc sâuđ nyâyc, Nănh stiz stunx nâyx đomc six oongx nyăngz dlayc, wâyc zuc naih Singx lingh nyăngz munh nzăngđ pâyz tuz nâyx đomc sâuđ nyâyc săngh nongc.” ¹⁵ Naih Singx lingh nyăngz munh nzăngđ hayh nyâyh tuz seetb nâyx đomc dlayc, Six max naih laiv lanh hayh tingc tuz Nănh, “Canyx-stâub ja Coong, ¹⁶ “Laiv lanh hayh pâyz tuz Zâu nyăngz nyâuđ? “Naih mănv hayh nzaox Nănh? (Ê-sai 40:13-) “Six pănh naih Njâuv Zâu nyăngz zux ix.” Ninyh lêpc bamh munh six longđ