Etah-oks_2co_text

Ẹpan 3

¹ Itẹ tọmẹ ọ uyeyi tiwu bilamo họn? Ti me ni ẹwora ẹnanẹ bẹ wọra tiẹpan nẹnẹ fura inuba akọne ẹrọ ẹbẹn na. I ti ni họn? ² Anẹ ẹbẹba aya wọ tọ ẹwora ọnẹ ti ye tiye nu na bẹ wọra i tọọ́ uloko, nẹnẹ bi din erokoro fẹnyan din na gan na. ³ Ni ya yẹn ka anọ a wa ẹwọra fura ọ ọ́ Ẹkraist, one na. Wọ ofiyẹpan i tọọ́ utun na. Bi ma wọrẹ aka ikokori na ama akọ Osibina nẹnẹ wọ ẹrọ na ẹ ẹ ẹfunwẹnfunwẹn. Bi ma wọrẹ wọ ọtarẹ, ama wọ ọtarẹ nẹnẹ wọ erokoro uloko na. ⁴ Ọnẹ a wọ ẹyẹranyẹn nẹnẹ ti su Ẹkraist orikpokpo Osibina ẹrẹn. ⁵ Ti ma wa odi siye i tọ iwu nẹnẹ ti ni ẹnaka ẹpẹnkẹpẹn i tọ ọrẹ ama tọọ́ odi siye wọ Osibina ẹfa ṣa. ⁶ Osibina e siye tu okotoro nọ ọọ́pa owowo. Ọnẹ awọọ ọọ́pa na wọ ẹwọra ama awọ ẹfunwẹnfunwẹn. Ọnẹ bẹ́wọra na ada wan nọ oro, ama Ẹfunwẹnfunwẹn a da wa no ẹrọ. ⁷ Akana, utunfo ẹka - nẹ bẹ wọra wọ ọtarẹ na - aṣa ugbugbodi ọnẹ gbe ka Israel egben bi me din balẹ Imoses ayẹn. Ọnẹ wọ ugbugbodi nẹnẹ wọọ́ iyọ ayẹn, ugbugbodi nẹnẹ ẹ ṣala na. ⁸ Gana eke siye wa nọ ugbugbodi utun nẹ wọ Ẹfunwẹnfunwẹn eke siye da? ⁹ Adaka utun obibe su ugbugbodi, gana gana utun ọṣẹrẹ utun e ke siye ma nọ ugbugbodi aá! ¹⁰ Ikuwa ẹka, ọ nẹnẹ ta yẹ fọ siye ugbugbodi na eme pile wọ ugbugbodi okuru nọ ọnẹ, ubaka ugbugbodi nẹnẹ fọrẹ ya na. ¹¹ Ka ọnẹ nẹnẹ ṣun ma yọ na su ugbugbodi, gana gana ayẹ ẹkẹna wa mọ ne bila na e ke siye su ugbugbodi aá! ¹² Ubaka ti su ọfayen yẹrẹ ọnẹ ti su uloko. ¹³ Ti me wa akọ Imoses na, nẹnẹ fọ ẹsa ju ayẹn ubaka Israel egbeniforo abẹ me di balẹ yọ ayẹn akọ ugbugbodi ọọ̀ta siye e ṣala a yọ na. ¹⁴ Ama bọ ẹyẹ ṣile. Ṣa re amọnẹ ọgbọna ba kẹ gan mọ ọọkpa osusun, esa ọnẹbẹ ki wa mọ. Bẹẹ́ me tiyẹ fura, ama Ẹkraist da ka Ẹkraist iwogbigben bi di ye ti yẹ e fura. ¹⁵ Se ra amọnẹ, ba kẹ gan mọ Imoses, esa ọnẹbẹ ti bọ uloko. ¹⁶ Ama ẹfẹna nọọ́ Idu ṣa na, ẹsa ọnẹbẹ bi tiyẹ fura. ¹⁷ Akana Idu aya wọ Ẹfunwẹnfunwẹn. Ẹfẹna Ẹfunwẹnfunwẹn nẹ wọ Idu ẹfẹna ma na iwobi wa mọ. ¹⁸ Akana atọ fẹnyan, aka ayẹn nẹnẹ bi me ri na, gba ugbugbodi nẹ wọ Idu ẹka na. Ti wọọ́ obila wọ ugbugbodi nẹnẹ wọọ́ ọlọn ọyẹrẹ nẹ na yọọ́ ugbugbodi nẹnẹ wọ ugbugbodi ọbẹn yọ ọbẹn, akọ e siye wọ Idu ṣa na, nẹnẹ wọọ́ Ẹfunwẹnfunwẹn na.