4 ¹ Ajadalri, matsiadarroca pjia nomanda, matsiadarroca pjia. Tsotsobo shoca njaji pitjí pitaji yamacati sho piecoa naco. njite njaji pitsicolre cayoca naji papoco cabra sho iorrococapewa jiipana Galaad nakjoite. ² Njite njaji pietsa, cayoca naji papoco oveja sho nayoeji ioya iiyo, namoto cádanaco nacolri njitena. Cacoemape toa pjiomi njite corrin canacaica apjewi nanakjoite. ³ Matsiaca irraica njaji pinomaya patilla iwawa Irico sho; matsiadalrica jliaji pinoma. Njite njaji picacoda matsia pacapacana cayoji patilla payoaji sho njaji piitalri yamacati wana sho. ⁴ Njite pinorsiapji, cayocani Iricayosho jliaji nawapa carroda nakjote yenondalri nanaitjanda David irso jiipada matsiaperri sho, njite nerroeta Irinaco aima tsolrodaonai idanaitape nainoaca cádanaco oowi ricó. ⁵ Njite njaji píini, cayocana yamana nérri yenipe sho, yamana nérri iñjacaoe potirapji ricó. ⁶ Lripjeya toa jalrecani, njite deepi jiyapakenaotsa, noawatsa Irinacojle jliaji jiipana pomenine, njite Irinacojle jliaji jipana tomonetsa inciensona. ⁷ Pjiomi naco matsiaca pjia, pjia nomanda njite corrin pacapa apada matsidalri pinaco. ⁸ Nomanda, pino noinai Líbano nacojle. Pinoatsa noinai Líbano nakjoite; pinoatsa Amaná nakjoite, jiipana Senir njite Hermón nakjoite, nawapa cawa irikjoite njaji kerrapi njite njaji yáawi tsakja. ⁹ OOpi pidee nocaolre, nokitsidoa, noyarroma; oopi pidee nocaolre picapa cádanacotsa njoa, Irisho jliaji pipatjepi pinacodalri. ¹⁰ ¡Matsiadalrica jliaji pipeyo shopa njoa, nokitsidoa, noyarroma! matsiadalri pjaca pipeyoshopa njoa jaicotjeda iana ioya, njite matsiadalri pjaca pipomenica naoya njaji apjetsida pomeniajai. ¹¹ Mapaa imotowa pinomaya ioya, njite; mapaa njite íiniati imotowa pienene yapjite. Njite pi-tsayan íitan cayocani Líbano íitan sho. ¹² Nokitsidoa, pjia noyarroma, cayoca pjia paniapjida corricawatoa coca shewa niini, ima corricatoa coca jiyapa piinai. ¹³ Njite cayoca jliaji pidada jaico matsiane sho irsocada aima iinaca matsiaperri minitsa, jaico alheña-perri ípitan, ¹⁴ nardo njite azafrán, cálamo njite canela njite aima pja pomeniperri naoyawaca, mirra tsakja njite sábila njite pana pja tsakja nacayosho-perri, matsiaperri. ¹⁵ Cayoca pjia ooni matsiajai sho iamarracadawa jiipana Líbano nakjoite. ¹⁶ Pjia caolri jéeri imotokema nakjoitédalri, pipjiena. Njite caolri jéeri imotokema nakjoitédalri, pipjiena nodada naco picadácarro noitan iawa. Njite roaco, pinoena noikjaolre, pjia noomanda. Pinoena piñja piñjaoda nomatsietanda pipia.