3 ¹ Nomaji tja déepi ricó nomácawa Irico jliaji noomanda, mitsa corrin noketani. ² Niini noaco norsowaca:"Noaca toa noma jliaji nomanda pjiomi yacaalre ricojle, yacalrecoa Irico, nacoamitsa njaji inipo." Noaji piatja nomani mitsa corrin noketani. ³ Njaji iwapacape naoketa njoa naji cádanaco nayofieta nawapakje jliaji yacaalre. "¿Njite notatja njomiiona nacapa cada jliaji nomanda?" ⁴ Njite kjeyatsa njapodam, noena noketa jliaji iomacada njoa.Njopa njoeyoani kjaida njite corrinatsa nocada Iriawa. Nodeni njodoa ípana Iricojle, romaa cawa Irico, rocadacawa pia noinitawa rowawa Irico. Caacocano narso njaji apana inaitjepe. ⁵ Sháa inaitjepe Jerosalén Iricoperri, nooma icaiteca norso yacoti ajádalri sho néepitana naco njaji maficalri awacada Iricope, corricaotsa imacarroca nocapaca nomanda jinaco cádanaco njoa. Caacoca rsoaji íinarro rorsowacatsa. ⁶ ¿Cocao jliaji tiye íitaca pacaplri inoca jalrapocolri rikjoite, pomenidalri incienso sho njite mirra tsakja, Iritaie pomenidalri nawendenda njaji iwendecapeni? ⁷ Salomón iorsoacarroita jliajinaderri; sesenta tsolrodaonai Israel Iricoperri iwapani. ⁸ Njaji tsolrodaonai yanjicape inoacawa owi ricó matseta sho. Nacoanami nadejica namatsetani nanacoa, ima aimaca cafainaperri déepi ricó. ⁹ Salomón inaa nanaitjaca jlieco carrofiawa jaico sho nadeji Líbano Irikjoite. ¹⁰ Njaji nema carronao nanatjani oalratape sho; njite Iriwapicawa naco nanaitjani owirro sho, njite Iriofacawa naco nañampani yamacati irraimaca sho. Njajiji inatjepe nadeji nacaolre sho namatsieta cádanaco Iriwawa Irico jliaji jlieco carrofia. Caacoca rsoaji inarro narso njaji inaitjepe Jerosalén Iricoperri irso. ¹¹ Sha inaitjepe Sión Iricope, imoto icapa jliaji talricanati Salomón njite Irinaco jliaji corona jliwidanaco jlidoa icadanda iririso jliada pia jalredaoca jlitaca rsoaji Iriino, jliadaa pia catimani.