9 ¹ Jliajĩ yajíkjeti lrinaitja lríipanao: lriemeta sietena topjí lripjeo lrirraji matsia. ² Lriyana maficalri íipe, lrinaitja tsakja lrirrao njite lricadana mesa nacona. ³ Njite lrina rsoajĩ lrirsodarro rsorrá carrowa yenondalri nakjoite rowanácarro njite. ⁴ ''¿Inoena sha iomacape irsowao iyekjao'', njite sha marsocape iwaopiakje, ⁵ ''inoena iñjácarro njite irrácarro jliajĩ irraodati nonaitjanda. ⁶ Imakena ioiawa imajican wadee mayamica sha; ioma irsowao yanjikjeo. ⁷ Coca cadaa icaite namatsicana njajĩ icacaperri apjetsida iicao, icamitsaotsa nacoita caotsaoni. ⁸ Niini macoitatsa njajĩ icacaperri apjetsida íicao wadee matsica nacapaca irso; pimayacanta lriwaopiakje jliajĩ cajikjedalri niniotsa lripeyo watsa pjia. ⁹ Picananta jliajĩ yajicada niniotsa lrirso pjaotsa aima jliajĩkjewa; picananta jliajĩ inaiki matsiadalri niniotsa lrirso pjaotsa aima lriyekjao ¹⁰ Yajicadaca jliajĩ ifiocadawa Dio iwana, njite jliajĩ yajicada Lrinaco jliajĩ Mamatsicana dalritsa, icatsa jliajĩ irsocada aima iwaopiakje. ¹¹ Lrimatsiaca ikjaote jliajĩ yanjikjeti pirsolri piofá watsa aima walria jalredaoca lrico. ¹² Matsia watsa pjia pirso cadaa yanjikjeti, mitsa picaite cadaa corrica coadaca pirso, pjia tsaotsa jirrapita lrikjaote.'' ¹³ Rsoajĩ inarro corri darrotsa irso yanjikje; icamitsa manjica cano, corrin coca roanjí. ¹⁴ Romoto rofawa pantinomanjle yenondalri naco pja yacaalre irso. ¹⁵ Ikena rowanaca njajĩ jiyapanjicapewa inipo lrico, njajĩ inaiki matsiapetsa yanjicawa, njite roaco narso: ¹⁶ ''Inoena noikjaolre sha manjicaperrin tsa,'' Njite ronaa nacaiyeca narso njajĩ mawaopiakjetsa: ¹⁷ ''Joiwi pjatoa pairraca jliajĩ ooni pañaitonda tsa, njite joiwi pjatoa panjí paiñjaca jliajĩ iñjaodati dawacalritsa.'' ¹⁸ Mitsa corrin nanjí natsomitaca mayamicalri njemi cadaa rorso, itsomitacape irrirrí.