5 ¹ Pjia nirri, piwapa pjimi piicao matsia njajĩ noajikje; pimjeco matsia pjinacolrico picoadatácarro njajĩ nocadalri pianjí, ² cayoatsa pianji caacoca pjia cajikjédalri sho ima piajĩca coajĩca caacoca pjia pirso capoa yajikjeti ³ Ima rsoajĩ inarro cainirridarro cawilredarro romotoeta yacoti matsiaperri pjemica, potiyaperri sho, corriperritsa pawada inaitjaca parso maatsi, ⁴ mitsa pjeepa cadaa njajĩ rocaiterri lrinaitjaotsa parso maatsi, ima roacoan rsoajĩ inarro jipitiperri pjáaca awiñada ioya, kemanaité pjáaca matseta ioya yamemadalri iema. ⁵ Njajĩ ronaitjalri nadeeca pjá mayamicalri ikjaolre; pjiomi njajĩ ronaitjalri icamitsa nadeca pjá irrirrí lricojle. ⁶ Corri coadaca rorso mayamica inaiki roikjaote. Ronaitja romatsicanao; corrinatsa roajĩ a kjerreca roawa. ⁷ Njite panaya, noenipenaipe, jimi norso; icoadata njajĩ yacoti nocaiterri irso. ⁸ Shenawa téeco rooya rsoajĩ ínarso, matsawa roopana lricojle. ⁹ Cayo cada pinaitja corriotsa pícadaa carroca inaiki matsidarro imatsiketa picafica yempeti cádanacotoa pjia; ¹⁰ corriotsa apanatsa inaiki pioya icatimatacawa piyarroaji sho; corriotsa nadé carroca piyarro naapana lricojle njajĩ apanatsa inaiki. ¹¹ Ninintja piketemina, icamitsa coyolreca pjia corri capoa piwapa matsia pidada, njite corri capoa piwapa matsia njajĩ pirsolri pia. ¹² Ikenantja picaiteca: ''¿Coada corri pia njoepa njonirri icaiteca njoa? ¿Coada corrin njoepa nocanantashona icaite cádanaco njoa? ¹³ Corrin njoepa njajĩ nocananta shona icaiterri norso, corrin nocoadata naaco nacaite cádanaco njoa. ¹⁴ Wadeepe, wadeepe nomatsicacawa matsiajirri napecolrico njajĩ nofacawenai.'' ¹⁵ Pioma cadaa picatimatacawa inarro iapiya, pioma píinowa, píino yápiya carrotsa picatimatacawa. ¹⁶ Piwapa pidada píino irsotsa. Manaitjatsa pidada sho apama yápiya rooya. ¹⁷ Mjetatsa macadatsa jliajĩ matsiadalri ipeyokjeti irsolri iapiiawaca apáana irso. ¹⁸ Catimadarroca rsoajĩ píino, rsoajĩ pjitanda píinowa yempeti cádanacotoa sha, ¹⁹ ima pirsodarro piomandacano; picadaa rotimata pjia, picadaa rodada icatimata pjia caidalritsa. ²⁰ ¿Nirrí, macadatsa inarro cawilredarrom shewaca pjia, Macodaitatsa ínarso cainirritetsa? ²¹ Dio iwapa icapa matsia pjiomi fa coajĩca wanaitjaca njajĩ cayoperri. ²² Jliajĩ inaiki jíwa imatsicanati ricó lrinaitjandatsa lrisowawa, njite jliajĩ lrimatsicanatsa lripresotacani, corrinatsa lrioma lrimacaca lrioiawani. ²³ Icamitsa mayamica njajĩ ianiki cayoperri corri capoa nacacoadata njajĩ yacoti nacaite cádanacona; mayamicani lrimajican imatsa.