4 ¹ Jimi noenipe, lricananta shopa jliajĩ apada jinirriti, njite iwapa jimio itaitacarro iajĩca jliajĩ iajĩkjeti. ² Ima matsiadalrica njajĩ nocanantashopa, njite canacaidalricani. ³ Yempetida pia tsakja njoa, kjanirri-dalri tsakja, njodoa ipeyonda piaca njoa, apadanalritsa narsoca. ⁴ Njonirri icananta pia njoa, lriaco norso cayojĩ: pimatsietaotsa picaolre ricó njajĩ yacoti nocananta shoda pjia; pimatsietana picaolre-rico matsia njite pinaitja cayojĩ noaco icaite capisho. ⁵ Pioma pirsowao yanjikjeti njite iyeekati; mamacoadatatsa njite mamaodacatsa naoya naji yacoti nocaitenjĩ pirso; ⁶ mamacatsa jliajĩ yanjikjeti njite jlia watsa iwapaca pjia; piomani njite jliawatsa iyometa pjia. ⁷ Jliajĩ yanjikjeti icatsa jliajĩ canacaidalri pjacani, nini pioma jliajĩ ianjikjeti njite pinaitja pjiomi iyeecati pirso carroatsa jliajĩ yanjikjeti. ⁸ Pipeyo jliajĩ yanjikjeti njĩite lricadawatsa canjikedalrica pjia; lricacoadataotsa pjia piomacadanaconi. ⁹ Lri cadaotsa canjikjetalrica pjia caijĩ apada corona cacoadadalri sho. ¹⁰ Pjimi matsia norso noenipe, njite piwapa pjimi matsia piicao njajĩ yacoti nocaiterri pirso niniotsa piofacawa aima jamolri jalredaocalrico. ¹¹ Njo watsa icananta pjia coajĩca pirsocarro yanjikjeti; nocanantaotsa pjia wade watsa pimatada catoa. ¹² Pia cadanacoatsa piapowalrico corriwatsa coca idanata pjia njite pjiecocadanacoatsao, corriwatsa pitoda carroca pjipa. ¹³ Mamacatsa pioiawa njajĩ icanantakjeti, macadatsa pioyaona; pimatsieta pirsowawana, ima icatsa njajĩ icadalri caafica pjia. ¹⁴ Manaitatsa cayoñji nanaitacapisho njajĩ matsiperritsa iwaopiakje njite manaitatsa nanaitacapisho njajĩ inaitacape namatsicanawa. ¹⁵ Pjiena naoya, manaitatsa nacayosho, pimacana njite piawa naoya pakja lrico inipo. ¹⁶ Corrin namawadacaca njajĩ matsiperri ate nanaitjaca njajĩ matsirri. Njite corrin namawadacaca ete nanaitjaca maatsi apjetsida irso. ¹⁷ Icamitsa pakjamicana matsidalri sho njite irroati sho tsakja. ¹⁸ Matsiadalrica napowa njajĩ inaiki matsiaperri caijĩ jérri icananialrr sho piyomi cádanaco, njite kjaida cayaocani jérri jirra cádanaco pja. ¹⁹ Nawaopiakje njajĩ matsiperri cacanijĩ cadaocadajri sho; corrin najĩ cocaca njajĩ nanaitalri. ²⁰ Noenipe, pjiwapa pjimio njajĩ nocaiterri; picada njewa pjinacolrico. ²¹ Macadatsa njeyapaca pioya; picadaa naofaca picaolre rico. ²² Ima naofa shopaca njajĩ shepacape njajĩ nocaiterri ima jlikjaidataca nadada lrico. ²³ Piwapaotsa pjia njajĩ piajĩkje jalredaoca imatsicana ioya. ²⁴ Pjienita teeco pioyao njaji yacoti matsiperri njite pjienita tsakja teeco njaji yacoti imañetacada apjetsida. ²⁵ Picapa matsia pipeyajle lrinacojle jliaji piomalri piocawa ikjaolre. ²⁶ Picapa matsia piicao coajĩca piacao njite matsia watsa piacawa piapowa lrico. ²⁷ Mamawadacatsa wadee corrica pinaitja matsia apjetsida irso njite pjienitacawa matsidalri ioya.