¹ Yanna ca dxi que la?, bedanda' guni César Augustu ti ley ne bisenda be igaba de guiraa binni ni nabani ndaani guidxilayú. ² Ndii guca' nirudó guenda rigaba binni dxi nacaru' Cireniu xaique xtii Siria. ³ Ngue' runi guiraa cabe guyee cabe xquidxipe cabe ne guica' lá cabe lu xigaba que. ⁴ José laca biree de Galilea, dede guidxi Nazaret, ra ca ma Judea, ra ca la ma guidxi xti David ni laa Belén, ti laabe zeedabe de lisaa xtii David. ⁵ Laabe yeicá laa be ra que' ne Maria, ni ma bidii xtiidxa guichaganaa laabe ne ma naca xiiñi. ⁶ Yanna laga nuu ru cabe ra que la?, bedanda' dxii gapabe xiiñi be. ⁷ Laabe gupa be ti xiiñi be, badu lugo'la xti be ne bichenda be lá lari gueela ne guláqui be lá ndaani ra roo mani gui'xi, ti ra que la? ma gaxti ra guiaana ca be. ⁸ Ra que nuu caadxi ni rapa dendxu' ne riaana ca ra que', rapa ca dendxu' xti ca huaxhinni. ⁹ Ti Angel xtii Señor bihuinni ra nuu cabe ne guenda nandxó xtii Señor bizaani laacabe ne laacabe bidxibi ca be xtale. ¹⁰ Ora que na Angel que rabi laacabe: ''cadi guidxibidi tu ti naa niaa didxa nacubi izaa sicaruu ni zedané narooba guenda nayeche' xti guiraa xixé binni. ¹¹ ¡Yannadxi, gule tobi ni gulaa binni xtitu, ndani guidxi xti David! Laabe nga Cristu Señor xtinu! ¹² Ne ndi' nga ni chi guica' tu, laatu zadxe'latu ti badu'huini renda lari gueela ne nexhe ndani ra roo mani gui'xi." ¹³ Malasi bihuini ra nuu Ángel que xtale dxuu de guiba' cusisaca ca' Diuxi ne na ca: ¹⁴ Nandxó Diuxi guibá' ne gatadxii guidxilayú laade ca binni ni rusieche' Laabe. ¹⁵ Ne casipe ca Angel que zee ca' guibá' la?, cani cayapa ca dendxu que gunii lisaa ca: yanna la? chuu nu Belen ne guidu'yanu cani guca di, ni Diuxi ma biluí laanu' ". ¹⁶ Laacabe naguenda ca guyé cabe ra que ne bidxelacabe Maria ne José ne biiya cabe badu huini que nexhe ndani ra roo mani guixi. ¹⁷ Gudiidisi de biiya cabe laabe la?, laacabe yeguiní cabe xi biiya cabe de baduhuini que. ¹⁸ De guiraa cani binadiaga candi la? cadxagayaa ca ni gudxi ca ni cayapa dendxu' que laacabe. ¹⁹ Huaxa Maria caní ique ru' de guira' cani laa binadiaga, ziguu chahui be cani ndaani ladxido' be. ²⁰ Cani rapa dendxu' que bigueta ca, cusisaca ca ne ziyunda ca Diuxi xti guiraa ni binadiagaca ca ne biiya ca ne casipe' gudxi cabe ni laaca. ²¹ Ne ra ziluxe' xhono gubidxa, dxi guyu' Be seña, biree lá be Jesús, lá ni gulaqui Angel que de dxii caru' gaca xiini Jñaabe laabe. ²² Ne ora gudidi ca dxii nexhe bia guiaa cabe, casi ca' lu ley xti Moisés, José ne María la? bedané cabe laabe ndani yu'du Jerusalén ti guchiña cabe laabe nezalú Señor. ²³ Casi ca lu ley xti Señor: ''guiraa badulugola la? za ree chuu para Señor." ²⁴ Ngue runi laacabe bedané cabe casi ca' lu ley xtii Señor: "chuppa gu'gu o chuppa gu'gu huini". ²⁵ Ne raque la? guyuu ti hombre Jerusalén ni lá Simeón ne hombre di la? nabe' runi xneza ne runi ni na Diuxi. Laabe cabeza be gu'ya be gueeda ni gulá ca binni Israel ne Espíritu Santu nuu né laabe. ²⁶ Ne maca biluí Espiritu Santu laabe que zu'ya be guendaguti pa caru gu'ya be Cristu xti Señor. ²⁷ Ne yené Espiritu laabe, Simeón guyuu ndaani yu'du'. Ora bedané ca bixhoze badu huini Jesús laa, ti guni cabe laabe casi pe ca' lu ley. ²⁸ Ne laabe gu'cuaabe badu huini que bidxiba lu ná' be la' ne bisisacabe Diuxi ne na be. ²⁹ Yanna la? bidii chee siervu xtiu ne guendaratadxi, casi na xtiidxa lu. ³⁰ Ti ca guiee lua' ma biiya' cani guenda rulá xtiu. ³¹ Ni lii gulaqui cha'huilu nezalu' de guiraa xixé binni. ³² Ti biaani ni gusihuini cani cadi Judíu ne guendanandxó xti xquidxi lu' Israel. ³³ Bixhoze ne jñaa badu huini que nuu ca cadxagayaa ca guiraa ni guní cabe de Laabe. ³⁴ Ne gulú nda'ya Simeón laacabe ne na rabi María jñaa be: ''Ne badu huini di la? ma bibii be ti gusaba be ne guindísa be xtale biini xtii Israel ne ti señal ni guiruti za na' guicaa. ³⁵ Ne ti espada zadiidi laaga xhialma lu' ne zacá zahuini xi nuu ndaani ladxidó' cada tobi." ³⁶ Ne ti profetisa laa Ana nuu ra que'. Laabe naca be xiiñi Fanuel ni zaa de ca lisaa xti Aser. Iza' ma nago'la be. Laabe la? bibani né be xhelabe gadxe' iza de bichaganá' si be. ³⁷ Ne biaana be xtubi be tapa lategande iza nuu tapa lu. Laabe que ñuu dxii nusana be de ñee be yu'du huaxa cayuni be xhiiña Diuixi, rusana be de goo be ne rinii né be Diuxi, huaxhiññi ne ridxii. ³⁸ Ne ora que ca, beeda be ra nuu ca ne bizulu' be bidiibe xquixe Diuxi ne gunii be de baduhuiini que nezalu' guira' cani cabeeza guilá Jerusalén. ³⁹ Ne ra biluxe cabe guiraa' ni naquiñe' guni cabe casi na ley xtii Señor la?, laacabe bigueta cabe Galilea, ndani xquidxipe' cabe Nazaret. ⁴⁰ Badu huini que bini'si ne gupa xtipa, ne xtale guendabiani ne guendanacha'hui xtii Duixi nuu né laabe. ⁴¹ Ca bixhoozebe de guira' iza' guye' ca ye gapa ca saa pascua. ⁴² Dxii Laabe gupa be chii ne chupa Iza' la?, laacabe xti bieque guyé ça be si gapa saa que ca be casi ca rie' ca be. ⁴³ Gudiidisi de biana ca be bia dxii raca saa ra que la?, guzulú ca be bibigueta ca be ra liidxi ca be. Huaxa xcuídihuini Jesús la? biana be Jerusalén ne ca bixhoze be que ñanna di ca'. ⁴⁴ Laaca zacaxaca' nuu be laade guira' binni ziné laacabe que, ngue runi guzaa ca be guidubi ti dxii. Ne ora que bizulú ca be biyu'bi ca be Laabe lade ca lisaa xti ca be ne xhamigu ca be. ⁴⁵ Ne ra laacabe que nidxe' la cabe laabe la?, bigueta ca Jerusalén ne bizulu cabe biyu'bi cabe Laabe raqué. ⁴⁶ Ne gudidisi chonna gubidxa, laaca be bidxela cabe laabe ndaani yu'du', zubabe galahui de ca maistru, cuca' diagabe ne canaba diidxabe laaca. ⁴⁷ Guiraa cani bica'diaga laabe que ca dxagayaca pa bia' riene be ne cani cucabi be que. ⁴⁸ Ora biiya' cabe laabe, bidxagayaa cabe. Jñaa be rabi laabe: "Xhiiñe' xiñeendi Cayu' nu' laadu zicari pue? bica diaga, bixhozo ne naa canáyubi lugu' du lii. ⁴⁹ Laabe rabibe laaca: " xiñee ndi. canayu'bii tu naa pue?, ñee que gannatu pa naquiiñe Naa chuaa ra lidxi bixhoze' la? ⁵⁰ Ne laacabe que ñene cabe xhi rini' ca diidxa' gudxi be laaca. ⁵¹ Ne raqueru laabe biguta ne be laaca ra lidxi be Nazaret ne bizuuba be xtiidxa ca. Jñaa be gúpa dxiichi' ca' ndi ndaani ladxido'. ⁵² Ne Jesús zinisiru'lu guenda biaani ne zisoo ne zi dale guenda nacha'hui' xtii be neza lú Diuxi ne binni guidxi layú.