¹ Na kes dia, kontisi ki ki Séza Agustu da órdi pa faze un rasensiamentu di tudu pesoa na Inpériu Romanu. ² Es primeru rasensiamentu fazedu na ténpu ki Kuiriniu ta governaba Síria. ³ Kada pesoa staba ta bai rajista na kau ki e nase. ⁴ Nton, Juzé tanbe sai di bila di Nazaré, na pruvínsia di Galileia, pa subi ti Belen, na pruvinsia de Judéia, undi ki rei Davidi tinha nasidu, pamodi Juzé era disendenti di Davidi. ⁵ E bai rajista la, djuntu ku Maria, se mudjer, ki staba pa ten fidju. ⁶ Kontisi ki, inkuantu es staba la na Belen, txiga maré di Maria ten fidju. ⁷ Nton, ben nase primeru fidju di Maria. E inbrudja mininu na padás di panu, y e pô-L detadu na manjedóra, pamodi ka tenba lugar pa es na penson. ⁸ Gósi, na kel mézmu zóna, tenba uns pastor ki ta viveba na kanpu, y duranti noti es ta guardaba ses ribanhu ⁹ Ain, un anju di Sinhor parse na ses dianti, y glória di Sinhor brilha na ses vólta, y es xinti txeu medu. ¹⁰ Má anju fla-s: "Ka nhos xinti medu. Nhos obi li! N ta konta-nhos Notísia sabi di grandi alegria pa tudu povu. ¹¹ Oji, na Sidade di Davidi, nase nhos Salvador, ki é Kristu, Sinhor. ¹² Nhos ta rakonhese-L ku es sinal li: Nhos ta atxa kel kel mininu inbrudjadu na padás di panu, y detadu na un manjedóra". ¹³ Y bira asin, parse djuntu ku kel anju, un multidon di un grandi izérsitu selestial, y es staba ta lova Déus ta kanta: ¹⁴ "Glória a Déus na séu más altu y pas na téra pa tudu kes pesoa ki ten favor di Déus". ¹⁵ Sin ki kel multidon di anju parti pa séu, kes pastor fla es ku es: "Nton, n bai ti Belen pa nu ba odja es kuza ki kontisi, y ki Sinhor faze-nu sabi". ¹⁶ Asin, es bai faxi faxiy y es atxa Maria ku Juzé, y mininu ki staba detadu na manjedóra. ¹⁷ Kantu és odja-L, es kumesa ta konta tudu algen kel kuza ki es kontadu sobri kel mininu. ¹⁸ Y tudu algen ki obi, es fika dimiradu ku kes kuza ki kes pastor staba ta konta-s. ¹⁹ Má Maria staba ta guarda tudu es kuza na se kurason, y e fika ta sumara sobri es. ²⁰ Na vólta pa ses kanpu, pastoris staba ta glorifika y lova Déus pa tudu kes kuza ki es obi y es odja, ki éra talikual es kontadu ántis. ²¹ Oitu dia dipôs ki mininu nasi, konpleta ténpu pa E ser sirkunsidadu, y es pô-L nomi di Jezus, kel nómi ki kel anju da-L ántis ki se mai fika grávida ²² Kandu es konpleta ténpu di sirimónia di purifikason, konfórmi lei di Moizes, Juzé ku Maria subi ku Jezus pa sidadi di Jeruzalen, pa prizenta-L pa Sinhor. ²³ Sima sta skritu na lei di Sinhor: "Tudu primeru fidju, ki é matxu, ta ser siparadu y didikadu pa Sinhor". ²⁴ Tanbe, Juzé ku Maria oferesi un sakrifisiu, sima sta skritu na lei di Sinhor "dôs rola ô dôs ponba pikinoti". ²⁵ Tenba un ómi na Jeruzalen ku nómi di Simion. Es ómi era justu y e tenba grandi respetu pa Deus. E staba ta spéra salvason pa povu di Izrael, y Spritu Santu staba ku el ²⁶ Spritu Santu tinha reveladu pa el me ka ta moreba ántis de odja Misías di Sinhor ²⁷ Asin, dirijidu pa Spritu Santu, Simion bai pa ténplu na mézmu altura ki Juzé y Maria leba mininu Jezus pa es fazi pa el móda lei ta mandaba. ²⁸ Nton, Simion toma Jezus na ses brasu y e lova Déus, y e fla: ²⁹ "Nhordés: Gósi li, dja bu knpri ku bu promésa. Asin, Nhu podi dispidi bu sérvu ku pas. ³⁰ Pamodi nhas odju dja odja bu salvason, ³¹ ki nhu pripara dianti di tudu povu; ³² El é lus ki ta revela-U pa kes ki ka é judeu y El é glória di bu povu di Izrael". ³³ Asin, pai ku mai fika dimiradu ku kuzas ki Simion fla sobri ses mininu. ³⁴ Simion bensua-s y e fla Maria, mai di Jezus: "Obi li, es mininu sta distinadu pa ser motivu ki ta poi txeu algen kai na Izrael, má E ta labanta txeu des tanbé. Asin, E ta ser sinal di siparason entri gentis. ³⁵ E ta poi pensament sukundidu di txeu kurason sai na klaru. (Y abo tanbé, Maria, un grandi dór ta trabesa bu alma, sima gólpi di spáda.) ³⁷ Nton, Ana fika viúva désdi kel altura, y e staba sénpri na Ténplu ta adora Déus ku jijun y orason, dia ku noti. ³⁸ Y na kel mézmu óra, Ana txiga pértu des. Asin, e kumesa ta agradese Déus, y e fika ta pâpia sobri Jezus pa tudu algen ki staba ta spéra libertason di Jeruzalen ³⁹ Dipôs ki Juzé y Maria konpleta tudu kes kuza, móda lei di Sinhor ta mandaba, es volta pa ses bila Nazaré, na pruvínsia di Galileia. ⁴⁰ Y Mininu ba ta kria y bira fórti. E fika xeiu di sabedoria, y grasa di Déus staba riba d'el. ⁴¹ Gósi, pai ku mai di Jezus ta baba pa Jeruzalen tudu anu pa fésta di Páskua. ⁴² Kantu Jezus konpleta dozi anu di idadi, E subi pa Jeruzalen ku se pai y se mai, konfórmi kustumi di kel fésta. ⁴³ Kantu kes dia kaba di fésta termina, Juzé ku Maria toma kaminhu pa kaza, má mininu Jezus fika na Jeruzalen. Es ka sabeba ki e fika, ⁴⁴ pamodi es pensaba ma Jezus staba ku ses kunpanheru di viaji. Es ba ta djobe-L na kaminh, má ti fin di kel primeru dia di kaminhada, inda es ka tinha atxadu El entri ses parenti y amigu. ⁴⁵ Kantu es ka atxa-l, nton, es volta pa Jeruzalen pa ba djobe-L. ⁴⁶ Três dias dipôs, es atxa-L na Ténplu, xintadu na meiu di dotoris de lei. E staba ta sukuta kes dotor di lei y E staba ta faze-s purgunta. ⁴⁷ Y tudu algen ki staba ta obi Jezus, es fika dimiradu ku se intilijénsia y ku ses raspósta. ⁴⁸ Kantu se pai ku se mai atxa-L, es fika spantadu y se mai fla-L: "Fidju, pamodi ki bu fazi asi ku nos? Obi li, ami ku bu pai, nu staba ta buska-U pa tudu ladu, y nu fika priokupadu". ⁴⁹ Jezus fla-s: "Pamô ki nhos staba ta buska-M na tudu ladu? Nhos ka sabeba ma N tinha ki sta na Kaza di nha Pai?". ⁵⁰ Má se pai ku se mai ka intendi sentidu di rásposta ki E da-s. ⁵¹ Dipôs E volta ku se pai y e mai pa bila di Nazaré, y se mai fika ta guarda tudu kes kuza na se kurason. Y Jezus ba ta obi ku se pai y se mai. ⁵² Y Jezus ba ta krese na sabedoria y na tamanhu, y e atxa favor dianti di Déus y dianti di gentis.