¹ Sinhor Tiófilu: Munti algen tenta djunta kel stória sobri kes kuza ki kontisi na nos meiu, ² konfórmi foi kontadu pa kes ki foi tistimunha désdi kumésu, y ki bira kes ki ta pruklama mensagi di Palavra. Ami tanbé, N fazi un invistigason di tudu kes kuza, désdi kumésu, ku tudu kudadu. ³ Nton, parse-m bon pa N skrebi es stória dretu na sekuénsia, ⁴ pa sinhor fika ku sertéza di verdadi ki nhu inxinadu. ⁵ Na dia di Erodis, rei di Judeia, tenba un saserdoti, txomadu Zakarias, di ordi di Abias. Si mudjer era di linhajen di Aron i txomaba Izabel. ⁶ Es dos era justu dianti di Deus, ta andaba di manera kuretu na tudu mandamentu i kuzas ki Nhordes ta izijiba. ⁷ Ma es ka tenba fidju, pamodi Izabel era steril, i pamodi tanbe es dos era bedju dimas. ⁸ Un dia Zakarías staba ta fazi se trabadju móda saserdóti diant di Déus, pamodi se grupu staba di sirbisu na kel altura. ⁹ Konfórmi kustumi di saserdótis, Zakarías skodjedu pa sórti pa entra na lugar santu di Ténplu di Sinhor pa kema insénsu. ¹⁰ Na kel óra di kema insénsu, multidon di povu staba ta ora na ladu di fóra. ¹¹ Bira asin, Zakarías odja un anju di Sinhor ki parse sakédu na ladu diretu di altar di insénsu. ¹² Kantu Zakarías odja-l, e fika spantadu, y korpu gurgunha-l fi medu. ¹³ Má anju fla-l: "Ka bu xinti medu Zakarías, pamodi Deus obi bu orason y bu mudjer Zabel ta da-u un fidju, y bu ta pô-l nómi di Djon. ¹⁴ E ta ben traze-u txeu alegria ku gozu, y txeu gentis ta ben fika konténti ku se nasimentu. ¹⁵ E ta ben ser grandi dianti di Sinhor; e ka ta bebi vinhu, nen grogu, e ta ser xeiu di Spritu Santu, ¹⁶ E ta leba txeu fidju di Izrael di volta pa Sinhor, ses Deus. ¹⁷ E ta bai na frénti di Sinhor, na Spritu y puder di pruféta Elias. E ta pô kurason di mai ku pai volta pa ses fidju. Y kes ki é dizobidienti, e ta pô-s ta volt pa sabedoria di gentis justu. Asin e ta pripara un povu pa resebi Sinhor". ¹⁸ Nton, Zakarías purgunta kel anju: "Módi ki N pódi ten sertéza di es kuza? Ami é un ómi bedju y nha mudjer tanbé". ¹⁹ Kel Anju rasponde: "Ami é Gabriel, y N ta sirbi dianti di Deus. El manda-m pa N ben pâpia ku bo, pa N traze-u es bon notísia li. ²⁰ Má gósi li, bu ta fika mudu y bu ka ta pâpia ti dia ki kes kuza kontisi, pamodi bu ta kridita na nha palavra, ki ta ben kunpri na se ténpu sertu". ²¹ Povu staba ta spéra pa Zakarías sai di lugar santu di Ténplu, y es atxa stranhu manera ki e dura tantu ténpu la. ²² Kantu e sai, e ka sa konsigi pâpia ku es. Es da kónta ma e tevi vizon na lugar santu, pamodi e fika mudu, y e ta fazeba sô jéstu ku ses mon. ²³ Kontisi ki Zakarías konplenta ses dia di sirbisu na Ténplu, y e torna bai pa se kaza. ²⁴ Dipôs di kes dia, se mudjer Zabel fika grávida y e fika déntu kaza duranti sinku mês, Zabel fla: ²⁵ " É na kes dia li, ki Sinhor odja pa mi ku favor, y E fazi es kuza pa mi, pa tra nha burgónha dianti di povu". ²⁶ Na sestu mês di gravidês di Zabel, Déus manda anju Gabriel ti bila di Nazaré, na pruvínsia di Galiléia, ²⁷ pe leba un mensaji pa un vírjen, ku nómi di Maria. El éra noiva di Juzé. Juzé, di familia di Rei Davidi. ²⁸ Anju Gabriel txiga pértu di Maria, y e fla-l: "Mantenha di pas pa bo. Bu atxa favor di Déus. Déus sta ku bo." ²⁹ Má Maria fika trapadjadu ku kes palavra, y e fika ta purgunta se kabésa sobri siginifikadu di kel mantenha. ³⁰ Nton anju fla-l: "Maria, ka bu xinti medu, pamodi bu atxa favor di Déus. ³¹ Bu ta ben fika grávida, y bu ta ben ten un fidju matxu. Bu ta pô-L nómi di Jezus. ³² E ta ser grandi, y E ta txomadu Fidju di Deus ki sta riba di tudu. Nhordés ta da-l tronu di se pai Davidi. ³³ E ta reina sobri povu di Izrael pa sénpri, y se reinu nunka ka ta kaba". ³⁴ Nton Maria purgunta anju: "Modi ki pode ser? Ami é vírjen?" ³⁵ Anju rasponde-l: "Spritu Santu ta dixi sobri bo, y puder di Deus, ki sta di riba tudu, ta kubri-u ku se sónbra. Purtantu, kel ki ta ben nase é santu tanbe, y E ta ser txomadu Fidju di Déus. ³⁶ Ala-l la, bu parenti Zabel sta grávida ku un fidju matxu tanbé. El é un mudjer bédja ki gentis staba ta fla-fla ma e ka ta podeba ten fidju, má e sta na sestu mês di gravidês. ³⁷ Pamodi, pa Déus ka ten nada ki é inposível". ³⁸ Nton Maria rasponde: "Ale-m li, ami é serva di Sinhor. Pa kontisi ku mi, móda bu palavra ta fla". Nton, anju dexa-l y e bai. ³⁹ Na kes dia, Maria pripara y e viaja faxi-faxi pa un bila na zóna montanhosu di Judeia. ⁴⁰ E entra na kaza di Zakarías y e kunprimenta Zabel. ⁴¹ Sin ki Zabel obi mantenha di Maria, mininu salta déntu di se bariga. Nton Zabel xeiu di Spritu Santu. ⁴² Y ku vós ben altu e fla: "Bo é más bensuadu entri tudu mudjer, y bensuadu tanbe é fidju na bu véntri. ⁴³ Ami é kenha, pa ki mai di nha Sinhor ta ben vizita-n? ⁴⁴ Sin ki bu mantenha txiga na nhas obidu, nha fidju slata di alegria. ⁴⁵ Bo é bensuadu, pamodi bu kridita ma Sinhor ta ben kunpri se palavra, sima E fla-u". ⁴⁶ Nton Maria fla: "Nha alma sa ta lova Sinhor, ⁴⁷ y nha spritu sta alégri na Déus, nha Salvador. ⁴⁸ Pamodi E pensa na mi, se umildi sérva. Ale, désdi gósi, tudu jerason ta txoma-m mudjer bensuadu, ⁴⁹ pamodi Déus puderozu faze kuzas grandi pa mi, Santu é Se nómi. ⁵⁰ Se mizerikordia ta ba ta passa di jerason pa jerason, riba di kes ki ta ruspeta-l. ⁵¹ E faze un grandi kuza ku se brasu poderozu, e spadja kes ki é aroganti na kes pensamentu di ses kurason. ⁵² E tra governantis di ses tronu, y E labanta gentis mansu. ⁵³ E intxi di bons kuza, pa kes ki tén fomi, má E dispidi rikus ku mon ta bana. ⁵⁴ E djuda Izrael, se sérvu,e lenbra di se mizerikórdia ⁵⁵ pa nos pai Abron y ses disensenti pa sénpri, konfórmi promésa ki E fazi pa nos antipasadu. ⁵⁶ Maria fika ku Zabel kuazi três mês, dipôs e volta pa se kaza. ⁵⁷ Gósi, kunpri ténpu di gravidês di Zabel, y se fidju matxu ben nase. ⁵⁸ Ses vizinhu, ku ses parenti, es obi modi ki Sinhor mostra se grandi mizerikórdia pa Zabel, y es tudu fika konténti djuntu ku el. ⁵⁹ Nton, kontisi ki, oitu dia dipôs, ses gentis ben pa sirkunsida mininu, y es ta kreba pô-l nomi di Zakarías, ki éra nómi di sé pai. ⁶⁰ Má se mai rasponde, y e fla: "Ka pode! Se nómi mesti ser Djon". ⁶¹ Ses gentis fla: "Má ka ten ninhun parenti ki ten és nomi". ⁶² Nton, es fazi jéstu pa se pai pa purgunta-l modi ki e kreba pa mininu ser txomadu. ⁶³ Zakarías pidi un tábua pa skrebi y e skrebi: "Se nómi é Djon". Tudu algen fika dimiradu. ⁶⁴ Na kel óra, se bóka abri, y se língua solta. Asin, é fika ta pâpia, ta lova Deus. ⁶⁵ Tudu ses vizinhu fika ku medu, y pa tudu kel zóna montanhozu di Judeia. ⁶⁶ Tudu gentis ki obi kes kuza, es guarda na ses kurason, y es fika ta purgunta: "Nton, kuzé ki es mininu ta ben ser?". Na verdadi, mon di Sinhor staba ku Djon. ⁶⁷ Asin, Zakarías, staba xeiu di Spritu Santu y e kumesa ta prufetiza, y e fla: ⁶⁸ "Nu ta Nhordés di Izrael, pamodi E ben vizita se povu, y E resgata ses liberdadi. ⁶⁹ E labanta un Salvador puderozu pa nos, na disendénsia di se sérvu, Davidi, ⁷⁰ sima ké prumete pa bóka di ses santu pruféta, désdi bédju. ⁷¹ Nton, nu ten liberdadi di nos inimigu, y di mon di tudu kes ki ta odia-nu. ⁷² Pe mostra se mizerikórdia pa nos antipasadu, e lenbra dise santu aliansa. ⁷³ E faze juramentu pa nos pai Abron, ⁷⁴ ki E ta libra-nu di mon di nos inimigu, pa nu pode sirbi-L sen medu, ⁷⁵ y pa nu ser puru y justu dianti d'el tudu dia di nos bida. ⁷⁶ Y abo, nha fidju, bu ta ser txomadu pruféta di Deus ki sta di riba tudu, pamodi bu ta bai pa dianti di Sinhor, pa pripara kaminhu pa El, ⁷⁷ bu ta da se povu konhisimentu di salvason atrabés di perdon di ses pekadu. ⁷⁸ Na verdadi, nos Deus é xeiu di mizerikórdia y bondadi. Madrugada di salvason ta ben labanta riba nos. ⁷⁹ Es lus, ki ta parse di séu, E ta ben límia kes ki sta xintadu na skuridon, y na sonbrá di mórti, pa poi nos pé ta entra na kaminhu di paz". ⁸⁰ Y kel mininu ba ta kria y e ba ta bira forti na spritu. E fika na dizértu ti dia ki e kumesa se ministériu dianti di povu di Izrael.