¹ Saulu konkorda ku asasinatu di Stébu, i na kel dia ben un grandi pirsigison kontra igreja na Jeruzalen. Nton tudu krenti fika spadjadu pa kes pruvínsia di Judeia ku Samaria. Má kes apóstulu fika na Jeruzalen. ² Tanbe, uns ómi ki ta ruspetaba Déus, es ba intera Stébu, i es txora txeu. ³ Saulu gó, e kreba kaba ku igreja i ta buskaba krenti kaza-en-kaza. E ta pegaba ómis ku mudjeris, i e ta rastaba es pa kandiâ. ⁴ Kontudu, kes krenti ki ta spadjadu, es ba ta pápia di Notísia Sabi na tudu kau na undi ki es ta pasaba. ⁵ i Filipi gó, e dixi pa sidadi di Samaria undi ki e pápia ku kes gentis di Kristu. ⁶ I monti algen ta fikaba tudu djuntadu ta da txeu atenson pa kes kuza ki Filipe ta flaba, pamodi es ta obiba i odjaba kes milagri ki e ta fazeba. ⁷ Fazedu spuson di txeu spritu maus, i na ta sai di kes gentis, kes spritu mau ta gritaba rixu. Tanbe, monti paralítiku ku manku kuradu. ⁸ Purisu, kes gentis na kel sidadi fika rei di kontenti. ⁹ Gosi na kel sidadi, tenba un ómi txomadu Simon ki ta fazeba kórda. Dja dura ki e ta inganaba kes gentis di Samaria, i el própri ta ngababa se kabésa, ta fla má el era algen inportanti. ¹⁰ Tudu algen, desdi kes más koitadu, ti kes más inportanti, ta sukutaba el ku atenso, i es ta flaba: Ke-li é puder di Déus, txomadu kel grandi puder. ¹¹ Kel povu ta sukutaba el ku atenson, pamodi dja duraba ki e ta dexaba es inkantedu ku ses truki. ¹² Má dipôs ki es akredita na Notísia Sábi ki Filipe konta-s di reinu di Déus, i na nómi di Jizus Kristu txeu ómi ku mudjar foi batizadu. ¹³ Ti própri Simon seta Jizus i e batizadu. E fika ta anda djuntu ku Filipi, ta odja kes milagri i kuzas grandi ki Filipi sa ta fazeba. ¹⁴ La na Jeruzalen apóstulus obi ma kes gentis na Samaria dja setaba palavra di Déus, nton es manda-s Pedru ku Djon. ¹⁵ Lógu ki es txiga la, es ora pa kes krenti nobu, pa es rasebi Spritu Santu. ¹⁶ Dja es staba batizadu na nómi di Sinhor Jizus, má spritu Santu inda ka dixiba riba ninhun di es. ¹⁷ Nton Predu ku Djon poi ses mon na kes krenti nobu di Samaria, i es rasebi Spritu Santu. ¹⁸ Simon gó, e odja ma óra ki apóstulus ta poda ses mon riba kes gentis, es ta rasebeba Spritu Santu. Nton e oferesi Pedru ku Djon dinheru. ¹⁹ I e fla-s: Nhos da-m kel puder tanbe, pa óra ki N ta poi nha mon riba algen , kel algen ta rasebi Spritu Santu. ²⁰ 20 Nton Pedru raspondi-l: Bu ten lugar na perdison djuntu ku bu dinheru, pamodi bu pensa ma don di Déus podi ser kunpradu ku dinheru. 21 ²¹ Bu ka ten parseria nen parti na es ministério, pamodi bu kurason ka sta dretu dianti di Déus. 22 ²² Agó, rapensi di bu maldadi i ora pa Sinhor. Asin, talvês intenson di bu kurason ta ser perduadu. 23 ²³ pamodi N ta odja ma bu sta xeiu di inveja, i bu sta prezu na pekadu. ²⁴ 24 Nton Simon rasponde i fla-s: Nhos pidi Sinhor pa min , pa ki nada ki nhos fla ta ben kuntisi ku mi. ²⁵ 25 Dipôs ki Pedru ku Djon da tistimunhu, i pápia di palavra di Sinhor, es volta pa Jerusalén, na ta bai, es konta Notisia Sábi di Jizus na txeu bila na pruvínsia di Samaria. ²⁶ Má kuntisi ki un anju di Sinhor pápia ku Filipi, i e fla: Labanta! Bai pa sul na kaminhu bandonadu ki ta dixi di Jeruzalen pa sidadi di Gaza. ²⁷ Nton, Filipi labanta i e bai. Bira asin e odja un ómi eunuku di téra di Etiópia, una altu funsionáriu nkaregadu di tudu rikeza di Kandasi, rainha di Etiópia. Es ómi tenba babu pa Jeruzalen pa adora Déus, ²⁸ i e staba ta volta pa se téra, xintadu na se karuaji, sô ta lé livru di pruféta Izaias. ²⁹ Nton Spritu Santu fla Filipi: Txiga más pértu pa bu ba ta kunpanha kel karuáji. 30 ³⁰ Filipi kore pa la i e obi kel ómi ta lé livru di pruféta Izaias i e purgunta-l: Nhu sa ta intendi kuzas ki nhu sa ta lé? 31 ³¹ kel ómi rasponde-l: Modi ki N podi intende si ningen ka ta splika-m? Nton, e kunbida Filipi pa e subi pa xinta djuntu ku el na karuáji. ³² Kel pasagi di Skritura ki e staba ta lé éra ke-li: Sima un karneru, E lebadu pa matador, i moda karneru nobu ta fika kétu dianti di ken ki sa ta tuskia-l, asin tanbe E ka abri se bóka. ³³ Na se umilhason E foi negadu justisa. Kenha ki ta konta di se disedénsia dja ki se bida foi tradu di téra? ³⁴ Kel ómi di Etiópia purgunta Filipi: Pur favor, fla-m, di kenha ki pruféta sa ta pápia? E ta pápia di se kabésa ô di otu algen? ³⁵ Nton Filipi toma palavra i e ta komesa ta konta-l Notísia Sábi di Jizus, i e kumesa ku kel párti di Skritura ki es kaba di lé. ³⁶ Kómu e staba ta bai na kaminhu, es atxa un lugar ki tenba agu, i kel ómi di Etiópia fla: Ala agu, kuze ki ta stroba-m pa N se batizadu? ³⁷ --- ³⁸ Nton kel ómi di Etiópia manda para karuáji. Tudu és dôs, kel eunuku ku Filipi, es dixi i es entra na agu, i Filipi batiza-l. ³⁹ Óra ki es sai di agu, Spritu di Sinhor rabata Filipi. Kel ómi di Etiópia ka odja-l más, má e ba se kaminhu rei di kontenti. ⁴⁰ Má bira asin ki Filipi da kónta ma e staba na bila di Azotu. Nton e ba ta pasa na kel zona, ta konta Notísia Sábi di Jizus na tudu sidadi, ti ki e txiga na sidadi di sezaréia.