¹ Dipôs ki nu txiga na kel praia, san y salvu, nu prende ma kel ilha ta txomadu Malta. ² Povu di kel ilha trata-nu ku grandi bondadi. Es da-nu akodjimentu na grandi fogera ki es faze pa nos, pamodi nu tenba friu, y purkauza di txuba ki staba ta kumesa. ³ Nton, Paulu djunta un fexu di lenha ki e poi na lumi. Má purkauza di kalor, un kóbra sai di lenha, y e pega na mon di Palu. ⁴ Óra ki povu di kel ilha odja kel kóbra prindadu na mon di Paulu, es fla kunpanheru: "Ka ten dúvida ma es ómi li é un asasinu! Mézmu ki e skapa san y salvu di mar, Justisa ka permiti-l vive". ⁵ Nton, Paulu sakudi mon, y kel kóba kai déntu di kel fugera. Má Paulu ka sufri ninhun mal. ⁶ Kontudu, povu di kel ilha staba ta spéra pa Paula kumesa ta fika intxadu, ô pa e kai mortu dirapenti. Má sima ki és fika ta spera pam txeu ténpu, sen odja nada stranhu ta kontise ku el, es muda di ideia, y es kumesa ta fla Paulu éra un déus. ⁷ Agóra, na kes zóna, pértu kel praia, tenba uns propriadadi ki ta pertenseba un ómi ku nómi di Púliu, ki éra xéfi di kel ilha. E takodje-nu, y duranti três dia e da-nu un gazadju mutu amável. ⁸ Na kel altura, pai di Públiu staba duenti na kama. E staba ta sufri ku fébri y bariga-baxu ku sangi. Nton, Paulu txiga na pai di Públiu y e ora pa el. Dipôs Paulu poi se mo riba di el y e kura-l. ⁹ Dipôs di es kontisimentu, tudu kes otu na ilha, ki staba duenti tanbe, es ben, y es foi kuradu. ¹⁰ Es onra-nu ku txeu onoráriu. Y dipôs, ora ki nu staba ta nbarka, es da-nu kes kuza ki nu ta mesteba pa viaji. ¹¹ Dipôs di trés mês, nu nbarka na un barku di sidadi di Alixandria, ki pasa ténpu di friu na kel ilha. Kel barku tenba imaji na proa di déus jémiu [Nóta: Na mitulujia gregu, ta rifiriba irmon jémiu, Kastor y Polúkis]. ¹² Dipôs, nu txiga na portu di abrigu na sidadi di Sirakua y nu fika la três dia. ¹³ Di la, nu viaja djuntu kósta, ti ki nu txiga na sidadi di Réjiu. Dipôs di un dia, un béntu kumesa ta sopra di sul, y na sugundu dia nu txiga na sidadi di Putéoli. ¹⁴ Nu atxa alguns irmon la, y es pidi-nu pa nu fika ku es pa un sumana. Dipôs nu kontínua viaji pa Roma. ¹⁵ La na Roma, irmons obi ma nu staba na kaminhu. Nton, un grupu ben ti Merkadu di Ápiu pa inkontra ku nos, y otu grupu di Três Penson. Kantu Palu odja kes irmon, e agradesi Déus, y e ganha koraji. ¹⁶ Kantu nu entra na Roma, Palu dadu permison pa e fika na un moradia partikular, ku un soldadu pa guarda-l. ¹⁷ Nton, três dia dipôs, Palu marka un raunion ku kes judeu más inportanti na Roma. Kantu es staba raunidu, e fla-s: "Nhas irmon, N ka fazi nada kóntra nos povu, nen kóntra kes kustumu di nos antipasadu. Má mézmu asin, es prende-m na Jeruzalen y es intrega-m na mon di romanus. ¹⁸ Dipôs ki otoridadis romanu izamina nha kazu, es kreba larga-m, pamodi es ka atxa ninhun razon pa senténsa di mórti na nha kazu. ¹⁹ Má kes judeu labanta kóntra kel julgamentu, y N xinti obrigadu rakóre pa N ser julgadu pa Séza. Má ami, N ka ten ninhun kexa kóntra nha povu, ²⁰ y ke-li é razon ki N marka es raunion ku nhos. N kreba odja-nhos pa nu pâpia, pamodi N sta maradu ku es korenti li, purkauza di speransa di Izrael". ²¹ Nton es fla-l: "Nu ka resebi ninhun karta di Judéia sobri bo. Tanbe, ka ben ninhun di nos povu ki da-nu un ralatóriu, ô ki ben pâpia mal di bo. ²² Má nu ten gana di obi kes ideia ki bu ten pa fla-nu, pamodi kuza ki dja nu obi des seita, é ki povu sa ta pâpia kóntra el na tudu kau". ²³ Nton es marka un dia ku Palu, y txeu algen ben pa se moradia. Di palmanhan ti di tardi, es fika ta obi-l splika y da tistimunhu sobri Reinu di Déus. Y e tenta konvense-s sobri Jezus, atrabés di lei di Moizes y di kes livru di prufétas. ²⁴ Un fika konvensidu ku kes kuza ki Palu fla, má otus nega kridita. ²⁵ Nton, sen txiga na un akordu entri es, es dispidi di kunpanheru. Ántis ki es sai, Palu fla un últimu palavra: "Foi papiadu dretu kantu, atrabés di pruféta Izaías, Spritu Santu pâpia ku nhos antipasadu ²⁶ y e fla: 'Bai fla ke-li pa es povu: Nhos ta fika ta obi, má nunka nhos kata intendi nada. Nhos ta fika ta odja, má nunka nhos ka ta persebi nada. ²⁷ Pamodi kurason des povu bira rixu. Es tapa ses obidu, y es fitxa ses odju, pa es ka odja ku ses odju, y pa es ka obi ku ses obidu. Es ta fazi asin pa es ka intendi ku ses kurason, pa es podi volta pa Mi pa N kura-s'. ²⁸ Purtantu, nos fika ta sabi ma es salvason di Déus foi enviadu pa kes ki ka é judeu, y es ta obi. [Atus 28:29 Kes midjor manuskritu ta omiti versu 29] ²⁹ Dipôs ki Palu kaba di fla kes kuza, tudu judeu bai ses kaminhu ta diskuti txeu entri es. ³⁰ Palu mora na kel kaza lugadu pa dôs anu interu, y e ta resebeba tudu algen ki ta baba djobe-l la. ³¹ E ta pruklamaba Reinu di Déus y e ta inxinaba sobri Sinhor Jezus Kristu, ku tudu koraji, y nada ka stroba-l.