¹ Rei Agripa fla Palu: "É permitidu pa bu pâpia di bo mézmu". Nton, Palu stendi se mon y e kumesa ta difendi se kabésa: ² "Rei Agripa, N sta filis oji, pamodi N sta li dianti di nho pa N fazi nha diféza kóntra tudu kes kuza ki judeus sa ta akuza-M; ³ Sobritudu, N sta filis pamodi nhu konxi dretu tudu kustumu y kiston di judeus. Nton, N ta pidi nho pa nhu obi-m ku paxénxa. ⁴ Tudu judeu sabi nha manera di vivi na meiu di nha povu, désdi prinsípiu di nha juventudi, y dipôs na jeruzalen tanbe. ⁵ És konxe-m désdi bédju, y es podi da tistimunhu, si es sta dipostu, di manera ki N vive di akordu ku kel grupu más rigorozu di nos ralijion. Ami, N vivi kómu farizeu. ⁶ Y gósi li, n sta li pa ser julgadu purkauza di nha speransa na promésa ki Déus fazi pa nos antipasadu. ⁷ Tudu algen, di nos dozi tribu di Izrael, ta sirbi Déus ku tudu ses forsa, dia ku noti, pamodi es sa spéra pa Déus kunpri es mézmu promésa. Kontudu, rei Agripa, kes judeu li ta akuza-m pamodi N ten es mézmu speransa. ⁸ Pamodi ki nhos li ta atxa ma é inposível kridita ki Déus ta rasusita mortus? ⁹ Ami mézmu, N ta pensaba má éra nisisáriu pa N fazi tudu kuza ki N podeba kóntra nómi di Jezus di Nazaré. ¹⁰ É ke-li própi ki N ta fazeba na Jeruzalen. Dipôs ki N rasebi otorizason di kes saserdóti prinsipal, N fitxa txeu sigidoris di Jezus na kadiâ, y N ta daba nha vótu kóntra es na óra di kondena-s pa moré. ¹¹ N ta baba pa tudu sinagóga, na tudu banda. N staba ta kastiga-s manenti, y N ta tentaba forsa-s nega ses fé N tenba tantu raiba des ki N ta pirsigiba es ti fóra, na kes sidadi stranjeru. ¹² Palu kontínua ta fla: "Rei Agripa, ku kel intenson, N staba ta bai pa sidadi di Damasku, ku órdi y tudu otoridadi di kes saserdóti prinsipal; ¹³ y, na kaminhu, pa vólta di méiu-dia, N odja un lus di séu, má brilhanti ki sól, ki límia na nha vólta, y tanbe na vólta di nhas kunpanheru di viaji. ¹⁴ Nos tudu, nu kai na txon. Dipôs, N obi un vós ta pâpia ku mi na língua di judeus, ki fla: 'Saulu, Saulu! Pamô ki bu sa ta pirsigi-M? Razisténsia kóntra nha vontadi ta traze-u sô dór!'. ¹⁵ Nton, N purgunta: 'Anho é kenha, Sinhor?' Y Sinhor rasponde: 'Ami é Jezus, Kel ki bu sa ta pirsigi. ¹⁶ Má labanta gósi li y bu fika firmi na bus pé. Razon ki N parse pa bo, é pamodi dja N dizígina-u pa bu ser nha sérvu y tistimunha, tantu di kes kuza ki dja bu odja di Mi, kómu di kes kuza ki N ta ben mostra-u dipôs. ¹⁷ N ta libra-u di povu judeu, y tanbe di kes ki ka é judeu. N sa ta manda-u pa es, ¹⁸ pa bu abri ses odju, pa es bira di skuridon pa lus, y di puder di Satanas pa puder di Déus. Asin, atrabés dis sés fé na Mi, es ta rasebi perdon di pekadu, y párti na eransa di povu santifikadu pa Déus'. ¹⁹ Palu kontínua, y E fla: Purtantu, Rei Agripa, N ka dizobidesi kel vizon di séu; ²⁰ Okontráriu, N prega primeru na sidadi di Damasku y dipôs na sidadi di Jeruzalen, na tudu pruvínsia di Judeia, y tanbe pa kes ki ka é judeu. N fla-s pa es rapende y volta a Déus, y pa es fazi kes kuza ki ta mostra ma es rapende. ²¹ Purkauza di kes kuza li, kes judeu prende-m kantu N staba na Ténplu, y es tenta mata-m. ^{22 23} Má Deus djuda-m pa N manti firmi di pé ti dia di oji, pa N da nha tistimunhu, tantu pa gentis sinplis kómu pa gentis inportanti. N ka fla nada más, sô kes kuza ki prufétas y Moizes tinha papiadu ta ben kontisi; es fla ma Misías ta mesti sufri y ser primeru na rasureson di mortu, pa E pruklama lus, tantu pa judeus kómu pa kes ki ka é judeu". ²⁴ Dipôs ki e fla kes kuza na se diféza, Festu labanta vós y e fla: "Bu sta dodu, Palu! Bu fazi tantu studu grandi ki es leba-u perdi juís". ²⁵ Má Palu fla: "Isilentísimu Festu, nau, N ka perdi juís. N sa ta pâpia palavras di verdadi y di bon juís. ²⁶ Kómu rei Agripa sta li, y N sa ta pâpia ku el ku liberdadi. Pamodi N podi ten sertéza ma ninhun di kes kuza skapa di se konhisimentu, manera ki es ka fazedu sukundidu na un kantinhu. ²⁷ Rei Agripa, nhu ta kridita na prufétas? N sabi ma nhu ta kridita". ²⁸ Nton, Rei Agripa fla: "Na póku ténpu asin, bu ta atxa ma bu podi konvense-m pa N bira kriston?" ²⁹ Palu rasponde-l: "Ô na poku, ô na txeu ténpu, N ta pidi Déus ki ka ta ser sô nho, má tudu kes ki li ta obi-m oji, ta bira sima mi, má sen kes korenti li". ³⁰ Dipôs, rei Agripa labanta djuntu ku governador Festu, Berenisi, y tudu kes ki staba xintadu ku es. ³¹ Na ta sai, es pâpia ku kunpanheru y es fla: "Kel ómi li ka sa ta fazi nada ki ta meresi mótri ô kadiâ". ³² Y rei Agripa fla Festu: "Kel ómi li ta podeba ser sóltu si e ka tinha rakoredu pa e ser julgadu pa Séza".