¹ Agóra, na kel ténpu, rei Eródis manda prende alguns krenti di igreja pa maltrata-s. ² E manda mata Tiagu, irmon di Djon , ku spada. ³ Óra ki e da kónta ma judeus fika konténti ku kes kuza ki kontisi, e faze inda más txeu y e manda prende Pedru tanbe. (Kel-li kontise na kes dia di fésta di pon sen furmentu.) ⁴ Dipôs ki e pega-l, e manda pô-l na kâdia y e poi kuatu grupu di kuatu soldadu pa guarda-l. E faze asin, pamodi e kreba poi Pedru na un julgamentu públiku dipôs di fésta di Páskua. ⁵ Purtantu, Pedru fika guardadu na kâdia, má igreja ka para di pidi Déus pa el na orason. ⁶ Na béspa di kel dia ki Eródis kreba poi Pedru na julgamnetu públiku, Pedru pasa noti maradu na dôs soldadu ku dôs korenti, y e staba ta durmi entri es. Tanbe, guardas staba na pórta ta guarda kadiâ. ⁷ Bora asin, un anju di Sinhor parse, y lus límia déntu kel séla di kadiâ. Anju konkô Pedru na ladu y e korda-l. Dipôs e fla-l: "Labanta faxi!" Y é sin ki kes korenti kai di ses mon. ⁸ Nton anju fla-l: "Poi bu sintu y mara bus sandália." E faze sima anju fla-l. Dipôs anju fla-l: "Bisti bu kapa y ben nha tras." ⁹ Anju sai di kel séla y Pedru sigi-l. Má Pedru ka sabeba ma kuza ki sa ta kontiseba através di kel anju éra verdadi mê. E pensa ma e staba ta ten un vizon. ¹⁰ Es pasa na primeru postu di guarda y dipôs na sugundu. Asin es txiga na porton di féru , ki ta daba pa sidadi, y kel porton abri, el sô, pa es pode sai. Es sai y kel anju anda ku Pedru pa un rua, y dirapenti anju dexa-l. ¹¹ Dipôs, Pedru ben na el y fla: "Gósi, na verdadi, dja N sabe ma Sinhor manda se anju pa libra-m di mon di Eródis, y di tudu kuza ki povu judeu sa ta speraba." ¹² Asin ki Pedru da kónta di kuza ki kontisi, e bai pa kaza di Maria, mai di Djon, ki tanbe ten nómi di Márkus. Monti algen staba la djuntadu ta ora. ¹³ E konkô na porton di kintal y un kriada, ki ten nómi di Rodi, bai pa djobe kenha ki staba la. ¹⁴ E rakonhese ma éra vós di Pedru, y e fika ku tantu alegria ki, envês di abri porton, e kóre pa déntu y fla tudu algen la: Pedru sta dianti porton di kintal!" ¹⁵ Má es fla-l: "Bu sta dodu!" E tema ku es ma éra simé. Nton es fla: "É se anju." ¹⁶ Entritantu, Pedru kontínua ta konkô, y óra ki es abri-l pórta, es da ku el y es fika spantadu. ¹⁷ Pedru fase-s sinal ku se mon pa es kala, y e konta-s manera ki Sinhor tra-l di kadiâ. Dipôs e fla-s: " Nhos konta Tiagu, y otus irmon tanbe, sobri es kuza ki kontise." Dipôs e sai y e bai pa otu kau. ¹⁸ Kantu manxe, un grandi konfuson labanta na meiu di kes soldadu, pamodi es ka sabeba kuzé ki kontise ku Pedru. ¹⁹ Eródis manda buska Pedru, má es ka atxa-l. Dipôs di interoga kes guarda di tudu manera, e manda mata-s. Nton, Eródis sai di Judéia y e ba fika na sidadi di Sezaréia pa algun ténpu. ²⁰ Agóra, Eródis staba xatiadu ku povu di kes sidadi di Tiru y Sidan. Nton povu di kes sidadi djunta kabésa pa forma un grupu pa ba pidi-l pas, pamodi fornisimentu di alimentu pa ses sidadi éra dipendenti di pruvínsia ki Eródis ta governaba. Es atxa ajuda ajuda di Blastu, ki éra altu funsionáriu di rei, y dia fika markadu pa ses raunion ku Eródis. ²¹ Kontise ki na dia markadu, Eródis staba bistidu ku se ropa bazófu di rei, xintadu na se tronu y e sa ta fazeba un grandi diskursu pa es. ²² Povu staba ta grita: "É vós di Déus, e ka é di ómi." ²³ Nton, na kel óra mê, un anju di Sinhor da Eródis un pankada, pamodi e toma glória ki sô Déus ta merese. Y dipôs, txeu vermi fika ta kume-l y e móre. ²⁴ Entritantu, palavra di Déus kontinua ta krese y spadja. ²⁵ Y Barnabé ku Saulu volta di ses mison di leba oférta pa Jerusalen, y es traze djuntu ku es, Djon, ki tanbe ten nómi di Márkus.