¹ Agó, na sidadi di Sezaréia, tenba un ómi di Kornéliu, komandanti rimanu, ki ta pertenseba un batadjon txomadu Italianu. ² Kornéliu éra um ómi ralijiozu ki ta ruspetaba Déus, djuntu ku tudu algen di se kaza. E ta daba txeu zimóla pa povu judeu, u e ka ta faltaba na orason pa Déus. ³ Un dia, pa vólta di três óra di tardi, Koénéliu tevi un vizon. Na kel vizon, e odja klaru un anju di Déus. Déus ki txiga na el, i txoma-l: Kornéliu! ⁴ Kornéliu fika ku odju pregadu na kel anju, y ku txeu medu e fla: É kuzé, sinhor? Anju fla-l: Bus orason, ku bus zimóla, ta txiga dianti di Déus sima lenbransa. ⁵ Gosi li, manda uns ómi ti bila di Jopi, pa ba txoma un tal di Simon, ki tanbe ta txomadu Pedru. ⁶ El é óspri na kaza di un otu Simin, trabadjador di péli, ki mora djuntu mar. ⁷ Timenti kel anju, ki pâpia ku el, estaba ta bai, Kornéliu txoma dôs di ses enpregadu, i ki ta ruspetaba Déus. ⁸ Dipôs ki e splika-s tudu kuza, e manda-s pa Jopi. ⁹ Na kel otu dia, na mézmu óra ki kes ómi di Kornéliu staba na kaminhu pértu di Jopi, Pdru subi pa terasu pa ba ora. ¹⁰ Éra pa vólta di meiu-dia, i Pedru xinti fómi, ku vontadi di kum se rafeison. Má inkuantu es staba ta pripara kumida, Pedru tevi un vizon. ¹¹ E odja séu ta abri, e un kuza dixi sima lensól grandi, prgadu na kes kuatu pónta. ¹² Kel kuza dixi pa téra, e déntu di el staba tudu tipu di animal: Kes ki ten kuatu pé, kes ki ta reasta na txon e kes ki ta bua na séu. ¹³ Nton, un vós fla-l: Pedru, labanta! Mata e bu kume. ¹⁴ Má Pedru fla: Di ninhun manera, Sinhor, pamodi nunka N ka kume nada suju ô inpuru. ¹⁵ Kel vós torna fla-l pa sugundu bês: Kes kuza ki Déus poi linpu, ka bu fla ma es é suju. ¹⁶ Kel-li kontise três bês, e dirapenti kel kuza sima un lensól lebadu di vólta pa séu. ¹⁷ Gó, kes ómi ki Kornéliu manda dja txigaba na Jopi, e dja es tinha purguntadu pa kaza di Simon, trabadjador di péli. Nton, inkuantu Pedru inda staba konfuzu ta matuta na kuzé ki ta siginifika kel vizon ki e tevi, kes ómi para sakédu na porton di kel kaza. ¹⁸ Es txoma na kaza e es purgunta: Purakazu, nhos ten un ómi ospradu li, ku nómi di Simon, ki tanbe ta txomadu Pedru? ¹⁹ Timenti Pedru inda staba ta matutaba na kel vizon, Spritu Santu fla-l: Ala três ómi ben djobe-u. ²⁰ Purtantu, bu pripara, e ka bu tuntunhi di dixi e bai ku es, pamô é Mi ki ta manda-s. ²¹ Pedru dixi i e fla kes ómi: Ale-m li. É mi ki nhos sa ta djobe. Kuzé ki traze-nhos li? ²² Es fla: Komandanti Kornéliu manda-nu li. El é un ómi justu ki ta ruspeta Déus, e tudu povu judeu ta pâpia ben di el. Un santu anju di Déus manda-l pa e kunbida-u pa se kaza, pa e pode obi kes palabra ki bu ten pa fla-l. ²³ Nton, Pedru kunbida-s pa es entra, pa es pasa noti la. Na kel otu dia, Pedru labanta i e bai ku kes ómi ki Kornéliu manda, e alguns irmon di Jopi bai ku el tanbe. ²⁴ Es txiga na sidadi di Sezaréia na dia siginti. Kornéliu kunbida ses parenti, ku ses amigu más pértu, i tudu djuntu es sa ta speraba Pedru. ²⁵ Óra ki Pedru txiga, Kornéliu ba inkontra ku el. E finka duedju na ´pe di Pedru, i e adora-l. ²⁶ Má Pedru labanta-l y e fla-l: Labanta! Ami é ómi sima bo! ²⁷ Timenti Pedru sa ta papiaba ku Kornéliu, e entra na se kaza, e atxa txeu algen djuntadu la. ²⁸ Nton Pedru fla-s: Nhos mê, nhos sabe dretu ma é kóntra lei di nha ralijion judeu pa un ómi judeu vizita ô djunta ku algen ki ka é judeu. Má Déus mostra-m ki N ka debe pensa ma kalker otu pesoa é suju ô inpuru. ²⁹ Purisu, óra ki nhos txoma-m, N ben sen purgunta. Agó, N sta li prontu pa obi razon ki nhos txoma-m. ³⁰ Kornéliu raspondi: Faze oji kuatu dia, pa vólta di es óra, três óra di tardi, ki N staba na nha kaza ta ora. ³¹ Dirapenti, un ómi, ku ropa límia, parse nha dianti. I e fla: Kornéliu, bus orason obidu, e bus zimóla txiga dianti di Déus pa lenbransa. ³² Nton, manda buska Simon, ki tanbe ta txomadu Pedru. E sta na bila di Jopi, ospradu na kaza di otu Simon, trabadjador di péli, ki ta mora djuntu mar. ³³ Na kel óra mê, N manda buska-u, i ku bondadi bu ben. Gosi, nu sta tudu djuntadu li dianti di Déus, pa nu obi tudu kuza ki Sinhor manda fla-nu através di bo. ³⁴ Nton Pedru toma palaber i e fla: Na berdadi, gosi li N da kónta ma Déus ka ta faze diferénsa di pesoas. ³⁵ Má na tudu rasa di mundu, tudu algen ki ta ruspeta-l, i ki ta faze kel ki é justu, es é rasebedu dretu na se dianti. ³⁶ Déus manda mensaji pa fidjus di Izrael, pa es konta Notísia Sabi di pas, ki ta bén através di Jizus Kristu, ki é Sinhor di tudu. ³⁷ Dja nhos sabe di kuzas ki kontise na tudu zóna di Judéia, ki kumesa na Galiléia, dipôs di batizmu ki Djon anúnsia. Nhos sabe modi ki Déus unji Jizus di Nazaré ku Spritu Santu i ku puder. ³⁸ I E anda na tudu kau ta faze kuza dretu, ta kura tudu algén ki staba frontadu pa diabu, pamodi Déus staba ku El. ³⁹ I nos apóstulu, nos é tistimunha di tudu kuza Jizus faze, tantu na sidadi di Jeruzalen, kómu na tudu téra di judeus. Es mata-L prindadu na un krus di madera. ⁴⁰ Má Déus rasusita-L na tirseru dia, i Déus dexa-L ser odjadu bibu. ⁴¹ E ka parse pa tudu algen, má sô pa nos, kes tistimunha ki Déus dja skodjeba ántis, pa kume i bebe ku El dipôs ki Déus rasusita-L di meiu di mortus. ⁴² E manda-nu konta Notísia Sabi pa tudu algen, i da tistimunhu ma é El ki Déus skodje pa ser juís di bibus ku mortus. ⁴³ Y é sobri es Jizus ki tudu pruféta da tistimunhu. Es ta papiaba ma tudu alen ki ta kridita na Jizus ta rasebe perdon di ses pekadu, através di se nómi. ⁴⁴ Timenti inda Pedru sa ta papiaba, Spritu Santu dixi riba tudukes ki sa ta obiba se mensaji. ⁴⁵ Tudu kes krenti judeus di Jopi, ki kunpanhaba Pedru, es fika spantadu, pamodi don di Spritu Santu diramadu mézmu riba kes krenti ki ta éra judeu. ⁴⁶ Ka tenba dúvida, pamodi es obi kes krenti ki ka éra judeu ta pápia na otus língua i ta loba Déus. Nton Pedru fla: Kes gentis li rasebe Spritu Santu di mézmu manera ki nos. ⁴⁷ Nton, kenha ki pode nega-s agu pa stroba-s di ser batizadu? ⁴⁸ Pedru manda pa es ser batizadu na nómi di Jizus Kristu. Dipôs, es pidi Pedru pa e fika ku es más uns dia.