¹ Kaya, bilang bilanggo sa Panginoon, nakikiusap ako sa inyo na lumakad kayo na karapat-dapat sa pagkatawag sa inyo ng Diyos. ² Mamuhay kayo nang may buong pagpapakumbaba, mahinahon, at may katiyagaan. Tanggapin ninyo ang bawat isa nang may pagmamahal . ³ Pagsikapan ninyong manatili ang pagkakaisa sa Espiritu sa bigkis ng kapayapaan. ⁴ May iisang katawan at iisang Espiritu, katulad nang pagtawag sa inyo sa iisang pag-asa na inyong pagkatawag. ⁵ Iisang Panginoon, iisang pananampalataya, iisang bautismo, ⁶ at iisang Diyos at Ama ng lahat, na nakakahigit sa lahat, kumikilos sa lahat, at nananatili sa lahat. ⁷ Binigyan ang bawat-isa sa atin ng kaloob ayon sa sukat ng kaloob ni Cristo. ⁸ Katulad ng sinabi sa kasulatan: "Noong umakyat siya sa itaas, dinala niya ang mga bihag sa pagkabihag. Binigyan niya ng kaloob ang mga tao." ⁹ Anong kahulugan ng, "Umakyat siya," para din ipakita na bumaba rin siya sa mababang bahagi ng mundo? ¹⁰ Siya na bumaba ay siya ring umakyat sa ibabaw ng buong kalangitan, para punuin niya ang lahat ng mga bagay. ¹¹ At binigyan niya ng kaloob ang ilan na maging mga apostol, propeta, ebanghelista, pastor, at guro. ¹² Ginawa niya ito upang ihanda ang mga mananampalataya sa paglilingkod at pagpapatibay ng katawan ni Cristo, ¹³ para maabot nating lahat ang pagkakaisa ng pananampalataya at makilala ang Anak ng Diyos, at para lumago sa pamumuhay ayon sa kapuspusan na itinakda ni Cristo. ¹⁴ Sa gayon, hindi na tayo maging tulad ng mga bata na madaling naliligaw at hindi na tayo natatangay palayo dahil sa mga maling katuruan, sa pandaraya ng mga tao, at panlilinlang. ¹⁵ Sa halip, masabi natin ang katotohanan nang may pag-ibig at lumago tayo sa lahat ng bagay sa kaniya, ang ulo na si Cristo. ¹⁶ Sa kanya nakaugnay ang buong katawan, magkarugtong at dikit-dikit. Magkakadugtong ang bawat bahagi upang lumago ang buong katawan at tumibay sa pag-ibig. ¹⁷ Kaya sinasabi ko sa inyo at nagpapatotoo ako sa Panginoon na huwag na kayong lumakad gaya ng paglakad ng mga Genil ayon sa mga walang kabuluhang bagay. ¹⁸ Nadidiliman ang kanilang pag-iisip, malayo ang buhay nila sa DIyos dahil sa kamangmangan at sa matigas nilang puso, ¹⁹ at nagpasakop sila sa kahalayan, sa lahat ng maruruming gawain, at naging sakim. ²⁰ Pero hindi ganyan ang natutunan niyo kay Cristo, ²¹ Tunay na napakinggan ninyo siya at tinuruan ayon sa katotohan tungkol kay Cristo. ²² Tungkol sa dati ninyong pamumuhay, tinuruan kayong hubarin ang dating pagkatao na patuloy na sumasama dahil sa masamang pagnanasa. ²³ Sa gayon, magkakaroon kayo ng bagong pag-iisip, ²⁴ at isuot ninyo ang bagong pagkatao. Nilikha kayo na maging katulad ng Diyos sa katuwiran, kabanalan, at katotohanan. ²⁵ Kaya dapat ninyong iwan ang lahat ng pagsisinungaling at magsabi ng totoo sa kanyang kapwa dahil tayong lahat ay mga bahagi ng iisang katawan. ²⁶ Iwasan ninyong magkasala tuwing magagalit kayo. Huwag ninyong hayaang lumubog ang araw na nagagalit kayo. ²⁷ Huwag mong bigyan ng pagkakataon ang diyablo. ²⁸ Sabihan ninyong huwag nang magnakaw ang nagnanakaw kundi magtrabaho siya at magsikap sa buhay sa sarili niyang mga kamay para mayroon siyang maibahagi sa nangangailangan. ²⁹ Huwag kayong magsalita ng masamang bagay kundi ang mga salitang makapagbibigay ng lakas sa nangangailangan. ³⁰ At huwag ninyong sasaktan ang damdaming ng Banal na Espiritu ng Diyos dahil tinatakan niya kayo para sa araw ng pagtutubos. ³¹ Alisin ninyo ang lahat ng sama ng loob, poot, galit, pagtatalo, at pang-iinsulto, sa isa't isa. ³² Maging mabuti kayo at mahabagin sa isa't isa. Magpatawaran kayo katulad ng pagpapatawad sa inyo ng Diyos sa pamamagitan ni Cristo.