¹ Pagkatapos nito, naglakbay si Jesus sa Galilea. Ayaw niyang pumunta sa Judea dahil hinahanap siya ng mga Judio doon na gustong pumatay sa kanya. ² Malapit na sa araw na iyon ang Pista ng Tolda ng mga Judio. ³ Kaya sinabi sa kaniya ng kaniyang mga kapatid, "Umalis ka sa lugar na ito at pumunta ka sa Judea para makita ng inyong mga alagad ang mga kaya mong gawin. ⁴ Walang taong gagawa ng anumang bagay na palihim kung gusto niyang magpakilala sa maraming tao. Kung ginagawa mo ang mga bagay na ito, dapat mong ipakita ang sarili mo sa mundo." ⁵ Hindi rin siya pinaniwalaan ng kaniyang mga kapatid. ⁶ Kaya sinabi ni Jesus sa kanila, "Hindi pa dumarating ang tama kong oras, pero lagi kayong handa sa inyong oras. ⁷ Hindi mapopoot ang mundo sa inyo pero kinapopootan ako nito dahil masasama ang ginagawa nito. ⁸ Magpunta na kayo sa pista. Hindi ako pupunta sa pistang ito dahil hindi pa dumarating ang tama kong oras." ⁹ Pagkatapos niyang sabihin ang mga ito, nanatili siya sa Galilea. ¹⁰ Nung nagpunta ang kaniyang mga kapatid sa pista, sumunod din si Jesus pero nang palihim. ¹¹ Hinahanap siya ng mga Judio sa pista. Tanong nila, "Nasaan siya?" ¹² Marami ang pag-uusap ng mga mamamayan tungkol sa kaniya. Sinabi ng ilan, "Mabuti siyang tao." Pero sinabi ng iba, "Hindi, dahil niloloko niya ang mga tao." ¹³ Pero takot ang mga tao sa mga Judio kaya hindi nila siya pinag-uusapan sa harap ng maraming tao, ¹⁴ Noong nasa kalagitnaan na ng pista, nagpunta si Jesus sa templo at nagsimula siyang magturo. ¹⁵ Namangha ang mga Judio sa kanya at nagsabi, "Bakit napakaraming nalalaman ng taong ito gayong hindi naman siya nakapag-aral?" ¹⁶ Sinagot sila ni Jesus, "Hindi sa akin ang aral na ito kundi sa kaniyang nagsugo sa akin." ¹⁷ Kung mayroon mang isa sa inyong susunod sa kaniyang kalooban, malalaman niya ang turong ito kung galing ba ito sa Diyos o nagsasalita lang siya para sa sarili. ¹⁸ Ang sinumang nagsasalita para sa kaniyang sarili ay naghahanap ng papuri sa sarili pero ang sinumang naghahangad na purihin ang nagsugo sa kaniya ay taong nagsasabi ng totoo at wala siyang pagkakamali. ¹⁹ Hindi ba ibinigay sa inyo ni Moises ang kautusan? Pero wala naman sa inyong nakakasunod. Bakit niyo akong gustong patayin? ²⁰ Sumagot ang madla, "Sinasapian ka ng demonyo. Sino bang gustong pumatay sa iyo?" ²¹ Sinagot sila ni Jesus, "Gumawa ako ng isang himala at hinahangaan niyong lahat ito. ²² Ibinigay sa inyo ni Moises ang pagtutuli (galing ito talaga sa inyong mga ninuno at hindi kay Moises), at nagtutuli kayo ng bata tuwing Araw ng Pamamahinga. ²³ Kung may lalaking tinutuli sa Araw ng Pamamahinga para matupad ang kautusan ni Moises, bakit kayo nagagalit sa akin kung pinagaling ko ang lalaki sa Araw ng Pamamahinga? ²⁴ Huwag kayong humusga dahil lang sa nakikita ninyo kundi humusga kayo ng tama. ²⁵ Mayroon ilan sa kanilang mula sa Jerusalem na nagsabi, "Hindi ba ito yung taong gusto nilang patayin?" ²⁶ Tingnan ninyo kung paanong malaya siyang nakakapagturo pero wala silang masabi laban sa kaniya. Hindi kaya alam talaga ng mga pinuno na si Cristo nga ang taong ito? ²⁷ Pero alam natin kung saan siya nanggaling. Pag dumating na si Cristo, walang makakaalam kung saan siya nanggaling. ²⁸ Kaya nagpahayag si Jesus nung nagtuturo siya sa templo, "Kilala ninyo ako at alam niyo kung saan ako nanggaling. Naparito ako hindi para sa sarili ko pero ang nagsugo sa akin ay tunay pero hindi ninyo siya kilala. ²⁹ Kilala ko siya dahil galing ako sa kaniya at isinugo niya ako. ³⁰ Gusto siyang hulihin ng ilan sa kanila pero walang sumubok na humawak sa kaniya dahil hindi pa niya oras. ³¹ Marami sa mga naroroon ang naniwala sa kaniya at sinabi nila, "Pag dumating kaya ang Cristo, mas marami pa ba siyang magagawang mga tanda kaysa sa mga ginawa niya? ³² Narinig ng mga Pariseo ang mga pinag-uusapan na ito ng mga tao tungkol kay Jesus. Kaya nagpadala ang mga Pariseo ng mga kawal para hulihin siya. ³³ Sinabi ni Jesus, "Makakasama niyo pa ako ng panandaliang panahon at pagkatapos nito, babalik ako sa nagsugo sa akin. ³⁴ Hahanapin ninyo ako pero hindi niyo ako matatagpuan. Pupunta ako sa isang lugar pero hindi niyo ako mapupuntahan." ³⁵ Kaya nagusap-usap silang mga Judio, "Saang lugar pupunta ang taong ito na hindi natin siya kayang hanapin? Pupunta ba siya sa mga Judiong naninirahan sa mga Griyego para turuan niya ang mga Griyego? ³⁶ Anong ibig sabihin ng sinabi niyang, "Hahanapin ninyo ako pero hindi niyo ako matatagpuan. Pupunta ako sa isang lugar pero hindi niyo ako mapupuntahan?" ³⁷ Pagdating ng huling araw ng pista, tumayo sa Jesus at nagpahayag, "Ang sinumang nauuhaw, lumapit siya sa akin at uminom. ³⁸ Ang sinumang naniniwala sa akin, magbubukal ang tubig sa kaniyang katawan gaya ng sinasabi sa Kasulatan. ³⁹ Sinabi niya ito tungkol sa Espiritu na tatanggapin ng lahat na naniniwala sa kanya. Pero hindi pa dumarating ang Espiritu sa mga araw na ito dahil hindi pa niluluwalhati si Jesus. ⁴⁰ May ilan sa kanila doon na nakapakinig ang nagsabi, "Siya na nga talaga ang propeta." ⁴¹ Sinabi naman ng iba, "Siya nga ang Cristo." Pero may iba ring nagsabi, "Magmumula ba sa Galilea ang Cristo? ⁴² Hindi ba sinabi ng Kasulatan na magmumula ang Cristo sa lipi ni David at sa kaniyang bayan na Bethlehem siya magmumula?" ⁴³ Kaya nagkaroon ng pagkakahati ang mga tao dahil sa kaniya. ⁴⁴ May mga taong gusto siyang hulihin pero walang sumubok na gumawa nito. ⁴⁵ Nung bumalik ang mga kawal sa mga punong pari at Pariseo, sinabi nila sa mga kawal, "Bakit hindi niyo siya dinakip?" ⁴⁶ Sumagot ang mga kawal, "Wala pang taong nagsalita na tulad niya." ⁴⁷ Kaya sumagot ang mga Pariseo, "Pati ba kayo ay nadaya rin?" ⁴⁸ May mga pinuno bang naniwala sa kaniya o kahit isa sa mga pangkat ng mga Phariseo? ⁴⁹ Pero hindi alam ng mga taong naroon ang kautusan at sila ay nasa ilalim ng sumpa." ⁵⁰ Nagsalita si Nicodemo sa kanila, (Siya ang isa sa mga Phariseong nagpunta kay Jesus) ⁵¹ "Sakop ba ng batas natin na husgahan agad ang isang tao kung hindi pa siya nililitis at alam kung anong ginawa niya? ⁵² "Sa Galilea ka rin ba nanggaling? Hanapin mo sa Kasulatan at makikita mong walang propetang nanggaling sa Galilea." ⁵³ [Kaya sila'y nagsiuwi sa kanilang tahanan.]