¹ ka tu shiyamiswa che itumero, twina ikozo ne Ireza cha Simwiine wetu Jeso Kiristi. ² Cha kwe twina ne ku sika kwetu che itumero mweyi isehuhazo itu zimeni mwilyi. Tu sanga mu ku kola kwe zikeza Ireza ya tuha, ku kola kweti ne tu kuku kopanere mwi iverengo ye Ireza. ³ Insine ichi vulyo, mi tu sanga mu manyando etu nawo. Twizi kuti ku nyanda kuzwisa kulyiwonda. ⁴ Kolyiwonda kuzwisa kutambulwa, ne kutambulwa kuzwisa kukola kwe zikeza. ⁵ Uku kukola ka ku swavisa, mukuti chishemo che Ireza chi ve itirwa mwi inkulo zeetu che Luhuho lujolola, u tu va hewa. ⁶ Mukuti che tu vulyiteziho, che inako ishiyeme Kiristi na fwira vasenaIreza. ⁷ Mukuti umwi kukutu a fwire mushiyami. Njo kuti, mwendi umwi mweeti nakafwe a fwiri muntu yo shiyeme. ⁸ Mi Ireza u shupa chishemo chakwe kweetu, mukuti che tu siiri tu vavilala, Kirisiti ava tufwiiri. ⁹ Ku wera, lyinu, hanu kuti tu shiyamiswa che malaha akwe, ka tu hazwa kwi vukalyi vwe Ireza chawo. ¹⁰ Mukuti,haiva che tu siiri zira, tu va vulyinsani kwe Ireza che lufu lwa mwana wakwe, ahulu maswe, ha tu va mana ku vulyinsana, ka tu vulukwa che vuhalo vwaakwe. ¹¹ Insini ichi vulyo, mi tu lyi itumera mwe Ireza cha simwine weetu Jeso Kirisiti, chakwe iye hanu tu tambwire uku kuvolyinsana. ¹² Vulyo lyinu, siina che muntu u mwina chivi chi ve injiri mwi inkanda, mwe iyi inzira lufu lu venjiri che chivi. Mane lufu lu hasene ku vantu vonse, cheivaka vonse vena chivi. ¹³ Mukuti ku kazima ha mulawo, chivi chi vena mwi inkanda, mi ka kwina kwi itavira chivi che ku sena mulawo. ¹⁴ nihakuvavulyo, lufu lu vusiza kuzwa kwa Atami kukasika ha Mushe, mani nangati ku zamba avo va sena va va chiti chivi siina kusateka kwa Atami, yolyi chikawo chakwe avalyi kwiza. ¹⁵ Mi nangati vulyo, inewo isa ruwerwa ka yi swani ni vuvilaala. Mukuti haiva che chivi cho umwina vungi vu va fwi, isehuhazo ye Ireza i va chiti zingi ne inewo che isehuhazo ye muntu u mwina, Jeso Kirisiti, i injihire vangi. ¹⁶ Mukuti inewo ka yi swani ne chivolyeri che uzu ava chiti chivi. Mukuti kwe imwi imbalyi, iwatulo ye kuvonwa mulaandu iveza cheivaka lye mafusisa u muntu u mwina. Mi kwi iyanza lyimwi, inewo isalyiherwa itwala mu kushiyamisiwa iveza hamasulye u milaandu mingi. ¹⁷ Mukuti haiva, che mulaandu u umwi, lufu lu lawula cho umwina, ahulu maswe avo va tambula kwizula kwe inse ne inewo ye kulawula kushiyeme che vuhalo vo umwi, Jeso Kirisiti. ¹⁸ Lyinu vulyo, sina che vuvilala vo umwi vantu vonse vaveza ku kuwatulwa, nako lyinu che musevezi umwina wo kushiyama kuveza kushiyamisiwa ko vuhalo ku vantu vonse. ¹⁹ Mukuti sina che kusazuwa ko muntu umwina vungi vu va chitwa vavilala, vo vulyo che kuzuwa ko umwi vungi ka va shiyamisiwa. ²⁰ Mi mulawo u ve njiri nawo, kuchitira kuti vuvilala vu wolye kwi injiha. Mi aho vuvilala ha vunjihite, isehuhazo i venjihi ahulu. ²¹ Ichi chivapangahalyi vulyo kuti, sina chivi ha chivusiza mwi ifu, nangati vulyo isehuhazo ni wolye kulawula che kushiyama kwe vuhalo vusamani cha Jeso Kirisiti Simwine weetu.