¹ Lyinu chintunzi a ka tu cho kuti Aburahama, isukulwetu kuya chechinyama, wanine? ² Mukuti haiva Aburahama a va shiysmiswa che misevezi, naa vavi ne ivaka lye ku lyinyemuna, mi insini havusu vwe Ireza. ³ Mukuti itimana i tinzi? '' Aburahama a va zumini Ireza, mane ne kwa valyirwa iye siina kushiyama.'' ⁴ Lyinu kwaalyi yo tenda, kuhumbulyerwa ka ku valwa niiri isehuhazo, mi niiri icho chikorweetwa. ⁵ Mi kwaalyi ya sa tendi mi kwande o kuzumina mwaalyi iye yo shiyamisa vaseena Ireza, itumero yaakwe i vaalwa niiri kushiyama. ⁶ Dafite naye u wamba mashiho ha muntu Ireza wa valyira kushiyamiswa kunze lye misevezi. ⁷ A vati, '' Mikonde kwavo va wonderwa vuvilaala vwavo, ne avo va hungwirwa zivi zaaavo. ⁸ Mikonde ku muntu Ireza yeti na vulye ku vala chivi.'' ⁹ Lyini uwu mikonde i wambwa vulyo havo ve kufundwa ikavi kwaavo, nandi naako havo va kusafundwa ikavi? Mukuti tu cho, '' Itumero iva valyirwa kwa Aburahama niiri kushiyama.'' ¹⁰ Lyinu i va valwa vulye? Aburahama ha vena mu kufundwa ikavi, nandi mu kusafundwa ikavi? Ka hena ivalyi mu kufundwa ikavi, mi mu kusafundwa ikavi. ¹¹ Aburahama a va tambulyi chishupo che kufundwa ikavi. Ichi i valyi chiyazo che kushayma kwe itumero ya vena nayo cho siina mu kusafundwa ikavi. Chihantu che chi chishupo ivalyi kuti a vavi ishavo vonse avo va zumina, nangati vena mu kusafundwa ikavi. Ichi chi talusa kuti kushiyama ka ku va valyirwa. ¹² Ichi naako chi va talusa kuti Aburahama a vavi sha kufundwa ikavi wavo va sazwi vulyo ku kufundwa ikavi, mi naako kwavo va tonda mu matende e isheetu Aburahama. Mani ichi e valyi itumero ya veena nayo mu kusafundwa ikavi. ¹³ Mukuti ka hena ivalyi cho mulawo kuti isuluhezo i va hewa Aburahama ne ku vana-va-na, iyi isuluhezo kuti vavi valya inkaanda vuswa. Kunzelyovulyo, i vaalyi che kushiyama kwe itumero. ¹⁴ Mukuti haiva avo valyi vo mulawo valya vuswa, itumero i pangiwa vula chintu, ne isuluhezo i nyansizwa. ¹⁵ Mukuti mulawo u lyeeta vukalyi, mi ha sena mulawo, ka kwina nihaili kusateka. ¹⁶ che ilyi ivaka ichi chipangahala che itumero, vulyo kuti kuve che inse. Cheivaka lyo vulyo, isuluhezo i tamalyerere vana-va-vana vonse. Mane ava vana-va-vana keeti ni ve njirike avo vulyo veezi mulawo, mi naavo vazwa kwi itumero ya Aburahama. Mukuti nje ishetu tu vonse, ¹⁷ siina mu ku ngolyetwa, '' Ni va ku chiti sha makaanda mangi. '' Aburahama a veena mukuvaho kwaalyi iye ya va sepi, ni ilyi, Ireza, ya ha vuhalo ku vafu ne ku sumpa zintu zi sa hena mu kuvaho. ¹⁸ kunze lye zizimo zo kunze zonse, Aburahama i va koza ku sepa Ireza che zikeza. Lyinu a vavi sha makaanda mangi, kuya che chi va wambiwa, '' Vovolyo vana-va-vana vako mweeti ni vave. '' ¹⁹ Ka hena a vena hansi mwi itumero. Aburahama i va zuwiseza kuti muviri waakwe ka hena u valyi ku woola kuva ne vaana(ivaka a va yendere zirimo ziina hundred). I va taambulyi naako kuti ipopelo ya Sara ka hena i valyi ku wola ku zala vana. ²⁰ Mi cheivaka lye isepiso ye Ireza, Aburahama ka hena ava woshawosha mu kusazumina. Kwandevulyo, ava kozwa mwi itumero na ha Ireza kuvokwa. ²¹ A va zumini kumanine kuti Ireza chava sepisa, a valyi kuwola ku chichitahaza. ²² Lyinu ichi nacho a vachi valyirwa niiri kushiyama. ²³ Lyinu ka hena ku va ngolyerwa kuvolyera iye, kuti ku va valyirwa iye. ²⁴ Ku va ngolyerwa iswe naswe, veti ni ku valyerwa, iswe tu zumina mwalyi iye ava vusa Jeso Simwine wetu mwa avo vafwire. ²⁵ Uzu injiyena a va lyeterwa vuvilala vweetu mane na vusikwizwa kushiyamiswa kweetu.