¹ Mmi haiva kuti Ireeza ava mivusa cha Kiririti, musake ziintu zokwiwulu, kwekere Kirisiti kwiyanza lye Ireeza lya malyo. ² Muzeze che ziintu ziina kwiwulu, isingi che ziintu zina munkanda. ³ Mukuti muvafwi, mane vuhalo vweenu vuwungwirwa ne Kirisiti mwe Ireeza. ⁴ Hakuti Kirisiti chokeeza, iiye vuhalo vweenu, mmi naanwe kamwiize naye mukuveera ⁵ Lyinu, Mwihaye, mikwa yina munkanda - vuhulye, ne ziina ikwe, kuzezerera vuvi, luhuho luvi, ne inkulonkando, yo kutendera vereeza ve nkanda. ⁶ Ivaka lye izwezi ziintu kuti vukalyi vwe Ireeza vwiize kuvaana ve chikwaame vasa zuwi. ⁷ Ivaka lye izwezi ziintu nanwe zimuvayendi muziri chimusihala chazo. ⁸ Mmi hanu mulukera kuzisiya zoonse vukalyi, kuvenga, mihupulo mivi, kutukana, ne manzwi afwisa insoni asiye kuzwa mutuholo twenu. ⁹ Musiye kulyichenga zesheya mukuti chimuva zavulyi muntu wakale ne mitendo yaakwe, ¹⁰ mmi chimuva zwati muntu muhya ya vachitwa chihya chokwiziva kuya chechiswano chakwe yava chilundi. ¹¹ Aha lyinu kakusina Muhirika ne Mujuta, wina mumupato kapa yasena mumupato, mung'ete, , muhikana, yosumunwinwa, mmi Kirisiti nje zoonse, mmi wina muzoonse. ¹² 12 Muzwate, lyinu, sina va valyisalyirwa ne Ireeza, vajolola ne vasunitwa, veena inkulondotu, kushiyama, ne kulyiviikakunsi, ne inkulonde. ¹³ Mulyichite neenza, mulyisepe. Mmi umwi chovirerera mwaakwe, a muwondere moona Simwiine mwa vamionderi. ¹⁴ Hewulu lyezo zoonse ziintu, mulyisune, nkoku wondinzana ko kushiyama. ¹⁵ Mmi chisemo cha Kirisiti chivusa munkulo zeenu. Ivalyi chechwechi chisemo kuti musumpirwa mu muviri umwina. Mmi mulyitumere. ¹⁶ Linzwi lya Kirisiti lyizaake kweenu cho vusakusima. Lyimihe maano wonse mulyisune ne kulyitute za lisamu ne nzimbo zo muchifera ne nzimbo zo luhuho. Muzimbe cho kulyitumera kwe Ireeza munkulo zeenu. ¹⁷ Mmi chimwi ne chimwi chimuchita, che liinzwi kapa kutendo, zonse muzichichite chezina lya Simwiine Jeso. Mulyitumere kwe Ireeza Tayo chaakwe. ¹⁸ Vakulwakazi, mulyivike kunsi lyi vamwihyenwanwe, sina hakuswanere cha Simwiine. ¹⁹ Vakwaame, musune vamwihyenwaanwe, mmi musiye kuva kalyihira. ²⁰ Vaana mukuteke vazazi veenu muzintu zoonse mukuti ichi chisangisa Simwiine. ²¹ Veshaavo-vaana musiye kukalyihisa vaana veenu, kuti vasiye kunyerwa. ²² Vahikana, muzuwe vasimwiine veenu muzintu zoonse cho vuuntu musiye kuvatendera chivamilolyete vulyo sineri musangisa vantu vulyo, mmi chenkulo ijolola. Mutiye Simwiine. ²³ Chimwi ne chimwi chimuchita, muchichite che inkulo imwiina iri muchitira Simwiine ising'i bantu. ²⁴ Mwiizi kuti kamutambulye vuswa kwa Simwiine. Nje Simwiine Kirisiti umutendera. ²⁵ Umwi no umwi yochita zisashiyeme katambulye zivilala za vachiti, mmi kakwiina isovozi.