¹ Lyinu nisaka kuti mwizive nkoondo inkaando ini milwira unwe, ne vena kwa Laudisia, ne voonse vaseni kuvona chifateho chaangu munyama. ² Nichita ichi kuti inkulo zaavo zikozwa cho kukopana hamwiina mukulyisuna ne muku heewa vuhumi voonse vovusakusima vo kuzuminzana, mukwiziva ziliwungwire zo vusakusina ze Ireeza, iiye, Kirisiti. ³ Mwaalyi vuhumi voonse ne maano ne kwiiziva zi wungwirwa. ⁴ Ni waaba ichi kuti kaanzi kuvi nemuuntu yeti cho miziyeza cha maanzwi oku micheenga. ⁵ Mmi naandi Kanina naanwe munyama, naaho Nina naanwe muluhuho. Nisaanga kuvona kulyiwoonda kweenu ne kukola mukuzumina mwa Kirisiti ⁶ Lyinu sina hamuvatambulyi Kirisiti Simwiine, muyende chalyi. ⁷ Muziike mihisi yenu kwalyi, muzaakwa mwaalyi, muzaake mukuzumina moona mumu varutwa, mmi muzwirehavusu mukulyitumera. ⁸ Mutokomere kuti muntu kanzi amiwondi che tuto ya maano, ne kumichengerera che zisena vusakusima ne kumitwala muzintu zivafapanera vaantu chokuwaamba, nu che tuto zenkaanda zamatangiro, mmi ni vasawondesa za Kirisiti. ⁹ Mukuti mwalyi kukwiina kwizuzirizwa kwizwire kwe Ireeza mumuviriko. ¹⁰ Mmi mwizuzirikizwa chaakwe. Iye njo muhitiri weziho zonse ne wovusimwiine. ¹¹ Chaakwe naanwe muvenjiri mumupato usena uvanchitwa nevaantu mu kuzwiisa muviri we nyama, kono mumupato wa Kirisiti. ¹² Muvawungwa naye mwi kolovezo. Hape chaakwe muvavuswa mukuzumina muziho ze Ireeza, yava muvuusa kuva fwiire. ¹³ Mmi ha muvafwiire mumilandu yenu ne mukusenjira mu mupato we inyama yenu, ava michiti kuhazwa hamwiina naye ne kutuwondera zoonse zituvafosa. ¹⁴ Ava siindi zoonse zivang'olyetwa ze milandu ne milawo i valyi kutusumina. Ava izwiisa yoonse mmi naikokotera hachifapano. ¹⁵ Ava sumununi vusimwiine ne mivuso, na vafwiisensoni mukati kavoone, cho kuvazuunda che chifapano. ¹⁶ Lyinu hanu, kanzi kuvi neyo miatula mukulya kapa kunya, kapa che izuva lyo kusaanga kapa mweezi chuusumpwa, kapa chamazuva e mikiti ye Insavata. ¹⁷ Izi minzunde ye zintu zikeeza, kono izo zoonse nje Kirisiti. ¹⁸ Musiye kuvuzwa mupuzo wokutiya ne muntu yo michenga, chokusaka kulyivozekeza haansi ne kutendera mangiloyi, wina vulyo uchita za seeni kuvona, mi utunduluswa mihupulo yaakwe ye nyama. ¹⁹ Na salyiwondi kumutwi. iyo muviri woose chuukweete ulyisikwa, mi ukopanya chensinga munungo ni ukweete ukula, ukuzwa ne Ireeza ²⁰ Lyinu chikuti muvafwi ne Kirisiti kwi ituto zamatangiro ze inkaanda, chiinzi hamusiyenda naazo sins musihala munkaanda: ²¹ "Usiye kuhinda, kapa kusoola, kapa woonda"? ²² Zoonse iizi ziintu zisinya muntu chokuhalwa chaazo, mmi itaelo ne ituto za vaantu. ²³ Izi ituto zivoneka kuva zamaano sineri kutendera Ireeza cho kusunu ne kulivozekeza haansi, ne kusa tokomera muviri. Kono kazina ituso mukuti kusangisa inyama vulyo.