¹ Paulusi, muapositola wa Kirisiti Jeeso cho kusuna kwe Ireeza, ne Timoti mwetu, ² ku vazumina ne vamweetu veena itumero kwa Kirisiti veena mwa Kolosia. Muve ne mikoonde ne kuzuwana kuzwa kwe Ireeza Isheetu ne Simwiine Jeeso Kirisiti. ³ Tulyitumera kwe Ireeza, Tayo wa Simwiine Jeeso Kirisiti, mmi tukuraperera inaako zoonse ⁴ Tuvazuwi zetumero yenu mwa Kirisiti Jeeso ne irato lyimwiina nalyo kuvoonse vazumina kwe Ireeza. ⁵ Mwiina iiri irato cheevaka lyokuzumina kweenu ku sepiso imuviikirwa kwiiwulu. Muvazuwi cheyi isepiso imuviikirwa lyinzwi lyo vusakusima, le ivangeri, ⁶ lichiliveeza kweenu. Iyi ivangeri ikweete iviika zihantu maane ikweete izwiira havusu munkaanda yoose. Kuvenavulyo ne kweenu kuzwa izuva lyimuva zuwi ne kwiiziva iinse ze Ireeza chovusakusima. ⁷ Iiyi nje ivangeri moona mumuvailyituti kwa Epafurasi, muhikana wetu yosunitwa, muhikana wiiina vusakusima wa Kirisiti mu chiziimo cheetu. ⁸ Epafarasi avachiti kuti twizive irato lyaako cho Luhuho. ⁹ Chevaka lyeri irato, kuzwa iizuva lyituvazuwi izozintu kana tuvazimiki ku muraperera. Tuvalyi ku kumbira kuti mwizuzirizwa cha maano ee izivvo yo kusuna kwaakwe mukwiiziva zoonse ne kuzuwiseza zoluhuho. ¹⁰ Tuvalyi kurapera kuti muyende cho vusakusima bwa Simwiine munzira zisangisa. Tuvalyi kurapera kuti muve ne zihaantu munzira imwi ne imwi ishiyeeme ne kuti muzwirekuvusu mukwiiziva Ireeza. ¹¹ Turapera kuti mukozwa muchimwi ne chimwi chamaano kuya che ziho zaakwe mukuwoodesa ne inkulonde. ¹² Turapera kuti muoolye kusangaahulu ne kulyitumera kwa Taayo, yava muchiti kuti muoolye kuva nechibalyi muvuswa vwa varumeri mwiiseri ¹³ Ava tusumununi muvusimwiine vwe ififi natu kuzikiza mu vusimwiine vo Mwanaakwe yo sunitwa. ¹⁴ Cho Mwanaakwe twiina kusumununwa chamalaha aakwe, ne kuwooderwa zivi. ¹⁵ Mwaana nje chiswaniso che Ireeza yaasa vonwa. Njo mwaana wovuvere muzoonse ziva vuumbwa. ¹⁶ Mukuti zintu zoonse ziva vuumbwa chaakwe, zoonse ziina kwiiwulu ne ziina munkaanda, zivoneka ne ziintu zisavoneki. Nangati vasimwiine va vusa kapa vusimwiine kapa muvuso kapa vahitizi, zintu zoonse ziva vuumbwa naye niziri zaakwe. ¹⁷ Wiina hewulu lyeziintu zoonse, mmi chaakwe zintu zoonse ziwoondene. ¹⁸ Mmi njo muhitizi wo muviri, ikereke. Nje wa katanzi nalyi mutaazi kwavana vafwiire, lyinu njiwentaazi muzintu zoonse. ¹⁹ Mukuti Ireeza a vasaangi kuti kwizuzirizwa kwaakwe koonse kuve kwaalyi, ²⁰ ne kuvozekeza ziintu zoonse kwaalyi cho Mwaane. Ireeza ava lyeti kuzuminzana cha malaha aha chifapano chakwe. Ireeza ava shiyamisa ziintu zoonse kwaalyimwiine, naandi zintu zoonse ziina munkaanda kapa ziintu ziina kwiwulu. ²¹ Mmi nanwe, imwinaako, muvalyi mumabukweenda kwe Ireeza hape nimulyi muzira zaakwe mukuzeza ne mumiteendo yenu mivilala. ²² Lyinu hanu chava mishiyamisa cho muviri waakwe cho lufu. Ava chiti ichi kuti amivooza nimulyingeene, nimusena mulandu, nikusena kuzekiswa havusu vwaakwe. ²³ Chikuti nimuzwira havusu mukuzumina, nekuwondesa, ni musazwi munzira yo vusakusima ni mulyiindire ivangeri imuvazuwi. Iyi nje ivangeri ivalyi kurutwa kuwumwi newumi muuntu ya va vuunbwa mwikoonde lye iwulu. Iyi nje ivangeri ivachiti kuti Iime Paulusi, nive ni muhikaana. ²⁴ Lyinu nisaanga mukusukuluka kwaangu chenu. Mmi nilyizuwa mumuviri waangu chitayere mukusukululwa kwa Kirisiti chevaka lyomuviri waakwe, ulyi ikereke. ²⁵ Ivaaka lyeyi ikereke kuti nive nimuhikana, kuya cho kutokomera kuzwa kwe Ireeza kuni vahewa cheenu, kwizuziriza lyinzwi lye Ireeza. ²⁶ Iichi nje ikunutu yo vusakusima ivawungwirwa zirimo ziingi ne kuya kumamanimani. Lyinu hanu chiiva toondezwa kwa vana vazumina kwaalyi. ²⁷ Avalyi kuvalyi avo Ireeza vavalyi kusaka kuti vazive vuhumi vokuteemba kweyi ikunuti yovusakusima mu Vasazumini. Mukuti Kirisiti wiina mwenu, vusakusima vokuteembwa kwe inako ikeeza. ²⁸ Uzu njeye utu waamba chaakwe. Tu kalyimera umwi no umwi muuntu, mmi turuta umwi ne umwi muuntu chamaano oonse, kuti tuwoolye kutwala muuntu umwi no umwi najolwere kwa Kirisiti. ²⁹ Mmi iichi chini chita ne kutundamena cheziho zakwe ziteenda kwaangu chokulaulwa.