¹ (Sifat-sifat Maransia Pas Zaman Akhir) Perhatikanlah bahwa pas andrau-andrau pangalis, waktu-waktu kasusah sagar hawi. ² Sabab, ulun sagar jari pencinta tenga kakarep, pencinta duit, panamposo, sombong, panyumpah, bakoi taat nihi ulun matueh, bakoi karasa batarima kasih, bakoi barasih, ³ bakoi karasa mengasihi, bakoi rajin badamai, rajin mamfitnah, bakoi tau mangandali tenga, kejam, bakoi rajin inon sa maeh, ⁴ Pengkhianat, ceroboh, angkuh, labih cinta hawa nafsu teke cinta Allah, ⁵ Kaindian saleh tapi manyangkali kuasa e. Palawit lei ulun-ulun sameh iti. ⁶ Sabab, ta penah ire naan ulun-ulun sa manyusup gi huang jemaat nihi nyaput wawei-wawei leme sa na paweat nihi ajoh dosa nihi nunda ire dengan bamasam hawa nafsu. ⁷ Wawei-wawei sameh hio tarus balajar, taou bakoi piji tau hampe gi pangataru akan kabujuran. ⁸ Sameh nihi Yanes nihi Yambres sa ngalawan Musa, sameh hio lei ulun-ulun iti sa ngalawan kabujuran. pikiran ire haot rusak nihi iman ire bakoi tahan uji. ⁹ Tapi, ire bakoi tau labih lawit lagi gene kabingungan ire sagar jelas gi satiap ulun, sameh nihi karueh ulun hio. (Nasehat Paulus gi Timotius) ¹⁰ Tapi kayo haot uma ajaran kuki, cara hidup kuki, tujuan welum kuki, iman kuki, kasabaran kuki, kasih kuki, nihi ketekunan kuki, ¹¹ sameh nihi penganiayaan nihi penderitaan sa kuki alami tangar Antiokhia, Ikonium, nihi Listra. Kuki batahan huang penganiayaan, nihi Tuhan manyalamat kuki teke uras hio. ¹² sabujur e, uras ulun sa kakan welum saleh huang Yesus Kristus sagar na aniaya, ¹³ sedangkan ulun-ulun raat nihi hire penipu sagar jari labih raat lagi, ire nampasasat nihi na sesatkan. ¹⁴ Sedangkan gi kayo, nalanjut nihi inon sa haot kayo pelajari nihi sa kayo yakini sabab kayo karasa teke hiye kayo mampalajari e, ¹⁵ Sameh awe teke halus kayo haot kataru Kitab Suci sa mampu ngami kayo hikmat gi keselamatan nangkah iman huang Yesus Kristus. ¹⁶ Kaluhan Kitab Suci napahewuk oleh Allah nihi bamanfaat de ngajar, de manyatakan kesalahan, de mampakaeh kalakuan, nihi de mendidik huang kabujuran. ¹⁷ Udi hio, maransia ampun Allah akan cakap nihi na perlengkapi de satiap parbuatan maeh.