¹ Ali, desukng Anak Domba mbuka segel se keturu, naan kesunian ba surga kira-kira nonga jam olane. ² Ali, aku kotau keturu malaikat se sekondrokng ba hadapan Allah, ali turu trompet waumi ampe reo. ³ Lalu, malaikat lain awi ali sekondrokng ba altar, ngurut erai pendupaan amas; ali ampeise waumi deo dupa agin wapersembahkan sesama doa-doa ulutn-ulutn kudus ba ombo altar amas se ba muka takhta sio. ⁴ Ali, atuk dupa sio, sesama ali doa-doa ulutn-ulutn kudus, pombo pe hadapan Allah anjak kayakng malaikat sio. ⁵ Lalu, malaikat sio ngepo pendupaan ali ngisine ali apuy se waepo anjak altar ali nimbai ante bumi; moko kerongoilah nain guntur baya kilat ali gempa bumi. Trompet seawal ampe Trompet keopat wasiwui ⁶ Ukah sio, turu malaikat se ngurut turu terompet sio bersiap-siap gin nyiwui trompet reo. ⁷ Malaikat seawal nyiwui trompetne, moko tenjarilah uran es ali apuy bercampur raya; ali walimbak pe ombo bumi, moko tesunalah sepertolu bumi ali sepertolu pepohonan ali tersunalah awis rikut hijau. ⁸ Malaikat kerueh nyiwui trompetne, moko sesuatu sara gunung se tesuna apuy watimbai ampe suakng laut njari raya, ⁹ moko sepertolu ante makhluk se naan ba laut ali naan wolupm njari mate, ali sepertolu ante kapal wahansurkan. ¹⁰ Malaikat ketolu nyiwui trompetne, moko latulah anjak langit erai bintang olai, metarakng sara obor, ali bintang sio kono sepertolu anjak sunge ali mato ranu. ¹¹ Ngaratn bintang sio adalah Apsintus. Moko, sepertolu anjak awis ranu njari apsintus ali deo ulutn mate koe ranu sio koe ranu sio ukah wajarikan pait. ¹² Malaikat keopat nyiwui trompetne, moko terpukullah sepertolu matoondro, sepetrtolu bulan, ali sepertolu bintang sehingga sepertolu anjak reo njari siropm ali demikian lou pada malopm ondro ¹³ Lalu, aku minda ali krongoi erai kukui pumpulu rajawali semblikng ba nonga-nonga langit, pengontuh ali nain gancang, "Celaka, celaka, celakalah reo se sindroi ba bumi koe nain trompet ketolu malaikat lain se kia anta wa siwui."