¹ Penyataan tanjak Yesus Kristus, se waumi Allah ampe-Ise agin wa tunjukne ampe hamba-hamba-Ne tentang hal-hal se laju harus tenjari. Yesus Kristus ngumi penyatan situ nyendalo malaikat-Ne agitn pengampe Yohanes, hamba-Ne. ² Yohanes ukah njari saksi firman Allah ali lou Yesus Kristus, ombo gawisne sesuatu se aut wakindane. ³ Waberkatilah ulutn se mbaca ali nain se muyo firman nubuatan situ ali waberkatilah lou reo se ngerongoikanne ali nggawi none se tertulis ba suakngne, koe waktune ukah riet. Salam Yohanes ampe keturu Jemaat ba Asia ⁴ Tanjak Yohanes, ampe keturu jemaat se naan ba Asia. Anugerah ali damai sejahtera gin kopm anjak Ise se naatn, se ukah naatn, ali se kakatn awi; serta anjak keturu roh se naatn ba hadapan takhta-Ne, ⁵ ali tanjak Kristus Yesus, saksi se setia, se keerai kali bangkit ante rokakng ulutn mate ali penguasa ombo raja-raja ba bumi. Gin Ise, se tuasi taapm ali melepahkatn taapm ante dosa-dosa taapm ali raya-Ne, ⁶ ali ukah menjarikatn taapm njari erai kerajaan, imam-imam gitn Allah taala ali Uma-Ne, gin Iselah kemuliaan ali kekuasaan ampe seola-olane! Amen. ⁷ Pindadeh, Yesus awi ali awatn-awatn, ali setiap mato anta kotau Ise, bahkan reo se ukah nowok-Ne; ali gawisne bangsa ba bumi anta meratap koe Ise. Da, ina anta terjari! Amen. ⁸ " Aku siolah Alfa ali Omega, firman Tuhan Allah, se naatn, se ukah naatn ali se anta awi, se Mahakuasa. " pengotau Yohanes tentang Anak meresia. ⁹ Aku, Yohanes, erai untukng ali sesamako se ngepo bagiatn suakng kesusahatn, suakng kerajaan, ali suakng ketekunan ba suakng Yesus, se naatn ba pulau se waontuh Patmos koe firman Allah ali kesaksiatn Yesus. ¹⁰ Aku wakuasai Roh ampe ondro Tuhan, ali aku krongoi nain se muyo anjak lutukku sara nain trompet, ¹¹ se ngontuh, " Tuliskandeh gawisne se iko otau pe suakng erai buku ali kiripmkan sio gin turu jemaat: Efesus, Smirna, Pergamus, Tiatira, Sardis, Filadelfia, ali Laodika. " ¹² Sendalo, aku sikilap gin minda nain se sundro aliaku. lau aku sikilap, aku minda turu po,o dian amas, ¹³ ali ba nonga-nonga po,o dian sio, aku minda seulutn sara Anak Mersia, makai jubah ampe pe po,o ali erai selempang amas ba dada-Ne. ¹⁴ Utok ali walo-Ne wura sara ulu domba, sewura salju; ali mato-Ne sara tarakng apui. ¹⁵ Po,o-Ne mengilap sara tembaga se membara suakng perapuian ali nain-Ne sara gemuruh ranu banjir olai. ¹⁶ Ba kayakng kanan-Ne, Ise ngurut turu bintang ali anjak wawa-Ne pekual erai pedang taropm se matone rueh, ali wae-Ne tarakng sara mato ondro se layokng. ¹⁷ Desukng aku minda Ise, aku latu ba po,o-Ne sara ulutn mate. Leka, Ise ngandak kayakng kanan-Ne pe Ombo aku ali ngotuh, " Ai takut; Akudeh se awal ali se pengawis, ¹⁸ ali se wolupm. Aku aut mate, leka pinda deh aku wolupm ampe seola-olane, ali Aku se ngurut kunci maut ali kunci denia ulutn mate atau kerajaan maut. ¹⁹ Koe sio, tuliskandeh hal-hal se ukah iko kotau, ali hal-hal se tenjari keletu ali hal-hal se anta tenjari seukahne. ²⁰ Situlah rahasia tentang turu bintang se kopm pinda wa kayakng kanan-ku ali turu po,o dian amas sio. Turu bintang sio iselah para malaikat ante turu jemaat; ali turu po,o dian sio iselah turu jemaat. "