¹ Papire andrau udi hio, katika Yesus waleng ga Kapernaum, karengei berita bahwa Aye naan ta lewu. ² Balu, ajoh ulun bakumpul hampe koi naan ruangan lagi, bahkan ta tuhi pintu sekalipun, dan Aye ngantuh firman ga here. ³ Balu, here dapot Aye, nuna erang kaulun lumpuh sa na tuna oleh epat kaulun. ⁴ Katika here koi kaiuh nuna ulun hio ga riet Yesus ulah ulun ajoh, here pun nguka hapau ta umung Yesus, sahaot nguka e, here nampinau tilam uneng ulun lumpuh hio kading. ⁵ Katika Yesus ngi'ni iman here, Aye ngantuh ga ulun lumpuh hio, "U anak-Ku, dosa-dosa nu haot na ampuni." ⁶ Namun, papire ahli Taurat sa maharung ta aro mulai bapikir huang atei here, ⁷ "Uah inon ulun ina ngantuh sameh hio? Aye ganyah menghujat! Hie sa kaiuh mengampuni dosa-dosa kecuali Allah laerai? ⁸ Yesus langsung karasa neke huang Roh-E bahwa here bapikir-pikir huang atei here. Aye ngantuh ga here, "Uah inon hanyu bapikir sameh hio huang atei nu? ⁹ Awekah sa lebih murah, ngantuh ga ulun lumpuh hio, 'Dosa-dosa nu na ampuni', antawa ngantuh 'Buan, angkat patah nu dan takialah'? ¹⁰ Akan tetapi, karasa bahwa Anak Marasia naan kuasa ta bumi mat mengampuni dosa-dosa." Yesus ngantuh ga ulun lumpuh hio, ¹¹ "Aku ngantuh ga hanyu: buan, angkat patah nu, dan mudi ga lewu nu." ¹² Ulun lumpuh hio hinang mindri, ngalap patah e, dan tulak ga luar, ta hadapan kaluhan ulun. Here kaluhan takjub dan memuliakan Allah, baya ngantuh, "Kami mete pahindra nena hal sa sameh ina!" Lewi Nguma Yesus ¹³ Yesus tulak lagi ga iring danau, dan kaluhan ulun berbondong-bondong dapot ga Aye, dan Aye ngajar here. ¹⁴ Katika Aye nangkah, Aye katena Lewi, anak Alfeus, ganyah maharung ta uneng pembayaran pajak. Balu, Yesus ngantuh ga aye, "Umalah Aku.:" Balu, Lewipun mindri dan uma-E. ¹⁵ Dan, sementara Yesus maharung kuman ta lewu ulun Lewi hio, naan ajoh pangumpul pajak dan ulun-ulun badosa sa lei kuman pahengau nihi Yesus baya murid-murid-E, ulah ta aro naan ajoh ulun, dan here nguma Yesus. ¹⁶ Katika papire ahli Taurat neke kelompok Farisi ngi'ni Yesus ganyah kuman pahengau nihi ulun-ulun badosa dan pangumpul-pangumpul pajak, here nyantane ga murid-murid-E, "Uah inon Aye kuman pahengau kawan penagih pajak dan ulun-ulun badosa?" ¹⁷ Katika Yesus karengei e, Aye ngantuh ga here, "Here sa sehat koi mamerlukan dokter, melainkan here sa sakit. Aku hawi koi mat nerau ulun-ulun benar, melainkan ulun-ulun badosa." Panyantane tentang Bapuasa ¹⁸ Murid-murid Yohanes dan ulun-ulun Farisi ganyah bapuasa. Papire ulun hawi dan nyantane ga Aye, "Uah inon murid-murid Yohanes dan murid-murid ulun Farisi bapuasa, tetapi murid-murid-Nu koi bapuasa?" ¹⁹ Balu, Yesus ngantuh ga here, "Iuhkah kawan pangiring panganten bapuasa sementara panganten laki masih pahengau here? salawah panganten laki hio masih pahengau nihi here, here koi kaiuh bapuasa. ²⁰ Namun, andrau e akan hawi katika panganten laki-laki na alap neke here, dan pada andrau hio lah here akan bapuasa. ²¹ Koi naan ulun sa numpang pama lawah sa pawinsit nihi kain sa bio. Jaka kalahio, tumpangan kain sa bio hio akan nyaminsit pama sa lawah, dan pawinsit e akan batamah hante. ²² Dan, koi naan ulun sa nuang anggur bio ga huang kantung upak sa lawah. Jaka kalahio, anggur hio akan nyaminsit kantung upak hio hingga maeh anggur maupun kantung e akan rusak. Sawadik e, anggur bio na simoh ta huang kantung upak sa bio." Yesus ayelah Tuhan hamau Andrau Sabat ²³ Dan, pada erang andrau Sabat, Yesus nangkah kabun gandum, dan huang perjalanan, murid-murid-E mulai ngutik bulir-bulir gandum. ²⁴ Balu, ulun-ulun Farisi ngantuh ga Aye, "Tena, uah inon here ngulah inon sa malangar hukum andrau Sabat?" ²⁵ Balu, Aye ngantuh ga here, "Mete pahindrakah hanyu membaca inon sa na ulah Daud katika aye dan ulun-ulun sa pahengau aye ganyah kakurangan dan kalauan? ²⁶ Kala awe aye masuk ga Lewu Allah pada masa Abyatar menjabat sebagai Imam Hante, dan kuman roti persembahan, sa ekat tau nakuta oleh kawan imam, dan lei ngami roti hio ga ulun-ulun sa pahengau e?" ²⁷ Udi hio, Yesus ngantuh ga ulun-ulun Farisi hio, "Andrau Sabat na ulah ga marasia, bakoi marasia mat ga andrau Sabat. ²⁸ Jari, Anak Marasia ayelah Tuhan, lei hamau andrau Sabat."