¹ Bapundi, ni kutyekye ba shimi benu sha Shikati, kyopani ndishi shiyama. ² ''Ku tyeka basho indi banyoka'' (ndi murawo wi ntandzi ni sepiso). ³ ''Akya kube naqa kuwee indi ku para nanyina mu lyuvu.'' ⁴ Tatye, ni siye ku mengisa abana bwenu. Kono, niba kulise muli kute indi murawo a Shikati. ⁵ Bavuya, ni sepahare ku mashikati enu shuli kutye lyeli kuru indi ku ywapa, muku sepahara mu mitima enu. Shuku sepahara kuwo mboni sepahare ku Keresite. ⁶ Ka ku sepahara ngaho ati shikati aye maku lyayiri, akya uba radze kawo. Kono, ni sepahare shuwu vuya ku Keresite, yamatisi zu Rezya amati shaka shu mutima akye. ⁷ Sebeza shumutima kowo, shuku tikya mati bberishira Shikati ka bayeyi. ⁸ Shuku tikya tiyi zire akya zisi zu muyei kwekye, shata mbure shipewa ku Shikati, kapa muvuya hali ka muvuya. ⁹ Mashikati, niba pange mwi njira yati fwena. Ni siye kubara guni. Ni yibe akya Shikati enu kwenu ana kwi liiro, ku njemwa ikyetururo ko kukye. ¹⁰ Kamana, ni gipe ku Shikati indi mwiqumu akyee yahati shitira ichimwe. ¹¹ Ni bike zirweniso kozo zu Rezya, atikya ni kwenwe ku yima nduku rwenisa miyanakano yemibbi ya diwulusi. ¹² Kurwana kwetu kakuku rwenisa inyama indi marwapa, kono tati rwana niba yendisi indi injendiso, rwenisa iqhumu ukarema, rwenisa mipupo ye mibbi mwi liiro. ¹³ Cwarehee, ni bike zirweniso zu Rezya, akya ni kwenwe ku yima mukakanda kani ku wubbi, punaku mana kwisi kozo, ni yime shuwugi. ¹⁴ Ni yime shuwugi hee, ni shimine rudzira rwii njahamau mushu wuno, indi kucheka zidziba shuwuqa. ¹⁵ Indi, makondo ngayi minwe kwenda ku tyera ivangeli yi kozo. ¹⁶ Muzopa ni patye itebe yuku tishira, shayo nati kwana kuzimisa muduro umita yati yati piya ngayo mubbi. ¹⁷ Indi, ni bike ituru yuku yakuwa indi seure yu mupupo, yoyo liyi lyu Rezya. ¹⁸ Shizi tapero indi ku ringira, ni rapere kakanda koko mupupo. Ku mamenisizi, kakanda koko ni lyaye shuku dzera kuwuso punati raperera bayeyi wu Rezya baba chena. ¹⁹ Nindi rapelyere, akya mayi ngapwewe kumye pundaku ya shama. Ni rapere akya ndiyi bahaze injahamu iya zikama kwenda shuwu rumiwa. ²⁰ Ishu wurumiwa nanga ndabi muyimini yana muma haka, akya ndihwetye, tandi shindati tishirwe ku hweta. ²¹ Titikasi, yamati shakuwa indi muvuya yamati sepahara ku Shikati, mbwani zire izuto kozo, akya ni yibe shindatisi. ²² Ndamu tumu kunwe shilibaka lyopani, akya ni yibe akya tswendi bani, indi kuni gisa mitima. ²³ I kozo ibe nanwe bakwetu, indi rusuno shuku tishira ku Rezya Sheetu indi Shikati Jeso Keresite. ²⁴ Shishemo shibe kuwo kowo ibati suna Shikati etu Jeso Keresite shu rusuno rwahati xhapuka.