¹ Cware ni fweliniswe tandi Urezya, nokoti bapundiibati shakuwa. ² Indi kwenda murusuno, tandi shi Keresite shamata tishaka indi kulipa yumunwe ko kutswe, mata litowuha indi kuba shitabero ku Rezya. ³ Kono kusiye kuba kunwe mwikyo lyenu miyana kano iyi wuhure kapa indi zizimwe zahali zichena kapa zezibbi, zopani kaziqa kwa bato Urezya baba chena. ⁴ Ku siye kuba nizi hweta zi lisheya kapa zezibbi kapa kozo zahali ziqa. Kono kupewa kuli tumera. ⁵ Yenwe ni yibe zini, akya kuku wuhure, bahali bachena, kapa wulukono- beri shira matoti- kuwo ku njemwa yushu njena mu muwuso a Keresite indi Urezya. ⁶ Muyeyi asiye kuni kitaka shamayi ngama ku ituso, shazopani wuqhu wu Rezya watiya pwi lyiro lyaba hati chere. ⁷ Cware, siya kuli wumba kabbu nawo. ⁸ yemwa inarana mulififi kono pani seli nina muliseli kokushikati nakwenda tandi bapundi wuliseli. ⁹ Zipata za muliseli zatiba iziwuqa kuba zezicena nanyina indi initi. ¹⁰ Nangweza nilitutye izati rumbeka shikati. ¹¹ Nishe kulipa shiyango indi misebezi yemiku zipata iyamulififi kono nudzwe kuzo nizi hindike. ¹² Nuliyubwa wubbi kuhweta izuto zibapanganga zukunutu. ¹³ Kono izuto zopa kozo zati nyazuwa, zati mwanahara shuku byenya. ¹⁴ Kocho shati mwanahara liseli. Cware ndatikya, ''Tambuka, nwe natikwama, ni tambuke ku bafu, mi Keresite mbwa mwenikye kunwe.'' ¹⁵ Ni lyaye naqa shinati para- katindi ba bagigi kono ba basauka. ¹⁶ Ni swena mayiba shuku tikya mayiba mabbi. ¹⁷ Cware, ni siye kuba bayangano, kono ni yuvusise zi Shikati amati shaka shizi sire. ¹⁸ Ni siye kudakwa wu wara, zati twara kupa zezibbi. Ni yire mupupo wo muchena. ¹⁹ Ni liyambare muzi njumbo indi ku yamba zunjumbo zushi lumeli, ni yimbe indi kupa wuqa ku Shikati shu mutima aye kowo. ²⁰ Ni kambire kwi chumwe ni chumwe, mu lina lya Shikati Jeso Keresite ku Rezya Shee. ²¹ Nilipe ku muyeyi nu muyeyi shuku ywapa Keresite. ²² Bakazi, nili bike kwishi lyaba bebenu, tandi ku Shikati. ²³ Ba bebenu ndumu shoro ushi baka tandi shi Keresite ali mushoro i kerekye, mi Keresite yee muyaki. ²⁴ Kono tandishi kereke yatilipa ku Keresite, akyopa indinwe bakazi nilipe kuba bebenu mwi zuto kozo. ²⁵ Banyana, ni sune bakazi benu, tandi shi Keresite ashaka ikereke indi kulipa kuyo. ²⁶ Keresite matalipa atikya ibe ichena, mata yi chena shami ulyiyi. ²⁷ Atikya aliqe kukye shuwuqa, kwi kyini kakabbi kapa koko, kono ku chena indi kwikyini kakabbi. ²⁸ Mwi njira yati fwena banyana ni shake bakazi benu akya mi mbiri enu. Yeye yamati shaka mukazake matili shaka. ²⁹ Ku njemwa ya twaya mu mbiri akye, kono mati wupanga naqa, tandi shi Keresite amati baba lyera ikereke naqa. ³⁰ Shuku tikya tizi gau-gau zumu mbiri akye. ³¹ ''Shilibaka lyazopani munyana shasiye ba shee indi ba nyina indi kaba paxiki ni mukazakye, wu biri wawo batiba inyama ixiki.'' ³² Yopani injahamu yi zika ikuru - kono ndati hweta za Keresite indi kereke. ³³ Nanga ndipakyo, uyumwe akunwe ashakye bamukazakye tandi yee, indi bakazi baku tyekye ba bebawo.