¹ Paghulusi na Timoteghusi,hakareri wa Kristusi Jesusi, kwawahe hanu waNyambi hokupongoka mwaKristusi Jesusi ghomuka Philippi, nohakengururi nawa dikoni. ² Thinyeke thikare nenu no thiraro tho kutunda kwaNyambi gho ihetu na Fumu Jesusi Kristusi. ³ Kutumera Nyambi wange kehe ruvedhe namuvurukanga, ⁴ kehepano, mumandapero ghange ghomahe ghokukwenu, kutenda mandapero ghange no ruhafo ⁵ yoyishi marughaneno ghopofotji ghonando dhomoyo kutunda diyuwa dyokutanga kate popano. ⁶ Nidi no ngcamu mukehe yino, oyu ghatanga yirughana yoyiwa mumoye nanyi ghatware kughutho mukamanitha yinu yi kate mudiyuwa dya Jesusi Kristusi. ⁷ Ghuhunga kukwange mukukuyuva di nakukuyuva kuhatera kukwenu yoyishi namutura mumutjima wange. Mwahe mwakarire mwayendhange kokuhe no munwato dhange no mukukunga kwange no mumatawero gho mbudhi dhodhiwa. ⁸ Nyambi ne mushupi wange, ngepi di namushana mwahe noghukushuki wa Kristusi Jesusi. ⁹ Edhi ne dho ndapero dhange: eshi ruhakitho roye rwingipe no rwingipe mughudimuki no matjwathaneno ¹⁰ podigho eshi mutawedhere eyi yarogha, podiyo eshi mukutekere kupira makutondovoro kate mudiyuwa dya Kristusi, ¹¹ kuyaritha no mbuyo dhoghuhunga kupitera mwaJesusi Kristusi kumangcamu no kutumera Nyambi. ¹² Pano nashana mudimuke, mwakurwange, eyi yahokoka kukwange yatapera mukuyeyura nando dhomoyo. ¹³ Yitundamo, menge ghange gho mwaKristusi gheyire kuthishe kupitera mumaporitha gho mumbara kwakehe yuno. ¹⁴ Thingi thawakurwange hakara ghure no mangcamu ghaFumu pamurandu gho menge ghange, hakara no ghutjimapi ghokupira kuyapa kughamba nando. ¹⁵ Hamwe kughamba kwaKristusi kutunda mughupata, nohamwe kutunda muyihima yoyiwa. ¹⁶ Makwatithoko kughatenda pamurandugho ruhakitho,nokudimuka eshi hanitura pano mukukarerapo mbughi dhodhiwa. ¹⁷ Ene wahakarireko kughamba Kristusi mudishamu, nokupira dikuto. kughayara eshi nanyi haninyandeke okumene menge. ¹⁸ Yinye keho? Yoyo kehe mundhira-yikare shi mundhira dhoshemwa endi mughumbango-Kristus kumughamba, no moyi ame kuhafa. Kemo, and nanyi ni hafe, ¹⁹ poyi nadimuka yitundamo yo mashutwero ghange kupitera mumandapero no maghamweno gha Mupepo waJesusi Kristusi. ²⁰ Ayo ne yitaterera no makurupero no kadi nakufa honyi, ene mene ndjikiti, pano yira roruhe, Kristusi nanyi nimukunge muyirama yange, yikare shi muyipara endi mukufa. ²¹ Ame eshi nipare ne pamurandu waKristusi no kufa ne kuwana. ²² Ngeshi me hanipara panyama, eyi yina kutongora eshi mbuyomwene muyirughana kukwange. Keho ne yipi yokutorora? Kadi na kudimuka. ²³ Ame ne yina nikwata yinu yi yiwadi. Mahimeno ghange ne kwimana no kukara naKristusi, eyi yiwa kupiterera, ²⁴ ene kukara shime panyama ne wingi yishana yonyaranyara. ²⁵ Ngeshi kukutawitha yi, nadimuka eshi nanyi nikare no kutwikera nenu mwahe, mumarundurukero no ruhafo mumakurupero, ²⁶ podiyo mumwange muna kwingipa noyitambo yokukuyeyura mwaKristusi apa na kwiya kukwenu karo. ²⁷ Mukare mwathinda mundhira dhomudyo gho mbudhi dhaKristusi, podigho ngambi kwiya nonimukenge endi nakara, kukona niyuve yokukwenu, eshi munemana ndjikiti mumupepo ghofotji, no maghano ghofotji kurughanena makurupero ghombudhi dhomoyo. ²⁸ Kadi hamuyapithe mukehe dikuto mowa hadi eshi hanyahi wenu. Othi ne thothidimukitho thagho thomahanyawero, eneyo mashutukero ghenu- noyi kutunderera kwa Nyambi. ²⁹ Eyi ghayimupa mwe nyaranyara pamuranduwaKristusi kadi shi tutawe mumwendi ngenyu, ene mukunyanda pamurandu wendi, ³⁰ kukara no ghukukutu ghofotji oghu mwamonine mumwange, nopano muna kuyuva mumwange.