¹ Jesusi ghangenine muwato, ghareghire, no gheyire ku doropa dhendi. ² Mwimane, hamuretere katughuru ghomurema ghararire padisharo. Pakumona matawero ghawo, Jesusi ghaghambire kwakatughuru gho murema,''Mwana,ninge ghuhafe. Maharwero ghoye ghana pu kuthigherera.'' ³ Mwimane,hanu hamwe haghambire mukatji kagho,''Oyu katughuru ne kuna kushamuna Nyambi wetu.'' ⁴ Jesusi ghadimukire yighayara yendi no ghaghambire,''Nye muna kughayarera yinu yoyimango mumutjima dhenu? ⁵ Ayo ne yiredhu,mukughamba,'Maharwero ghenu ghanapu kughamuthigherera,' endi mukughamba,'Wimane nokayende'? ⁶ Moyo nanyi mwakudimuke eshi Mwana Munu ghakara no ngcamu pamuve mukuthigherera maharwero,...''ghaghambire kwamurema,''Wimane, dhamune disharo dyoye, no kayende kudimbo dyoye.'' ⁷ Katughuru ghemanine noghakayendire kudimbo dyendi. ⁸ Apa dhayimonine mbunga yinu yi, hatetukire nohatumere Nyambi, oyu ghatapire mangcamu ghaya kohanu. ⁹ Apa gha pitire Jesusi, ghamonine katughuru gho dina Mateghusi ghana hungumana mu tende wawakamukudi. Ghamu tongwere,''Ni kuthe.'' Ghemanine no ghamukuthire. ¹⁰ Apa ghahungumanine Jesusi mundhugho ghadye, mwimane, thingi thawakamukudi no haharuri heyire nohadye naJesusi no hakathishongero wendi. ¹¹ Apa hayimonine haFarasayi, haghambire kwawakathishongero,''Nye muhongi wenu ghana kudyera no hakamukudi no haharuri?'' ¹² Apa ghayiyuvire Jesusi, ghaghambire,''Hanu wa hagora payirama kadi hanyanda nganga, wowa ngenyu hakukorwa. ¹³ Mwakona kuyenda no kukuhonga eyi yatongora: 'Nahaka thinyeke kadi muyambo.' Kadi neya mukunetha hahunga mukuthighuka,ene haharuri.'' ¹⁴ Podigho hakathishongero waJohanesi heyire kukwendi no kughamba,''Nye napo twe nawa Farasayi twadhirerekedhanga,ene hakathishongero ghoyene kadi wakudhirerekedha?'' ¹⁵ Jesusi ghawahuthire,''Kukona hakakukara pamayekero hakudhekere oku mukamayekero ne shime nagho ghadi? Ene diyuwa mbodineya apa mbahamushimba mukamayekero kukwagho, podigho hakudhirerekedha. ¹⁶ Kadiko munu gho kutura thipindhithothitere thothipya pathivata thothikurukuru, thirivo thi nanyi thakudjadjuke kutunda pathitere, no mbothina djadjuka momuyi. ¹⁷ Ene pamwe hanu kutura vinyu ghomupya mudikende dyodikurukuru. Ngeshi hayitendi,thikova thina kupayuka, no vinyu ghana kunotoka, no dikendediya hana kudiyipitha. Ene, kutura vinyu ghomupya mudikende dyodipya, no yoyihe yina kupwa kupungura.'' ¹⁸ pa ghakarire Jesusi kuna kuwatongwera yinu yi, wimane, mukadikutogheyire no ghakunyongamene kukwendi. Ghaghambire,''Mwanange ne ndani ghakufa, wiye ghukamuture nyara dhoye, no kukona ghapare.'' ¹⁹ Jesusi ghemanine noghamukuthire, no hakathishongero wendi nagho. ²⁰ Mukenge, mbuyama yu ghanyanda rorure kupita manyinga myaka dikumi no dhiwadi gheyire munyima dhaJesusi no ghakwatire kughuhura gho digugho dyendi. ²¹ Ghakutongwere thinda esh,'' ngeshi nikwate kuthishupata thendi, nanyi nikare thiwana.'' ²² Ene Jesusi ghathetukire noghamumonine, no ghaghambire,''Mwanange, kare noghudhutjima; matawero ghoye ghana kwirura.'' No mukamadi gherukire muviri dhodho viri. ²³ Apa gheyire Jesusi mundhugho,ghamonine hapepi no mbunga dhina kuyoghotera. ²⁴ Ghaghambire,''Moyendekuya,mwanuke yo kadighana fu,ene kuna rara.'' Ene hamuhekire no kumusemburura. ²⁵ Apa hadhiturire mbunga dhi panunda, ghangenine mungonda no hanushimbire munyara, no mwanuke ghemanine. ²⁶ Mbudhi dhi dhayeranine mumukunda. ²⁷ Apa ghapitire Jesusi, harume hawadi hohakunga hamukuthire. Hatwikere kumukugha ghughamba,''Tufere nyeke,Mwana David!'' ²⁸ Apa ghengenine Jesusi mundhugho, mukuna yu gheyire kukwendi. Jesusi ghawa tongwere,''Mwayitawa eshi kukona niyitende yi ndi?'' Hamuhuthire,''Yi, Fumu.'' ²⁹ NaJesusi gha kwatire meho ghawo no kughamba, ³⁰ ''Ninge hayitende yi kukutha mumatawero ghenu,'' no meho ghawo ghayandhurukire. NaJesusi ghawarawere no kughamba,''Mumone eshi kadiko yu shoghayidimuke.'' ³¹ Ene hatutughuru hawadi wa hashwayire panunda nokayareka mbudhi dhokoyi mumukunda ghuya. ³² MMundhira dhohatutughuruwa hawadi hakayenda,mukenge, katughuru gho thipore ghoyu wakarire mupepoghoghumango hamuretire kwaJesusi. ³³ Apa haghushwayithire mupepo ghoghumango, katughuru ghothipore ghatangire kughamba. Mbunga dhatetukire no kughamba,''Éyi kadi twayimona rumwaya muIsrae!'' ³⁴ Ene haFarasayi haghambire,''Mmwa muhingi mupepo dhodhimango, aye kutjidha mupepodhi.'' ³⁵ Jesusi ghayendire mumadoropa no mumukunda dhodhihe. Ghatwikere kuhonga mu sinagoge, kuhonga mbudhi dhoghufumu no kwirura mahamba no yikorwa yoyihe. ³⁶ Apa ghamonine mbunga, ghakarire nodighano dyagho, pamurandu eshi hawanyandekire nohakashire. Hakarire yira ndjwi dhina piri mukungi. ³⁷ Ghaghambire kwawakathishongerowendi,''Muyangu ne wingi,ene harughani ne hapu. ³⁸ Podiyo wangu wangu muraperere kwaFumu gho muyangu,podigho ghatume harughani kumukesho wendi.''