¹ Apa Jesusi gha ghurumukire kutunda kudirundu, mbunga dhamukuthire. ² Mwimane, mukayinondwe ghamwiyere no ghakunyongamene kughutho wendi, ghughamba,''Fumu,ngeshi ghunashana, nitende no mukenu.'' ³ Jesusi ghashimbire dyoko dyendi noghamukwatire, ghughamba,'' Na himi. Kushuke.'' Popo yinondwe yamushwayire. ⁴ Jesusi ghaghambire kukwendi,''Mone kadiko yi ghuna ghamba kwa kehe yuno. Yende mundhira dhoye, kakuneghe kwa mupristeri,no katapa muyambo ghuya ghatapire Mosesi, thikakare thineghedhitho.'' ⁵ Apa gheyire kuCapernaum, kwadi gheyire kwendi, no kumukumbera ⁶ no kughamba,''Fumu, murughani wange ghana rara kadiwakuyenda no mutjitju.'' ⁷ Jesusi ghaghambire kukwendi,''Nanyi niye no kuna mwirura.'' ⁸ Katughuru ghamu huthire eshi,''Fumu,kadiko mudyo gho kungena kungena me mundhugho dhoghe. Ghambe ngenyu manando namurughani wange nanyi gheruke. ⁹ Ame name neghofotji ghoyu hatura pamuragho, nakara nohakayita kwishi dhange. Nakughamba yino,'Yende,' ndani nokuharughani,'Tende yino,' no kuyirughana.'' ¹⁰ Apa ghayiyuvire Jesusi yi, ghahafire noghahafire no ghaghambire kowa hamukuthire,''Ghushemwa nakughambakukwenu,kadi nawana keheyuno no makurupero mwaIsrael. ¹¹ Nakumutongwera, hengi hakwiya kutundera ku diva no ditokera, no nanyi hakukare nange kutishi naAbraham, Isaac, naJakobusi, mughufumu gho diwiru. ¹² Ene hana hoghufumu nanyi hakuwavukume panunda mudikokore,oko hakadira no kukukwetjura mayegho.'' ¹³ Jesusi ghaghambire kwakatughuru yu, ''Yende! Kenge ghuna tawa, nanyi ni yikutendere.'' Namupika ya gherukire muviri dhodhiya. ¹⁴ Jesusi apa gheyire mudimbo dya Petrusi, ghamonine ngumwenya Petrusi ghana rara ghadino mepo. ¹⁵ Jesusi ghamukwatira munyara, no mepo dhamutundire. Ghapindukire no ghatangire kumurughanena. ¹⁶ Apa weyire ghuthiku, hanu haretire kwa Jesusi hengi awa hakarire no mupepo dhodhimango. Gha hingire panunda dhimupepo no nando no kwirura wahe awa hakarire hakorwi. ¹⁷ Mundhira dhi moghakumithere mo eyi ghaghambire Isaiah gho muporofeta, ghughamba,''Aye papendi ghana shimbi yikorwa no mahamba ghetu.'' ¹⁸ Apa ghamonine Jesusi mbunga dhina mupongera, ghatapire marawero mukuyenda kumutara ghumwe gho dikuruviya dya Galileya. ¹⁹ Munughumwe gheyire kukwendi nokughamba,''Muhongi, nanyi nikukuthe kehe kuno ghuna kuyenda.'' ²⁰ Jesusi ghamuhuthire,''Mbindhi ghadi no makwina,noyinyunyi mudiwiru yidi no yitunguru, ene Mwana Munu kadi ghadi nokokutura mutwi.'' ²¹ Ghumwe ghopawakathishongero ghaghambire kukwendi,''Fumu, nitawedhere nikavumbeke tate.'' ²² Ene Jesusi ghamutongwere,''Nikuthe me, nothiye hafu havumbeke hafu wagho.'' ²³ Apa ghadhinine Jesusi muwato, hakathishongero wendi hamukuthire muwato. ²⁴ Mwimane, kokutanga dipepo mudikuruviya, wato waghangambwere mangumbi. Ene Jesusi yene ghana rara. ²⁵ Hakathishongero wendi heyire kukwendi no kuna mupindutha, ghughamba,''Tughamwene,Fumu; tamba tu fe!'' ²⁶ Jesusi ghawatongwere,''Nye muna yapa, mudi nomatawero gho mapu?'' Ghapindukire no ghashingire mupepo no dikuruviya. Podiyo dyakuturire. ²⁷ Hanu hatumere no kughamba.''Munu munye yu, ngambi mupepo no dikuruviya kumukutha?'' ²⁸ Apa gheyire Jesusi kumutara ghumweya no kumutara waGadarenes, harume hawadi awa hakarire no mupepo dhodhimango hamuwanine. Hatundere mumambira no hakarire hapata, podiyo eshi kadiko mukakuyenda ghokupita ndhira dhiya. ²⁹ Mwimane, hadirire no kughamba,''Nye shotukone kutenda kukoye, Mwana Nyambi? Ghuneya mukuna tuyuvitha tjitju kughutho gho nako dhi haturapo?'' ³⁰ Popo muraka ghoyinguru wadyerere ko, kadi kayenda nagho. ³¹ Mupepo ghoghumango watwikere kushedhaghura Jesusi no kughamba,''Ngeshi ghututjidhe,tutume moyiya yinguru.'' ³² Jesusi ghawatongwera,''Muyende!'' Mupepo dhawatundire nokengena muyinguru; no kwimana, yinguru yoyihe yatjirere ghughurumuka kudikuruvira noyakaferere mumeyu. ³³ Awa hakungire yinguru hatjirire no hayendire mudoropa no katongora yoyihe, thikumapo nekoyi yahokokire kohatutughuru hawadi awa hakarire no mupepo dhodhimango. ³⁴ Mwimane, doropa dhodhihe dheyire nodhikuwane naJesusi. Apa hana mumonine, hamukumbere ghatunde muditunga dyagho.